မျိုးကြီး (NSS) - စက်တင်ဘာ ၅

ပြည်လုံးကျွတ်ဆန္ဒခံယူပွဲများ ကျင်းပရန်လိုအပ်လာပါက အသုံးပြုနိုင်မည့် မြန်မာအီလက်ထရွန်နစ်မဲပေးစက်ကို UEC က နိုင်ငံရေးပါတီများအား ရှင်းလင်းပြသခဲ့သည်။

ပြည်ထောင်စုရွေးကောက်ပွဲကော်မရှင်(UEC)က ယနေ့(စက်တင်ဘာလ ၅ ရက်)တွင် ရန်ကုန်မြို့ရှိ အစိုးရအဖွဲ့ရုံး၌ နိုင်ငံရေးပါတီ(၃၆)ပါတီကို ဖိတ်ကြားကာ မဲပေးစက်နှင့်ပတ်သက်၍ လက်တွေ့စမ်းသပ်ရှင်းလင်းပြသခဲ့သည်။

မြန်မာအီလက်ထရွန်နစ်မဲပေးစက်ကို လက်ရှိ နစက၏ ရွေးကောက်ပွဲကော်မရှင်က တီထွင်ဖန်တီးထားခြင်းဖြစ်ပြီး လာမည့် ရွေးကောက်ပွဲတွင် ယင်းမဲပေးစက်ကို အသုံးပြုကာ ကျင်းပသွားမည်ဖြစ်ကြောင်း သိရသည်။

ထို့ပြင် အကြောင်းအမျိုးမျိုးကြောင့် ပေါ်ပေါက်လာနိုင်သော ကြားဖြတ်ရွေးကောက်ပွဲများတွင်လည်း မဲလက်မှတ်ရိုက်စရာမလိုသည့် မြန်မာအီလက်ထရွန်နစ်မဲပေးစက်ကိုလည်း အသုံးပြုနိုင်ကြောင်း ကော်မရှင်က ရှင်းလင်းပြောကြားခဲ့သည်။

“နောက်တစ်ခုက ဥပဒေပြုလွှတ်တော်တွေ ပေါ်ပေါက်လာပြီ။ ပေါ်ပေါက်လာတဲ့အခါကြရင် ဥပဒေပြုလွှတ်တော်ကိုယ်စားလှယ်တွေကနေပြီးတော့မှ ဖွဲ့စည်းပုံအခြေခံဥပဒေပြင်ဆင်ဖို့ ကိစ္စတွေရှိလာပြီ။ ပြင်ဆင်မယ်၊ ဆွေးနွေးမယ်၊ ဆုံးဖြတ်မယ်၊ အတည်ပြုလိုက်တယ်။ အတည်ပြုလိုက်တဲ့အခါမှာ အဲဒီပုဒ်မတွေသည် ပြည်လုံးကျွတ်ဆန္ဒခံယူပွဲလုပ်ဖို့ လိုအပ်လာရင်ဆိုတဲ့အခါကြရင် ကျွန်တော်တို့သည် မဲလက်မှတ်ရိုက်စရာမလိုပါဘူး။ တစ်နိုင်ငံလုံးမှာ ဒီစက်ကို အသုံးပြုပြီးတော့မှ ဆန္ဒခံယူပွဲ လုပ်လို့ရပါတယ်” ဟု ရွေးကောက်ပွဲကော်မရှင်မှ ဒုတိယညွှန်ကြားရေးမှူး ဦးညီညီလွင်က ပြောသည်။

အလားတူ ရွေးကောက်ပွဲကော်မရှင်က တီထွင်ထားသော မဲပေးစက်သည် စည်ပင်ရွေးကောက်ပွဲများတွင်လည်း အသုံး ပြုနိုင်သည့်အပြင် မည်သည့်ရွေးချယ်တင်မြှောက်မှုလုပ်ငန်းများတွင်မဆို အသုံးပြုနိုင်ကြောင်းလည်း ဦးညီညီလွင်က ဆက်လက်ပြောသည်။

ကော်မရှင်ဘက်က တီထွင်ထားသည့် မြန်မာအီလက်ထရွန်နစ်မဲပေးစက်သည် ယုံကြည်ရလောက်သည့်အနေအထားရှိကြောင်း ရခိုင့်ဦးဆောင်ပါတီ(AFP)ဥက္ကဋ္ဌ ဒေါက်တာအေးမောင်က မှတ်ချက်ပြုထားသည်။

“ကျွန်တော် ထင်တယ်။ ယုံကြည်နိုင်လောက်တဲ့ အနေအထားရှိနိုင်တယ်။ ခလုတ်ကလေးနှိပ်တာနဲ့ အဖြေက ပရင့်ထုတ်ပြီး တစ်ခါတည်းထွက်လာတယ်။ မဲဆန္ဒနယ်နဲ့ပတ်သက်လို့ တိုင်ကြတောကြတယ် ဆိုတဲ့အခါမှာ စက်ကြီးမှာရှိတဲ့ ပရင့်ထုတ်ထားတဲ့ မဲပေးထားတဲ့ဟာကို ပြန်ရေလို့ရတာကို။ ဒါကြီးက အမှားမရှိနိုင်ဘူး။ လူ(၁၀၀)မဲပေးရင် (၁၀၀)သော မဲသည်ထွက်နေမှာ။ ဒါပေမယ့် မိမိဆန္ဒမှာ ပန်းသီးပါတီကို ရည်မှန်းထားပေမယ့်လို့ ခလုတ်မှားပြီးတော့ ငရုပ်ပွသီးပါတီကို နှိပ်မိရင် ငရုပ်ပွသီးပဲရသွားမှာ။ အဲဒီတစ်ခုကို ဘယ်လိုရှင်းမှာလဲပေါ့”ဟု  ဒေါက်တာအေးမောင်က ပြောသည်။

သို့သော် အစိုးရတာဝန်ရှိသူများ၊ ဌာနဆိုင်ရာများအနေဖြင့် မဲပေးစက်နှင့်ပတ်သက်၍ ပြည်သူလူထုအကြား အသိ ပညာကို ထိထိရောက်ရောက်ပေးရန် လိုအပ်ကြောင်းလည်း ၎င်းက အကြံပြုတိုက်တွန်းထားသည်။

မြန်မာအီလက်ထရွန်နစ်မဲပေးစက်ကို အသုံးပြုမဲပေးရာတွင် တစ်နာရီအတွင်း မဲဆန္ဒရှင်(၂၀၀)ခန့် မဲပေးနိုင်ကြောင်း သိရပြီး မဲရလဒ်များကိုလည်း အချိန်အတိုအတွင်း ကြေညာနိုင်ကြောင်း ကော်မရှင်ဘက်က အသိပေးထားသည်။

ယနေ့ ရန်ကုန်တိုင်းအစိုးရအဖွဲ့ရုံး၌ကျင်းပသည့် မဲပေးစက်ရှင်းလင်းပွဲတွင် ရွေးကောက်ပွဲကော်မရှင်ဥက္ကဋ္ဌဦးသိန်းစိုးအား မီဒီယာများက ရွေးကောက်ပွဲကျင်းပနိုင်မည့်အချိန်ကို မေးမြန်းခဲ့သော်လည်း ပြန်လည်ဖြေကြားခြင်း မရှိခဲ့ပေ။