Htay Oung (NSS) - စက်တင်ဘာ ၇ 

မော်စကိုကျူးကျော်မှုကို တန်ပြန်တိုက်ခိုက်နေတဲ့ ယူကရိန်းဟာ အရေးပါတဲ့တိုးတက်မှုတွေကို ရရှိခဲ့ကြောင်း ပြီးခဲ့တဲ့ စက်တင်ဘာ ၆ ရက်ကတည်းက လူ ၁၇ ဦးထက်မနည်း သေဆုံးခဲ့ရတဲ့အထိ အဆက်မပြတ်တိုက်ခိုက်ခံနေ ရတဲ့ ကိယက်ဗ် ခရီးစဉ်အတွင်း အမေရိကန် နိုင်ငံခြားရေးဝန်ကြီး အန်တိုနီဘလင်းကင်က ဗုဒ္ဓဟူးနေ့မှာ ပြောဆို လိုက်တယ်လို့ Reuters က ယနေ့ စက်တင်ဘာလ ၇ ရက်မှာ ရေးသားခဲ့ပါတယ်။

လွန်ခဲ့တဲ့ နှစ်ဆန်းပိုင်း ယူကရိန်းနိုင်ငံအရှေ့ဘက် ဘတ်ခ်မွတ်မြို့ကို ရုရှားတို့က အကြီးအကျယ်ဖျက်ဆီးပြီးနောက် မြို့နေအများစု ထွက်ပြေးသွားတဲ့ ဧရိယာအများစုကို သိမ်းယူခဲ့ပါတယ်။ ဘတ်ခ်မွတ်အနီး “ကိုစတန်ညင်နစ်ဗ်ကာ” မြို့ရှိ လူစည်ကားတဲ့ စျေးဝယ်စင်တာတစ်ခုမှာ တိုက်ခိုက်ခံရမှုကို သမ္မတ ဇီလင်စကီးက ရှုတ်ချလိုက်ပါတယ်။ (ဆိုဗီယက်ခေတ် အကြီးအကျယ်ဖွံ့ဖြိုးလာခဲ့တဲ့) အဲဒီစက်မှုမြို့ရဲ့လူသေဆုံးမှုမှာ ကလေးငယ်တစ်ဦးလည်း ပါဝင် နေပြီး ဒဏ်ရာရသူ ၃၂ ဦးထက်မနည်းရှိတယ်လို့ တာဝန်ရှိသူတွေက ပြောခဲ့ကြပါတယ်။ 

မြို့ပြများကို ဖျက်ဆီးပြီး မြို့ရွာ ကျေးလက်နဲ့ အရပ်သားထောင်ပေါင်းများစွာတို့ကို သေဆုံးစေခဲ့တဲ့ ရုရှားကတော့ အဲဒီတိုက်ခိုက်မှုနဲ့ပတ်သက်ပြီး လောလောဆယ် မှတ်ချက်ပေးခြင်း မရှိပါဘူး၊ မော်စကိုရဲ့ ၁၈ လကျော် ကြာမြင့် လာခဲ့ပြီဖြစ်တဲ့ကျူးကျော်မှုမှာ အရပ်သားများအပေါ် တမင်ပစ်မှတ်ထားခြင်း မရှိကြောင်း ငြင်းဆိုထားပါတယ်။ 

ဇွန်လစောစောပိုင်း တန်ပြန်ထိုးစစ်စတင်ချိန်နောက်ပိုင်း ကိယက်ဗ်သို့ ပထမဆုံးလာရောက်သူ အမေရိကန် ထိပ်တန်းအရာရှိ ဘလင်ကင်ကတော့ ယူကရိန်းရဲ့ လေကြောင်းရန်ကာကွယ်ရေးဆိုင်ရာ ထောက်ပံ့မှု အပါအဝင် အမေရိကန်ဒေါ်လာ ၁ ဘီလျံကျော်တန်ဖိုးရှိ နောက်ထပ် စစ်ရေးအကူအညီအစီအစဉ်သစ်တစ်ရပ်ကို ကြေညာ လိုက်ပါတယ်။

