ဂျန်ဇက် (NSS) - စက်တင်ဘာ ၆

အမေရိကန် နဲ့ တရုတ်နိုင်ငံတို့ဟာ ကမ္ဘာ့ရေးရာ အခက်အခဲပြဿနာများကို ဖြေရှင်းနိုင်အောင် ၎င်းတို့ရဲ့ ခေါင်းဆောင်မှုအရည်အသွေးကိုပြသဖို့ လိုအပ်နေပြီး နှစ်နိုင်ငံစလုံး စေ့စပ်ဆွေးနွေးဖို့အရေးကြီးနေတယ်လို့ စင်ကာပူဝန်ကြီးချုပ်လီရှန်လွန်းက ထုတ်ဖော်ပြောကြားလိုက်ပါတယ်။

စင်ကာပူဝန်ကြီးချုပ်က ကိုရီးယားကျွန်းဆွယ်အခြေအနေများနဲ့ပတ်သက်ပြီး စိုးရိမ်မှုမြင့်တက်ရကြောင်း၊ တင်းမာမှုတွေ မြင့်တက်စေဖို့ မြောက်ကိုရီးယားနိုင်ငံရဲ့ဒုံးကျည်စမ်းသပ်တာတွေကို ပြစ်တင်ရှုတ်ချကြောင်း ပြောပါတယ်။

အာဆီယံဒေသအတွင်း နိုင်ငံများအနေနဲ့ တရုတ်နဲ့ အမေရိကန်နိုင်ငံကြားဆက်ဆံရေး စိုးရိမ်ရတဲ့အခြေအနေများကို စောင့်ကြည့်နေကြောင်း စင်ကာပူဝန်ကြီးချုပ်က ပြောပါတယ်။ စင်ကာပူဝန်ကြီးချုပ်က "တင်းမာမှုတွေဟာ ဒေသအတွင်း လက်ရှိရှိနေတဲ့အခြေအနေတွကို ဆိုးလာနိုင်သလို ငြိမ်းချမ်းရေး၊ ဖွံ့ဖြိုးတိုးတက်ရေးနဲ့ တည်ငြိမ်တိုးတက်ရေးကို ထိခိုက်လာစေနိုင်တယ်။ အမေရိကန် နဲ့ တရုတ်နိုင်ငံကြားတင်းမာမှုတွေဖြစ်လာမှုတွေက အာဆီယံဒေသအတွင်းအပေါ် တိုက်ရိုက်အကျိုးစီးပွားရှိလာစေနိုင်တယ်" လို့ ပြောပါတယ်။

အာဆီယံထိပ်သီးအစည်းအဝေးကို တရုတ်သမ္မတကိုယ်စား တရုတ်ဝန်ကြီးချုပ်လီချန်း ဦးဆောင်တဲ့ ကိုယ်စားလှယ် အဖြစ်တက်ရောက်ခဲ့ပြီး အမေရိကန်သမ္မတကိုယ်စား ဒုတိယသမ္မတ ကာမာလာ ဟာရစ် ဦးဆောင်တဲ့ ကိုယ်စားလှယ်အဖွဲ့ တက်ရောက်ခဲ့ကြောင်း သိရပါတယ်။

တရုတ်ဝန်ကြီးချုပ်လီချန်းက "အာဆီယံ နဲ့ တရုတ်နိုင်ငံတို့ဟာ ငြိမ်းချမ်းရေးကို အတူတကွ ရှာဖွေမျှဝေနေတာပါ။ ခက်ခဲမှုတွေရှိပေမယ့် နားလည်မှုရှိအောင် လုပ်ဆောင်နေပါတယ်။ အာဆီယံနဲ့ တရုတ်နိုင်ငံတို့ဟာ ငြိမ်းချမ်းရေးနဲ့ ဖွံ့ဖြိုးတိုးတက်ရေးတို့အတွက် ပြင်းပြတဲ့ဆန္ဒရှိနေတဲ့နိုင်ငံတွေဖြစ်ပါတယ်" လို့ ပြောပါတယ်။

တရုတ် နဲ့ အမေရိကန်နိုင်ငံတို့ဟာ ထိုင်ဝမ်အရေး၊ တောင်တရုတ်ပင်လယ်အရေး၊ ကုန်သွယ်ရေးကိစ္စများနဲ့ ပတ်သက်ပြီး ပြီးခဲ့တဲ့နှစ်ပိုင်းမှာ နှစ်နိုင်ငံကြားဆက်ဆံရေးအဖုအထစ်များရှိခဲ့ကာ တင်းမာမှုတွေရှိခဲ့ကြောင်း သိရပါတယ်။ တရုတ်နိုင်ငံဟာ အာဆီယံဒေသအတွင်းနိုင်ငံအချို့နဲ့ တောင်တရုတ်ပင်လယ်မှာ ပိုင်နယ်နယ်မြေ အငြင်းပွားမှုများရှိနေခဲ့ပြီး မကြာသေးမီက ထုတ်ပြန်ခဲ့တဲ့ တရုတ်နိုင်ငံရဲ့မြေပုံအသစ်ဟာ အာဆီယံဒေသအတွင်း နိုင်ငံအချို့ကို စိတ်ဆိုးဒေါသဖြစ်စေခဲ့ကြောင်း သိရပါတယ်။

စင်ကာပူဝန်ကြီးချုပ်က အာဆီယံ နဲ့ တရုတ်နိုင်ငံတို့ဟာ တောင်တရုတ်ပင်လယ်အတွင်းပိုင်နက်အငြင်းပွားမှုတွေကို ၁၉၈၂ ခုနှစ်က သတ်မှတ်ခဲ့တဲ့ကုလသမဂ္ဂရဲ့နိုင်ငံတကာပင်လယ်ရေကြောင်းဥပဒေများ၊ Code of Conduct နဲ့အညီ ဖြေရှင်းစေလိုကြောင်း တိုက်တွန်းတောင်းဆိုခဲ့ပါတယ်။