မြူနစ် (NSS) - စက်တင်ဘာ ၇

ပြည်ထဲရေးဝန်ကြီးဌာနလက်အောက်ရှိ အထူးစုံစမ်းစစ်ဆေးရေးဦးစီးဌာန(စသုံးလုံး)၏ ညွှန်ချုပ်ရာထူးနေရာ အပြောင်းအလဲ ဖြစ်ပေါ်ခဲ့ကြောင်း မြန်မာနိုင်ငံပြန်တမ်းထုတ်ပြန်ချက်များအရ သိရသည်။

နစကသည် စသုံးလုံးညွှန်ကြားရေးမှူးချုပ် ဦးမောင်မောင်ကျော်အား လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနအောက်ရှိ ပြန်လည်ထူထောင်ရေးဦးစီးဌာနတွင် ညွှန်ကြားရေးမှူးချုပ်အဖြစ် ပြောင်းရွှေ့တာဝန်ပေးအပ်လိုက်သည်။

ထိုသို့လစ်လပ်ခဲ့သော စသုံးလုံးညွှန်ကြားရေးမှူးချုပ်၏နေရာတွင် ကာကွယ်ရေးဝန်ကြီးဌာနမှ ဦးအောင်ဇော်လင်းအား တာဝန်ပေးခန့်အပ်လိုက်ကြောင်း နစကမှ ကြေညာထားသည်။

ဈေးနှုန်းမြင့်တက်လျက်ရှိနေသော ဒေါ်လာဈေး၊ ရွှေဈေးတို့နှင့်ပတ်သက်၍ တည်ငြိမ်ကျဆင်းရေး ဆောင်ရွက်နိုင်မှုမရှိသည့်အပေါ် စသုံးလုံးညွှန်ချုပ် ဦးမောင်မောင်ကျော်အနေဖြင့် ပြောင်းရွှေ့တာဝန်ပေးခံရခြင်းဖြစ်နိုင်ကြောင်း စီးပွားရေးလုပ်ငန်းရှင်တစ်ဦးက NSS ကို သုံးသပ်ပြောကြားသည်။

" သူက စသုံးလုံးကိုရောက်တာ အနှစ်(၂၀)လောက်ရှိပြီ။ ဒုညွှန်နဲ့လားမသိဘူး စရောက်တယ်။ ရောက်ပြီးတော့ ဒေါ် လာ၊ ရွှေတို့ဘက်ကို ကိုင်ရတယ်။ သူက အဲဒီအဖွဲ့အစည်းတွေနဲ့ ရင်းနှီးတယ်။ အခု ဒေါ်လာဈေးတက်တဲ့ ကာလမှာ ဖမ်းတော့ဖမ်းတယ် သို့သော်လည်း ကောင်းကောင်းမွန်မွန်ထားပြီးတော့ ပြန်လွှတ်တဲ့အနေအထားကို တွေ့ရမှာပေါ့နော်။ အကုန်လုံးက ကြောက်ကိုမကြောက်တာ ရုံးသွားပြီးတော့ လက်မှတ်ထိုးတယ်။ ပြီးရင် ပြန်တယ်။ အဲဒီဇာတ် လမ်းကြီးဖြစ်နေတာပေါ့။ ဈေးကလည်း ကျမလာဘူးလေ။ အဲဒါတွေကြောင့်လို့တော့ နံပါတ်တစ်ထင်တယ်"ဟု စီးပွားရေးလုပ်ငန်းရှင်တစ်ဦးက ပြောသည်။

ထို့ပြင် ပြည်ထဲရေးဝန်ကြီးနေရာ အပြောင်းအလဲကြောင့် စသုံးလုံးညွှန်ကြားရေးမှူးချုပ် ဦးမောင်မောင်ကျော်အနေ ဖြင့် ပြောင်းရွှေ့ခံရခြင်းဖြစ်နိုင်ကြောင်းလည်း အထက်ပါစီးပွားရေးလုပ်ငန်းရှင်က ဆက်လက်သုံးသပ်ထားသည်။

" နံပါတ်(၂)ထင်တာကတော့ ပြည်ထောင်စုဝန်ကြီး ပြောင်းသွားတယ်လေ။ ပြည်ထောင်စုဝန်ကြီး ဦးရာပြည့် ဖြစ်လာတဲ့အခါမှာ ဘာပဲပြောပြော ပြောင်းလဲမှုတစ်ခုလုပ်ချင်တဲ့အနေနဲ့ တက်လာပြီဆိုတော့ ဒီဈေးတွေကို ကျအောင် ကိုင်ပြမယ်ဆိုတဲ့ သဘောလေးရှိမယ်ထင်တယ်။ ပြည်ထဲရေးဝန်ကြီးဟောင်း ဦးစိုးထွဋ်ကို ရွှေ့တဲ့အခါမှာ သူ့ကိုပါ ရွှေ့လိုက်တယ်လို့ထင်တယ်" ဟု ၎င်းက ဆက်လက်သုံးသပ်ထားသည်။

လက်ရှိတွင် စသုံးလုံးဌာနအနေဖြင့် စားသုံးဆီလုပ်ငန်းရှင်အချို့အပါအဝင် ကားရောင်းဝယ်မှုလုပ်ငန်းကိုင်နေသူအချို့ကို ခေါ်တွေ့မေးမြန်းစစ်ဆေးမှုများ ပြုလုပ်လျက်ရှိကြောင်း သတင်းများထွက်ပေါ်လျက်ရှိသည်။