ဆက်လက်ဆင်နွှဲနေတဲ့တန်ပြန်ထိုးစစ်ဟာ လွန်ခဲ့တဲ့ရက်သတ္တပတ်အနည်းငယ်အတွင်း တိုးတက်အောင်မြင်မှုများ နဲ့ အရှိန်အဟုန်မြင့်တက်လာခဲ့ကြောင်း၊ ယခုထပ်မံပေးအပ်လိုက်တဲ့ (စစ်ရေး) အကူအညီသစ်ဟာ အဲဒီအောင်မြင်မှု တွေကို ဆက်လက်ထိန်းသိမ်းထားနိုင်ပြီး နောက်ထပ် အရှိန်တိုးမြှင့်နိုင်မှာဖြစ်တယ်လို့ ယူကရိန်းနိုင်ငံခြားရေး ဝန်ကြီးနဲ့ သတင်းစာရှင်းလင်းပွဲမှာ ဘလင်ကင်က ပြောဆိုပါတယ်။

စောစောပိုင်း ဘလင်ကင်ဟာ တိုးတက်မှုဟာ အလွန်အရေးပါပြီး တကယ့်ကို အားရစရာကြီးဖြစ်ကြောင်း ဖော်ပြခဲ့ပါတယ်။

ကိယက်ဗ်ရဲ့တန်ပြန်ထိုးစစ်ဟာ နှေးကွေးလွန်းပြီး ညံ့ဖျင်းတဲ့ နည်းဗျူဟာများက အဟန့်အတားဖြစ်နေရတယ်လို့ အမည်မဖော်လိုသူပင်တာဂွန်အရာရှိများကို ကိုးကားပြီး အမေရိကန်မီဒီယာများရဲ့ ရေးသားချက်ဟာ ယူကရိန်း အရာရှိများကို ဒေါသထွက်စေခဲ့ပါတယ်။ ဝေဖန်သူများရဲ့ ပါးစပ်တွေကို ပိတ်ပစ်ဖို့ ကိယက်ဗ်နိုင်ငံခြားရေး၀န်ကြီး ဒီမီထရို_ကူလီဘာကို တိုက်တွန်းခဲ့တဲ့အထိ ဖြစ်ခဲ့တယ်လို့ ဝါရှင်တန်မီဒီယာများက ဖော်ပြခဲ့ကြပါတယ်။

ယူကရိန်းတို့ရဲ့တန်ပြန်ထိုးစစ်မှာ ရွာပေါင်း တစ်ဒါဇင်ကျော်နဲ့ အဆောက်အအုံအနည်းငယ်ကို ပြန်လည်သိမ်းပိုက်ခဲ့ ပါတယ်။ ဒါပေမယ့် ရုရှားတို့ ထိန်းချုပ်ထားတဲ့နယ်မြေအတွင်းသို့ ချဉ်းကပ်လာတဲ့အခါမှာတော့ ယူကရိန်းတို့ရဲ့ ရှေ့တိုးချီတက်ဖို့ အရေးဟာ မိုင်းကွင်းများ-ကတုတ်ကျင်းများနဲ့နှေးကွေးသွားခဲ့ပါတယ်။

ကိယက်ဗ်ရဲ့ စစ်နည်းဗျူဟာအပေါ်  လူသိရှင်ကြား ဝေဖန်ခြင်းမပြုတော့တဲ့ အမေရိကန်အရာရှိများကတော့ ယူကရိန်း အရှေ့တောင်ပိုင်းမှာ တိုးတက်မှု ရရှိကြောင်း ပြီးခဲ့တဲ့ သီတင်းပတ်မှာ ပြောဆိုပါတယ်။

