မျိုးကြီး (NSS) - စက်တင်ဘာ ၄

လက်နက်ဥပဒေ၊ အကြမ်းဖက်မှုတိုက်ဖျက်ရေးဥပဒေများအပါအဝင် ဥပဒေပေါင်း (၁၅၆)ခုကို လက်ရှိ နစကလက်ထက်၌ ပြဋ္ဌာန်းအတည်ပြုထားကြောင်း သတင်းရရှိသည်။

ဗိုလ်ချုပ်မှူးကြီးမင်းအောင်လှိုင်သည့် နစကအစိုးရလက်ထက် ၂၀၂၁ ခုနှစ်အတွင်း ဥပဒေ (၆၃)ခု၊ ၂၀၂၂ ခုနှစ်အတွင်း၌ ဥပဒေပေါင်း (၄၀)နှင့် ယခု ၂၀၂၃ ခုနှစ် ဇွန်လ ၃၀ ရက်အထိ ဥပဒေ (၅၃)ခုကို ပြဋ္ဌာန်းခဲ့ကြောင်း ဥပဒေရေးရာဝန်ကြီးဌာနထံမှသိရသည်။

ထို့ကြောင့် လက်ရှိ နစကအစိုးရလက်ထက်အတွင်း၌ ဥပဒေစုစုပေါင်း (၁၅၆)ခုကို ပြဋ္ဌာန်းခဲ့ပြီးဖြစ်ကြောင်း ဥပဒေရေးရာဝန်ကြီးဌာနက အသိပေးထားသည်။

နစကအစိုးရလက်ထက် ပြဋ္ဌာန်းခဲ့သော ဥပဒေများ၌ အချို့သော ဥပဒေများကို အသစ်ပြန်လည်ရေးဆွဲပြဋ္ဌာန်းခြင်းနှင့် အစားထိုးပြင်ဆင်ခြင်းများကို ပြုလုပ်ခဲ့ကြောင်း တွေ့ရှိရသည်။

လက်နက်ဥပဒေ၊ အကြမ်းဖက်မှုတိုက်ဖျက်ရေးဥပဒေ၊ နည်းဥပဒေများ၊ နိုင်ငံ့ဝန်ထမ်းဥပဒေ၊ နိုင်ငံရေးပါတီများမှတ်ပုံ တင်ခြင်းဥပဒေအပါအဝင် အခြားသောဥပဒေများကို လက်ရှိ နစကအစိုးရလက်ထက်တွင် ပြဋ္ဌာန်းခဲ့သည်။

လက်နက်သယ်ယူခွင့်၊ လက်နက်ကိုင်ဆောင်ခွင့်၊ တရားဝင် လက်ဝယ်ထားရှိခွင့်တို့နှင့်စပ်လျဉ်း၍ ဥပဒေနှင့်အညီ ထိန်းချုပ်ကြပ်မတ်နိုင်ရန်၊ တရားမဝင်လက်နက်ကိုင်ဆောင်ခြင်းကို တားဆီးကာကွယ်ရန်၊ နိုင်ငံတော်ပိုင်လက်နက်နှင့် ဥပဒေအရ ကိုင်ဆောင်ခွင့်ရှိသူပိုင် သေနတ်နှင့်ခဲယမ်းများကို ခိုးယူခြင်း၊ ရောင်းချခြင်း၊ ဖျက်ဆီးခြင်း၊ ပျက်စီးစေ ခြင်းနှင့် ကိုင်ဆောင်ခွင့် မရှိသူတို့အား ပေးအပ်ခြင်းတို့ကို တားဆီးကာကွယ်ရန် ရည်ရွယ်ချက်များဖြင့် လက်နက်ဥပဒေကို ပြဋ္ဌာန်းခြင်းဖြစ်ကြောင်း သိရသည်။

ထို့ပြင် နိုင်ငံတော်အတွင်း လက်နက်သယ်ယူခွင့် သို့မဟုတ် လက်နက်ကိုင်ဆောင်ခွင့်ရရှိရန် လိုင်စင် (သို့မဟုတ်) ခွင့်ပြုမိန့်လျှောက်ထားခြင်းများကို သတ်မှတ်ချက်များနှင့်အညီ လျှောက်ထားနိုင်ကြောင်း ဥပဒေ၌ ထည့်သွင်း ပြဋ္ဌာန်းထားသည်ကို တွေ့ရှိရသည်။

လက်နက်ကို ပြည်ပမှ ဝယ်ယူခွင့်၊ တင်သွင်းခွင့်၊ သယ်ယူခွင့် (သို့မဟုတ်) ကိုင်ဆောင်ခွင့်အတွက်ဖြစ်စေ၊ ပြည်ပသို့ ရောင်းချခွင့်၊ တင်ပို့ခွင့်၊ သယ်ယူခွင့် သို့မဟုတ် ကိုင်ဆောင်ခွင့်အတွက်ဖြစ်စေ ဥပဒေအရ လျှောက်ထားနိုင်ကြောင်း သိရသည်။

လက်ရှိတွင် နစကအစိုးရအနေဖြင့် ရွေးကောက်ပွဲဥပဒေ၊ ဆန်စပါးဥပဒေအပြင် သက်ဆိုင်ရာကဏ္ဍအလိုက် လိုအပ်သော ဥပဒေများကို အတည်ပြုပြဋ္ဌာန်းနိုင်ရေး ရေးဆွဲလျက်ရှိကြောင်း သိရသည်။