Pika (NSS) - စက်တင်ဘာ ၅ 

ရုရှားသည် မြောက်ကိုရီးယားနှင့် ပူးတွဲစစ်ရေးလေ့ကျင့်မှုများ လုပ်ဆောင်ရန်အတွက် ဆွေးနွေးနေကြောင်း ရုရှားကာကွယ်ရေးဝန်ကြီးဆာဂေးရှိုဂူက စက်တင်ဘာလ(၄)ရက်တွင် ထုတ်ဖော်ပြောခဲ့သည်။

မြောက်ကိုရီးယား နှင့် ရုရှားနိုင်ငံကြား စစ်ရေးအရ ဆက်ဆံရေးများ ပိုမိုတိုးမြှင့်လာမည်ကို စိုးရိမ်မိကြောင်း အမေရိကန်ဖက်က ထုတ်ဖော်ပြောဆိုခဲ့ပြီးနောက် ဆာဂေးရှိုဂူက ယခုကဲ့သို့ ထုတ်ပြန်ပြောဆိုခဲ့ခြင်းဖြစ်သည်။ 

ရုရှားကာကွယ်ရေးဝန်ကြီး ဆာဂေးရှိုဂူ က "ပူးတွဲစစ်ရေးလေ့ကျင့်မှုတွေကို လုပ်ဆောင်သွားမှာပါ။ မြောက်ကိုရီးယားက ကျွန်တော်တို့ အိမ်နီးချင်းနိုင်ငံပါပဲ။ အိမ်နီးချင်းနိုင်ငံတွေနဲ့ ငြိမ်းချမ်းစွာနေထိုင်တာမျိုးက ပိုကောင်းပါတယ်" ဟု ပြောခဲ့သည်။ 

ထို့အပြင် နှစ်နိုင်ငံကြား ပူးတွဲစစ်ရေးလေ့ကျင့်မှုများ လုပ်ဆောင်ရန်အတွက် ဆွေးနွေးမှုများကိုလည်း ဆက်လက် လုပ်ဆောင်နေကြောင်း ၎င်းက ထပ်မံပြောကြားခဲ့သည်။ ရုရှား၊ တရုတ် နှင့် မြောက်ကိုရီးယားနိုင်ငံတို့သည် ရေတပ်ချင်း ပူးတွဲစစ်ရေးလေ့ကျင့်မှုများကို လုပ်ဆောင်သင့်သည်ဟု မြောက်ကိုရီးယားခေါင်းဆောင်ကင်ဂျုံအန်းကို ရုရှားကာကွယ်ရေးဝန်ကြီး ဆာဂေးရှိုဂူက အဆိုပြုပြောကြားခဲ့ကြောင်း တောင်ကိုရီးယားထောက်လှမ်းရေး အေဂျင်စီများက ပြောကြားခဲ့သည်။

ဆာဂေးရှိုဂူသည် ပြီးခဲ့သည့်ဇူလိုင်လက မြောက်ကိုရီးယားနိုင်ငံတွင် ကျင်းပခဲ့သော ကိုရီးယားစစ်ပွဲပြီးဆုံးခြင်း နှစ်(၇ဝ)ပြည့်မြောက် နှစ်ပတ်လည်နေ့တွင်  မြောက်ကိုရီးယားခေါင်းဆောင်ကင်ဂျုံအန်း နှင့် တွေ့ဆုံခဲ့ခြင်းဖြစ်ကြောင်း သိရသည်။ 

မကြာသေးမီကာလအတွင်း ရုရှား နှင့် မြောက်ကိုရီးယားတို့သည် နှစ်နိုင်ငံကြား စစ်ရေးအရဆက်ဆံမှုများကို ပိုမို နီးကပ်စွာ လုပ်ဆောင်ရန် သဘောတူညီခဲ့သော်လည်း ရုရှားနိုင်ငံနှင့် လက်နက်ဆိုင်ရာသဘောတူညီချက်များ သဘောတူထားခြင်းမျိုးမရှိကြောင်း မြောက်ကိုရီးယားဖက်က ပြောထားသည်။

မကြာသေးမီက အမေရိကန်သည် မြောက်ကိုရီးယား နှင့် ရုရှားတို့ကြား လက်နက်ဆိုင်ရာ သဘောတူညီချက်များ ရှိသည်ဟု စွပ်စွဲခံထားရသော အဖွဲ့အစည်းသုံးခုအပေါ်  ပိတ်ဆို့အရေးယူမှုများ ချမှတ်ခဲ့ကြောင်း သိရသည်။ မြောက်ကိုရီးယား နှင့် ရုရှားနိုင်ငံကြား လက်နက်ဆိုင်ရာဆွေးနွေးမှုများ ပြန်လည်အရှိန်မြင့်လာမည်ကို စိုးရိမ်မိကြောင်း အမေရိကန်အစိုးရက ပြီးခဲ့သည့်သီတင်းပတ်တွင် ထုတ်ပြန်ထားသည်။ ထို့အပြင် မြောက်ကိုရီးယား ခေါင်းဆောင် ကင်ဂျုံအန်းသည် ရုရှားသမ္မတပူတင် နှင့် ယခုလအတွင်း တွေ့ဆုံနိုင်ရန် မျှော်လင့်နေပြီး နှစ်နိုင်ငံကြား လက်နက်ဆိုင်ရာသဘောတူညီချက်များကို ဆက်လက်ဆွေးနွေးသွားနိုင်ဖွယ်ရှိနေသည်ဟု အမေရိကန်အစိုးရက စက်တင်ဘာလ(၄)ရက်တွင် ဝေဖန်ခဲ့သည်။