အမေရိကန်ရဲ့အကူအညီအသစ်မှာ HIMARS ဒုံးကျည်ပစ်စနစ်များ၊ “ဂျက်ဗီလင် တင့်ကားဖျက်လက်နက်များ” ၊ “အေဗရမ်” တင့်ကားများနဲ့ အခြားလက်နက်ခဲယမ်းစနစ်များ ပါဝင်မှာဖြစ်ကြောင်း အိမ်ဖြူတော် သတင်းပြန်ကြား ရေးက ပြောပါတယ်။ ယူကရိန်းမှာ ကုန်ခမ်းသွားတဲ့ #ယူရေနီယံ_ခဲယမ်းများကိုလည်း ပေးပို့သွားမယ်လို့  ပင်တဂွန်က ဆိုပါတယ်။

အမေရိကန်ဟာ ယူကရိန်းမှာ နောက်ဆုံးတစ်ယောက်မှ မကျန်တော့တဲ့အထိ ဆက်လက်ထောက်ပံ့နေမှာဖြစ် ကြောင်း ဘလင်ကင်ရဲ့ခရီးစဉ်နဲ့ပတ်သက်ပြီး ကရင်မလင် ပြောခွင့်ရပုဂ္ဂိုလ် ဒီမီထရီ_ပက်ရ်ှကော့ဗ်က သတင်း ထောက်များ အမေးကို ပြန်လည်ဖြေဆိုပါတယ်။ ကိယက်ဗ်ကို အမေရိကန်က ပေးအပ်နေတဲ့အကူအညီဟာ ရုရှားရဲ့ ယူကရိန်းအထူးစစ်ဆင်ရေးအပေါ်ထိခိုက်မှာ မဟုတ်ဘူးလို့လည်း  သူက ပြောပါတယ်။

အန်တိုနီဘလင်ကင်နဲ့ ဆွေးနွေးရာမှာ အမေရိကန်ရဲ့ ATACMS ကြည်းတပ် တာဝေးပစ်နည်းဗျူဟာ ဒုံးကျည်များကို ပေးအပ်ဖို့ကိစ္စလည်း ပါဝင်ခဲ့ပြီး အပြုသဘောဆောင်တဲ့ ဆုံးဖြတ်ချက်တစ်ခုခု ရရှိမယ်လို့ မျှော်လင့်ကြောင်း ယူကရိန်းနိုင်ငံခြားရေး၀န်ကြီးက ပြောပါတယ်။

အမေရိကန်နိုင်ငံခြားရေး၀န်ကြီးရဲ့ခရီးစဉ် ဒုတိယမြောက်နေ့မှာ ဖြစ်ပွားခဲ့တဲ့ ကိုစတန်ညင်နစ်ဗ်ကာ စျေးဝယ် စင်တာတိုက်ခိုက်မှုကို ရက်စက်ကြမ်းကြုတ်မှုအဖြစ် ဥရောပသမဂ္ဂက ရှုတ်ချခဲ့ပြီး နောက်ကွယ်မှ တာ၀န်ရှိသူများ ကို (အရေးယူဖို့) ထည့်သွင်းစဉ်းစားမယ်လို့ ဆိုပါတယ်။

အမေရိကန်ရဲ့အကူအညီများနဲ့ပတ်သက်ပြီး ရီပတ်ဘလီကန်ပါတီမှ သမ္မတလောင်းအများအပြားတို့က မေးခွန်း ထုတ်ခဲ့ကြပြီး ၂ဝ၂၄ ခုနှစ် ရွေးကောက်ပွဲမဲဆွယ်မှုများ ပြင်းထန်လာပါက ဝါရှင်တန်ရဲ့ယူကရိန်းအပေါ် ထောက်ပံ့မှု ကို ဆက်လက်ထိန်းသိမ်းဖို့အတွက် စိုးရိမ်မှုများ မြင့်တက်လာနေပါတယ်။

#ယူကရိန်တန်ပြန်ထိုးစစ် #အန်တိုနီဘလင်ကင် #ဘတ်ခ်မွတ် #ကိုစတန်ညင်နစ်ဗ်ကာမြို့ #ဒီမီထရီကလူဘာ

(Reuters., 7 September 2023,” Blinken hails Kyiv's pushback against Russia in visit clouded by attack” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)