Pearl (NSS) - စက်တင်ဘာ ၁ဝ

ရန်ကုန်-မန္တလေးအမြန်လမ်းမကြီးတွင် Hijet ယာဉ်တစ်စီးအရှိန်မထိန်းနိုင်ဖြစ်ကာ ရပ်ထားသောယာဉ်အား ဝင်တိုက်မှုဖြစ်ပွားရာ ကလေးငယ် အပါအဝင် (၈)ဦးထက်မနည်း ထိခိုက်ဒဏ်ရာရရှိခဲ့ကြောင်း မြန်မာနိုင်ငံ မီးသတ်တပ်ဖွဲ့ထံမှ သတင်းရရှိသည်။ 

ဖြစ်စဉ်မှာ ယမန်နေ့ (စက်တာဘာလ ၉ ရက်)၊ ည (၉)နာရီ (၃ဝ) မိနစ်အချိန်ခန့်တွင် ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် (၆၁/၁) နှင့် (၆၁/၂) ကြားတွင် ဖြစ်ပွားခဲ့ခြင်းဖြစ်သည်။ 

အဆိုပါ မိုင်တိုင်ကြားတွင် ရပ်ထားသော Nissan AD VAN (အဖြူရောင်) ယာဉ်အား နေပြည်တော်မှ ရန်ကုန်သို့မောင်းနှင်လာသော HIJET (အဖြူရောင်)ယာဉ်သည် အရှိန်မထိန်းနိုင်ဖြစ်ကာ ဝင်‌ရောက်တိုက်မိခဲ့ကြောင်း သိရသည်။ 

ဖြစ်စဉ်ကြောင့် Nissan AD VAN ပေါ်တွင် ရှိနေသူများအနက် ကလေးငယ်တစ်ဦးအပါအဝင် (၇)ဦး  ထိခိုက်ဒဏ်ရာရရှိခဲ့ပြီး HIJETယာဉ်ပေါ်ပါ အမျိုးသား (၁)ဦးလည်းထိခိုက်ဒဏ်ရာရရှိ ခဲ့ကြောင်း သိရသည်။ 

"ရပ်ထားတဲ့ယာဉ်ကို နောက်ကနေ အရှိန်မထိန်းနိုင်ဘဲ ဝင်တိုက်တာပေါ့။ ဒဏ်ရာရရှိတဲ့ ကလေးကတော့ (၉)နှစ် (၁ဝ)နှစ် ဝန်းကျင်ပါပဲ" ဟု အုန်းသျှစ်ကုန်းအမြန်လမ်းမီးသတ်စခန်း၏ တာဝန်ရှိသူတစ်ဦးက NP News ကို ပြောသည်။ 

လက်ရှိတွင် ၎င်းတို့အား အမြန်လမ်းရဲတပ်ဖွဲ့ပိုင် 192 သူနာတင်ယာဉ်ဖြင့် မြို့ချောင်းတိုက်နယ်ဆေးရုံသို့ ပို့ဆောင်ပေးထားပြီး ဒဏ်ရာရရှိသူများအနက် HIJET ယာဉ်ပေါ်ပါ အမျိုးသားတစ်ဦးမှာ စိုးရိမ်ဖွယ်ရာ ရှိနေကြောင်း သိရသည်။ 

အလားတူ ယမန်နေ့ (စက်တာဘာလ ၉ရက်)၊ ည (၁ဝ)နာရီခွဲ အချိန်ခန့်တွင် ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၁၁ဝ/၂) နှင့် (၁၁ဝ/၃)ကြားတွင် Toyota Corolla Van (ခဲရောင်ယာဉ်) သည် အရှိန်မထိန်းနိုင်ဖြစ်ကာ လမ်းဘေးရှိ ဘယ်ရီယာတုံးအား ဝင်ရောက်တိုက်မိမှုဖြစ်ပွားကြောင်း သိရသည်။ 

အဆိုပါယာဉ်တိုက်မှုကြောင့် ယာဉ်ပေါ်တွင် လိုက်ပါလာသော (၆)ဦး အနက် ကလေးငယ်တစ်ဦး အပါအဝင် (၅)ဦးတို့ ထိခိုက်ဒဏ်ရာရရှိခဲ့ကြောင်း သိရသည်။

လက်ရှိတွင် ၎င်းတို့အား ၁၁၅ မိုင် အမြန်လမ်းကြက်ခြေနီအသင်းပိုင်သူနာတင်ယာဉ်ဖြင့် ဖြူးမြို့နယ် ပြည်သူ့ဆေးရုံသို့ ပို့ဆောင်ပေးထားပြီး  အမျိုးသမီး (၂)ဦးမှာ စိုးရိမ်ဖွယ်ရာအ‌ခြေအနေရှိကြောင်း သိရသည်။