Htay Oung (NSS) - စက်တင်ဘာ ၈ 

မြောက်ကိုရီးယားခေါင်းဆောင်ကြီး ကင်ဂျုံအန်ကိုယ်တိုင်တက်ရောက်တဲ့ ဗုဒ္ဓဟူးနေ့ စက်တင်ဘာလ ၆ ရက်က အခမ်းအနားတစ်ခုမှာ “ကိုရီးယားပုံစံ နည်းဗျူဟာမြောက်နျူကလီယားတိုက်ခိုက်ရေး ရေငုပ်သင်္ဘော” ကို ရေချ လိုက်‌ကြောင်း မြောက်ကိုရီးယားအစိုးရပိုင် ကိုရီးယားဗဟိုသတင်းအေဂျင်စီ (KCNA) က သတင်းထုတ်ပြန်တယ်လို့ CNN က ယမန်နေ့က ရေးသားခဲ့ပါတယ်။

ရေငုပ်သင်္ဘောသစ်ဟာ ကိုရီးယားဒီမိုကရက်တစ်ပြည်သူ့သမ္မတနိုင်ငံ ရေတပ်မတော်ရဲ့အဓိကရေအောက် ထိုးစစ် နည်းလမ်းတစ်ခုအဖြစ် တိုက်ခိုက်ရေးမစ်ရှင်တာဝန်များကို ထမ်းဆောင်သွားမှာဖြစ်ကြောင်း အခမ်းအနားမှာ ကင်ဂျုံအန်က မိန့်ခွန်းပြောဆိုကြောင်း သိရှိရပါတယ်။ 

ကိုရီးယားတို့ရဲ့သမိုင်းဝင်ထင်ရှားသူတစ်ဦးဖြစ်တဲ့ “သူရဲကောင်း_ကင်ကွန်အုတ်” လို့ အမည်ပေးထားတဲ့ အမှတ်-၈၄၁ တိုက်ခိုက်ရေး ရေငုပ်သင်္ဘောဟာ မြောက်ကိုရီးယားရဲ့ရေတပ်အင်အားကို မြှင့်တင်ရေးကဏ္ဍသစ်ရဲ့ ကနဦး ခြေလှမ်းတစ်ခုဖြစ်ကြောင်း၊ ရေတပ်သင်္ဘောတည်ဆောက်ရေးလုပ်ငန်းချဲ့ထွင်နေခြင်းကို နောက်ပြန်ဆုတ်ဖို့ အကြောင်းမရှိဘူးလို့ KCNA က ဖော်ပြခဲ့ပါတယ်။ 

အဏုမြူစစ်ပွဲအန္တရာယ်အကြောင်း အမေရိကန်ကို သတိပေးဖို့အတွက် နျူကလီယာဒုံးကျည်တိုက်ခိုက်မှုကို ပုံစံတူ ဆင်မြူလေတာနည်းစနစ်နဲ့ လေ့ကျင့်ခဲ့ကြောင်း  သီတင်းပတ်ကုန်မှာ မြောက်ကိုရီးယားက ပြောကြားပြီးနောက် ယခုကြေညာချက် ထပ်မံထွက်ပေါ်လာခြင်းဖြစ်ပါတယ်။

အဲဒီ ဆင်မြူလေတာ ပုံစံတူတိုက်ခိုက်မှုဟာ ယခင်ရက်သတ္တပတ်စောစောပိုင်း အမေရိကန်နဲ့ တောင်ကိုရီးယားတို့ရဲ့ ပူးတွဲစစ်ရေးလေ့ကျင့်မှုကို လက်တုံ့ပြန်ခြင်းဖြစ်တယ်လို့ KCNA က ဆိုပါတယ်။ 

ကျူးကျော်တပ်များအပေါ် တန်ပြန်တိုက်ခိုက်ရေးကိုအခြေခံပြီး အမေရိကန်-တောင်ကိုရီးယားတို့ရဲ့ကျည်အစစ်နဲ့ ပစ်ခတ်လေ့ကျင့်မှုကို ပြီးခဲ့တဲ့ သြဂုတ် ၃၁ ရက်နေ့မှာ စတင်ခဲ့ပါတယ်။

စစ်ရေးပူးပေါင်းဆောင်ရွက်မှုကိုမြှင့်တင်ဖို့အတွက် အမေရိကန်နဲ့ တောင်ကိုရီးယားသမ္မတတို့က မေလ ဆိုးလ်မြို့ ထိပ်သီးဆွေးနွေးပွဲမှာ ကတိပြုခဲ့ကြပါတယ်။ ယခုတစ်နှစ်အတွင်းမှာပဲ မြောက်ကိုရီးယားဟာ ဒုံးကျည်စမ်းသပ်မှု အဖြစ် အကြိမ်တစ်ဇင်ကျော်ကို ပစ်လွှတ်ခဲ့ပါတယ်။ ယခင် ၂ဝ၂ဝ ပြည့်နှစ်မှာ လေးကြိမ်သာ စမ်းသပ်ခဲ့ပြီး ၂ဝ၂၁  ခုနှစ်မှာ ၈ ကြိမ်ပြုလုပ်ခဲ့ပါတယ်။

ကိုရီးယားဒီမိုကရက်တစ်ပြည်သူ့သမ္မတနိုင်ငံတည်ထောင်ခြင်း ၇၅ နှစ်မြောက် နှစ်ပတ်လည်နေ့ကို မနက်ဖြန် စက်တင်ဘာ ၉ ရက်မှာ ကျင်းပဖို့ မြောက်ကိုရီးယားက စီစဉ်ထားပါတယ်။

#မြောက်ကိုရီးယားနျူကလီယာတိုက်ခိုက်ရေးရေငုပ်သင်္ဘော #အမေရိကန် #နျူစစ်ပွဲအန္တရာယ် 

(CNN., 7 September 2023,” North Korea says it launched new ‘tactical nuclear attack’ submarine” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)