UEC ၏ မဲပေးစက်ကို သဘောကျသော်လည်း မှားယွင်းမှုတစ်ခုခုဖြစ်ပါက မည်သူတာဝန်ယူမည်လဲဟု အမျိုးသားနိုင်ငံရေးဒီမိုကရက်တစ်ပါတီဥက္ကဋ္ဌ မေးခွန်းထုတ်
မြူနစ် (NSS) - စက်တင်ဘာ ၆
UEC က တီထွင်ထားသည့် မဲပေးစက်ကို သဘောကျသော်လည်း မှားယွင်းမှုတစ်ခုခုဖြစ်ပါက မည်သူတာဝန်ယူမည်လဲဟု အမျိုးသားနိုင်ငံရေးဒီမိုကရက်တစ်ပါတီဥက္ကဋ္ဌက မေးခွန်းထုတ်ထားသည်။
အမျိုးသားနိုင်ငံရေးဒီမိုကရက်တစ်ပါတီဥက္ကဋ္ဌဦးစိုးမောင်က ယမန်နေ့ (စက်တင်ဘာလ ၅ ရက်)တွင် ရန်ကုန်တိုင်းအစိုးရအဖွဲ့ရုံး၌ ကျင်းပခဲ့သော မြန်မာအီလက်ထရွန်နစ်မဲပေးစက်နှင့်ပတ်သက်၍ သရုပ်ပြရှင်းလင်းပွဲအခမ်းအနားတွင် အထက်ပါကဲ့သို့ မေးခွန်းထုတ်ခဲ့ခြင်းဖြစ်သည်။
နစက၏ ပြည်ထောင်စုရွေးကောက်ပွဲကော်မရှင်က မှတ်ပုံတင်ခွင့်ပြုခဲ့ပြီးဖြစ်သော နိုင်ငံရေးပါတီ(၃၆)ပါတီမှ တာဝန်ရှိသူများကို ဖိတ်ကြားကာ ၎င်းတို့တီထွင်ထားသော မြန်မာအီလက်ထရွန်နစ်မဲပေးစက်နှင့်ပတ်သက်၍ သရုပ်ပြရှင်းလင်းခဲ့သည်။
၎င်းမဲပေးစက်နှင့်ပတ်သက်၍ စမ်းသပ်အသုံးပြုရာတွင် လုံလောက်သော အချိန်မရရှိခဲ့ကြောင်း အမျိုးသားနိုင်ငံရေးဒီမိုကရက်တစ်ပါတီဥက္ကဋ္ဌဦးစိုးမောင်က ကော်မရှင်မှ တာဝန်ရှိသူများကို အသိပေးပြောကြားခဲ့သည်။
“ဒို့ရဲ့ နည်းပညာရှင်တွေကို အထင်သေးလို့မဟုတ်ဘူး။ တီထွင်တဲ့သူတွေကို သဘောကျတယ်။ လက်ခံတယ်။ ဒါပေမယ့် တာဝန်ယူရမယ်။ မှားယွင်းသွားရင် တစ်ခုခုဖြစ်ရင် ဘယ်သူတာဝန်ယူမှာလဲ။ ပါတီတွေ ဘဝင်ကျအောင်လုပ်ပေးရမယ်”ဟု ဦးစိုးမောင်က ပြောသည်။
မြန်မာအီလက်ထရွန်နစ်မဲပေးစက် တီထွင်မှုအပေါ် သဘောကျသော်လည်း မဲပေးစက်နှင့်ပတ်သက်၍ သရုပ်ပြရှင်းလင်းပြသမှု လုပ်နည်းလုပ်ဟန်ကို သဘောမတူကြောင်းနှင့် နိုင်ငံရေးပါတီများအားလုံး ကျေနပ်မှုရှိရန်လိုအပ်ကြောင်း ၎င်းက ဆက်လက်အကြံပြုခဲ့သည်။
ထို့ပြင် UEC အနေဖြင့် ပြီးခဲ့သည့် ၂၀၂၂ ခုနှစ်အတွင်း နိုင်ငံရေးပါတီများနှင့် တစ်ကြိမ်တစ်ခါမျှ တွေ့ဆုံအစည်းအဝေးထိုင်ခြင်းမရှိခဲ့ကြောင်းနှင့် ပါတီများကို လူရာသွင်းရန်လိုကြောင်း အမျိုးသားနိုင်ငံရေးဒီမိုကရက်တစ်ပါတီဥက္ကဋ္ဌက ပြောသည်။
“ပြီးရင် ပါတီတွေနဲ့ တစ်နှစ်ကို (၃)လတစ်ကြိမ်၊ (၄)လတစ်ကြိမ် အစည်းအဝေးထိုင်မယ်လို့ ပြောတယ်။ အထူးသဖြင့် ၂၀၂၂ မှာ တစ်ကြိမ်မှ အစည်းအဝေးမထိုင်ဘူး။ ဘာလုပ်နေတာလဲ။ ပြောမှာပေါ့ အလုပ်ရှုပ်နေလို့။ အလုပ်ရှပ်တာတော့ မောင်ရင်တို့မှ မဟုတ်ဘူး ဒို့လည်း အလုပ်ရှုပ်တာပဲ။ ဒို့က နိုင်ငံတော်အတွက် လုပ်နေတဲ့ပါတီတွေ လူရာသွင်းဖို့တော့ လိုတယ်။ ဘယ်နှစ်ခါ ခေါ်တွေ့လဲ။ ပြောလိုက်ပါ” ဟု ဦးစိုးမောင်က ထပ်မံပြောသည်။
အလားတူ ရခိုင့်ဦးဆောင်ပါတီဥက္ကဋ္ဌဒေါက်တာအေးမောင်ကလည်း မြန်မာအီလက်ထရွန်နစ်မဲပေးစက်သည် ယုံကြည်ရလောက်သည့်အနေအထားရှိသော်လည်း စက်နှင့်ပတ်သက်၍ ပြည်သူလူထုအား အသိပညာထိထိရောက်ရောက်ပေးရန် လိုအပ်ကြောင်းလည်း အကြံပြုပြောကြားခဲ့သည်။
မြန်မာပညာရှင်များဖြင့် တီထွင်ထားသော မဲပေးစက်သည် လက်ရှိတွင် ဝန်ကြီးဌာန(၂၁)ခု၌ ဝန်ထမ်းပေါင်း(၆၀၀၀) ကျော်ဖြင့် လက်တွေ့စမ်းသပ်မဲပေးခြင်းဆောင်ရွက်ခဲ့ရာတွင် တစ်ကြိမ်တစ်ခါမျှ မှားယွင်းခြင်းမျိုးမရှိခဲ့ကြောင်းလည်း UEC ဘက်က ပြောကြားထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
အကောက်ခွန်ဦးစီးဌာနတွင် လစ်လပ်လျက်ရှိသော ဝန်ထမ်းနေရာ(၁၄၀)နီးပါအတွက် အလုပ်ခေါ်ယူနေ
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း