ဂျန်ဇက် (NSS) - စက်တင်ဘာ ၅ 

အာဆီယံအဖွဲ့ခေါင်းဆောင်များဟာ မြန်မာနိုင်ငံကို ၂ဝ၂၆ ခုနှစ်မှာ အာဆီယံအလှည့်ကျဥက္ကဋ္ဌအဖြစ် တာဝန်ယူခွင့်မပြုဖို့ ဆုံးဖြတ်လိုက်ကြောင်း၊ အာရှရေးရာသံတမန်တစ်ဦး နဲ့ အာဆီယံဒေသအတွင်း ခေါင်းဆောင်တစ်ဦး က ပြောပါတယ်။ 

အာဆီယံအဖွဲ့ရဲ့ကြိုတင်အစီအစဉ်များထဲမှာ မြန်မာနိုင်ငံဟာ ၂ဝ၂၆ ခုနှစ်မှာ အာဆီယံအလှည့်ကျ ဥက္ကဋ္ဌ အဖြစ် တာဝန်ယူရမှာဖြစ်ပေမယ့် မြန်မာနိုင်ငံရဲ့လက်ရှိအခြေအနေများကြောင့် အခုလိုမျိုး ဆုံးဖြတ်ခဲ့ရတာမျိုးဖြစ်တယ် လို့ ဆိုပါတယ်။ ဖိလစ်ပိုင်နိုင်ငံဟာ ၂ဝ၂၆ ခုနှစ်မှာ မြန်မာနိုင်ငံအစား အာဆီယံအလှည့်ကျဥက္ကဋ္ဌအဖြစ် တာဝန်ယူဖို့ သဘောတူညီခဲ့ကြောင်း သိရပါတယ်။ 

ဖိလစ်ပိုင်သမ္မတ ဖာဒီနန်မာကိုစ့်ဂျူနီယာက ၎င်းတို့နိုင်ငံအနေနဲ့ ၂ဝ၂၆ ခုနှစ်မှာ အာဆီယံအလှည့်ကျ ဥက္ကဋ္ဌအဖြစ် တာဝန်ယူဖို့ အဆင့်သင့်ရှိနေတယ်လို့ ထုတ်ဖော်ပြောဆိုခဲ့ပါတယ်။ 

ဖိလစ်ပိုင်သမ္မတက "၂ဝ၂၆ ခုနှစ်မှာ ဖိလစ်ပိုင်နိုင်ငံက အာဆီယံအလှည့်ကျဥက္ကဋ္ဌ တာဝန်ကို ရယူဖို့ အဆင်သင့် ရှိနေတယ်လို့ သတင်းထုတ်ပြန်လိုက်ရတာဟာ ပျော်ရွှင်စရာကောင်းပါတယ်။ ကျွန်တော်တို့ဟာ အာဆီယံအသိုက် အဝန်းတည်ဆောက်မှု ဖောင်ဒေးရှင်းခိုင်မာအောင် လုပ်ဆောင်သွားဖွယ်ရှိနေပါတယ်"  လို့ ပြောပါတယ်။

အာဆီယံသံတမန်နှစ်ဦးက မြန်မာနိုင်ငံရဲ့လက်ရှိနိုင်ငံရေးအခြေအနေများအပြင် အမေရိကန်၊ ဥရောပသမဂ္ဂအပြင် အခြားနိုင်ငံတွေနဲ့ အာဆီယံအဖွဲ့ရဲ့ဆက်ဆံရေးများကြောင့် မြန်မာနိုင်ငံကို ၂ဝ၂၆ ခုနှစ်မှာ အာဆီယံအလှည့်ကျဥက္ကဋ္ဌအဖြစ် တာဝန်ယူခွင့်မပေးဖို့ ဆုံးဖြတ်ခဲ့တာမျိုးဖြစ်တယ်လို့ ဆိုပါတယ်။

အမေရိကန်၊ ဥရောပသမဂ္ဂ နဲ့ အာဆီယံမိတ်ဖက်နိုင်ငံအချို့ဟာ နစကကို အစိုးရအဖြစ် အသိအမှတ်ပြုထားခြင်း မျိုးမရှိကြောင်း အာဆီယံသံတမန်တစ်ဦးက ပြောပါတယ်။ အင်ဒိုနီးရှားနိုင်ငံက အိမ်ရှင်အဖြစ် လက်ခံကျင်းပနေတဲ့ အာဆီယံထိပ်သီးအစည်းအဝေးကို မြန်မာကိုယ်စားပြုအဖြစ် တက်ရောက်တဲ့ ကိုယ်စားလှယ်မရှိဘဲ မြန်မာထိုင်ခုံ အလွတ်ထားပြီး မြန်မာအရေးနဲ့ပတ်သက်ပြီး ဆုံးဖြတ်နေတာမျိုးလည်းဖြစ်ပါတယ်။