Pika (NSS) - စက်တင်ဘာ ၄

အစ္စရေးဝန်ကြီးချုပ်နေတန်ရာဟုသည် နိုင်ငံအတွင်းသို့ ရွှေ့ပြောင်းနေထိုင်သူများ ဝင်ရောက်လာမှုကို တားဆီးရန် အတွက် ဂျော်ဒန်နိုင်ငံ နှင့် နယ်နိမိတ်ချင်းထိစပ်နေသော အရှေ့ဘက်နယ်စပ်တစ်လျှောက်တွင်  တံတိုင်းတစ်ခုတည်ဆောက်ရန် ကတိပြုခဲ့ကြောင်း သိရသည်။ 

အာဖရိကတိုက်မှ ခိုလှုံခွင့်တောင်းခံသူများ အစ္စရေးနိုင်ငံသို့ ဝင်ရောက်လာခြင်းနှင့်ပတ်သက်ပြီး တင်းမာမှုများ မြင့်တက်နေချိန်တွင် နေတန်ရာဟုက ယခုကဲ့သို့ ထုတ်ဖော်ပြောခဲ့ခြင်းဖြစ်သည်။

၎င်းက "ကျွန်တော်တို့ရဲ့တောင်ပိုင်းနယ်စပ်မှာ တံတိုင်းတွေဆောက်ခဲ့ပြီး နိုင်ငံအတွင်းကို ရွှေ့ပြောင်းနေထိုင်သူတွေ ဝင်ရောက်လာတာကို ရပ်တန့်နိုင်ခဲ့ပါတယ်။ ပြီးတော့ ကျွန်တော်တို့နိုင်ငံကို ပျက်စီးစေမယ့် အာဖရိကတိုက်က ကျူးကျော်ဝင်ရောက်သူ တစ်သန်းခန့်ကိုလည်း တားမြစ်နိုင်ခဲ့ပါတယ်။ အခုတော့ ဂျော်ဒန်နိုင်ငံ နယ်နိမိတ်နဲ့ ထိစပ်နေတဲ့ အရှေ့ဘက်နယ်စပ်တစ်လျှောက်မှာ တံတိုင်းတစ်ခုတည်ဆောက်ပြီး ကျူးကျော်ဝင်ရောက်သူတွေ မရှိ အောင် လုပ်သွားမှာပါ" ဟု ပြောခဲ့သည်။ 

Eritrea နိုင်ငံမှ ရွှေ့ပြောင်းနေထိုင်သူများ ပါဝင်သည့် အဓိကရုဏ်းတစ်ခုကို တုံ့ပြန်ရန်အတွက် အစ္စရေးအစိုးရ အဖွဲ့ဝင် ဝန်ကြီးများ အထူးအစည်းအဝေးကို Tel Aviv မြို့တွင် ကျင်းပပြီးနောက် နေတန်ရာဟုက ယခုကဲ့သို့ ထုတ်ဖော်ပြောခဲ့ခြင်းဖြစ်သည်။ ယခုသီတင်းပတ်အကုန်တွင် ဖြစ်ပွားခဲ့သောအကြမ်းဖက်မှုတွင် ပါဝင်ပတ်သက် သည့် နိုင်ငံခြားသားများ နှင့် အာဖရိကမှ ရွှေ့ပြောင်းနေထိုင်သူများကို ပြည်နှင်ဒဏ်ပေးမည့် အစီအစဉ်အသစ်များ ကိုလုပ်ဆောင်ရန် အစိုးရအဖွဲ့ဝင်ဝန်ကြီးများကို နေတန်ရာဟုက ညွှန်ကြားခဲ့ကြောင်း သိရသည်။ 

နေတန်ရာဟု က "ကျွန်တော်တို့နိုင်ငံရဲ့နယ်စပ်တွေကို ကာကွယ်သွားမှာပါ။ ကျွန်တော်တို့နိုင်ငံကို ကာကွယ်သွား မှာပါ" ဟု ပြောခဲ့သည်။ စက်တင်ဘာလ(၂)ရက်က Tel Aviv မြို့တွင်ဖြစ်ပွားခဲ့သော အကြမ်းဖက်မှုတွင် ပါဝင်ခဲ့ သည့် Eritrea နိုင်ငံမှ ရွှေ့ပြောင်းနေထိုင်သူများအတွက် ပြင်းထန်သောအစီအစဉ်များ လုပ်ဆောင်ရန် နေတန်ရာဟုက ညွှန်ကြားခဲ့ကြောင်းလည်း သိရသည်။

အဆိုပါအကြမ်းဖက်မှုအတွင်း ဆူပူအုံကြွသူများသည် ဆောက်လုပ်ရေးသုံးပစ္စည်းများဖြင့် ဆိုင်များ၏ ပြတင်းပေါက် များကို ဖျက်ဆီးခြင်း နှင့် ကားများကို ဖျက်ဆီးခြင်းတို့လုပ်ဆောင်ခဲ့ပြီး ရဲတပ်ဖွဲ့ဝင် ဒါဇင်ချီ ထိခိုက်ဒဏ်ရာ ရရှိခဲ့ သလို အခြားလူပေါင်း(၁၅ဝ)ကျော်လည်း ထိခိုက်ဒဏ်ရာရရှိခဲ့ကြောင်း သိရသည်။