NCA သည် သမိုင်းဝင်စာချုပ်ဖြစ်ပြီး မည်သည့်အချိန်မှ ပျက်ပြယ်မှုမရှိဘဲ တည်ရှိနေမည့်စာချုပ်ဟု ဗိုလ်ချုပ်မှူးကြီးပြော
မျိုးကြီး (NSS) - စက်တင်ဘာ ၂
NCA သည် သမိုင်းဝင်စာချုပ်ဖြစ်ပြီး မည်သည့်အချိန်မှ ပျက်ပြယ်မှုမရှိဘဲ တည်ရှိနေမည့်စာချုပ်ဖြစ်ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။
၎င်းက ယမန်နေ့ (စက်တင်ဘာလ ၁ ရက်)တွင် နေပြည်တော်၌ပြုလုပ်သော နစကအဖွဲ့အ စည်းအဝေးတွင် အထက်ပါကဲ့သို့ ထည့်သွင်းကာ ပြောကြားခဲ့ခြင်းဖြစ်သည်။
တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) ကို ၂၀၁၅ ခုနှစ်၊ အောက် တိုဘာလ ၁၅ ရက်တွင် အစိုးရ၊ လွှတ်တော်၊ တပ်မတော်နှင့် တိုင်းရင်းသားလက်နက်ကိုင်အဖွဲ့အစည်းများက နိုင်ငံတကာသက်သေများရှေ့မှောက်၌ လက်မှတ်ရေးထိုးခဲ့ကြသည်။
NCA သည် ပြည်ထောင်စုလွှတ်တော်က အတည်ပြုပေးထားသည့် သမိုင်းဝင်စာချုပ်ဖြစ်ပြီး မည်သည့်အချိန်မှ ပျယ်ပြယ်မှုမရှိဘဲ တည်ရှိနေမည့်စာချုပ်ဖြစ်သည်ဟု နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်က ပြောသည်။
ထို့ပြင် တိုင်းရင်းသားလက်နက်ကိုင်အဖွဲ့အစည်းတစ်ခု၏ တာဝန်ရှိသူတစ်ဦးက NCA နှင့်ပတ်သက်၍ အထောက်အထားမဲ့၊ အဓိပ္ပါယ်မဲ့စွာ လက်လွတ်စပယ်ပြောကြားခဲ့သည်ကို တွေ့ရှိရသော်လည်း ငြိမ်းချမ်းရေးနှင့်ပတ်သက်၍ တပ်မတော်အနေဖြင့် NCA စာချုပ်အပေါ်တွင်သာ ခိုင်ခိုင်မာမာရပ်တည်သွားမည်ဟု ဗိုလ်ချုပ်မှူးကြီးက တုံ့ပြန်ထားသည်။
ပြီးခဲ့သည့် သြဂုတ်လ ၁၀ ရက်တွင် ကရင်အမျိုးသားအစည်းအရုံး(KNU)မှ အထွေထွေ အတွင်းရေးမှူး ပဒိုစောတာဒိုမှူးသည် NCA နှင့်ပတ်သက်၍ လိုက်နာစရာအကြောင်း မရှိတော့ကြောင်း ထုတ်ဖော်ပြောကြားခဲ့ဖူးသည်။
NCA လက်မှတ်ရေးထိုးသည့် တိုင်းရင်းသားလက်နက်ကိုင်အဖွဲ့ (၁၀)ဖွဲ့ရှိပြီး ၎င်းတို့အထဲတွင် KNU၊ CNF နှင့် ABSDF တို့ပါဝင်ကာ လက်ရှိတွင် တပ်မတော်နှင့် တိုက်ပွဲများဖြစ်ပွားလျက်ရှိသည်။
ကျန်ရှိသော NCA ရေးထိုးထားသည့် လက်နက်ကိုင်(၇)ဖွဲ့သည် လက်ရှိနစကအစိုးရနှင့် ငြိမ်းချမ်းရေးတွေ့ဆုံဆွေးနွေးမှုများရှိနေပြီး ယင်း(၇)ဖွဲ့အနက်မှ (၅)ဖွဲ့အနေဖြင့် NCA သည် ပျက်ပြယ်မှုမရှိကြောင်း တရားဝင်ထုတ်ဖော်ပြောကြားခဲ့သည်။
ဗိုလ်ချုပ်မှူးကြီးမင်းအောင်လှိုင် ဦးဆောင်သည့် နစကအစိုးရအနေဖြင့် လာမည့် အောက်တို ဘာလ ၁၅ ရက်တွင် ကျရောက်မည့် (၈)နှစ်မြောက် NCA နှစ်ပတ်လည်နေ့ကို အဓိပ္ပါယ်ရှိရှိ စီစဉ်ကျင်းပသွားရန် ပြင်ဆင်နေသည်ဟု နစကမှ အသိပေးထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ယနေ့ စက်တင်ဘာလ ၂ ရက်အတွင်းဖြစ်ပွားခဲ့သော ပြည်တွင်းနှင့်ပြည်ပက သတင်းများအား စုစည်းတင်ဆက်ခြင်း
RELATED POSTS
04 Oct 2024 | နိုင်ငံရေး,ပြည်တွင်း
02 Oct 2024 | နိုင်ငံရေး,နိုင်ငံတကာ
02 Oct 2024 | နိုင်ငံရေး,ပြည်တွင်း
01 Oct 2024 | နိုင်ငံရေး,နိုင်ငံတကာ