ကျပ်ဘီလျံ(၁၀၀)ကျော်တန်ဖိုးရှိ မူးယစ်ဆေးဝါး နှင့် ကျည်ဆံနှစ်သောင်းတို့ကို ဖမ်းဆီးရမိမှုနှင့်အတူ ကျူးလွန်သူများ၏ ပိုင်ဆိုင်မှုများကို ငွေကြေးခဝါချမှုဖြင့် အရေးယူမည်
သန့်ဇင်(NSS) - ဩဂုတ် ၃၁
မန္တလေးတိုင်း၊ သာစည်မြို့နယ်နှင့် ရန်ကုန်တိုင်း၊ သင်္ဃန်းကျွန်းမြို့နယ်တို့တွင် ငွေကျပ် ၁၀၅ ဒသမ ၃၇ ဘီလျံကျော်တန်ဖိုးရှိ အိုက်စ်(မက်သ်အဖက်တမင်း) ၃တန်ကျော် အပါအဝင် စိတ်ကြွရူးသွပ်ဆေးပြား ၃၀ ဒသမ ၈၆ သန်း နှင့် လက်နက်ကျည်များ ဖမ်းဆီးရမိခဲ့ကြောင်း သိရသည်။
မြန်မာနိုင်ငံမူးယစ်ဆေးဝါးတာဆီးနှိမ်နင်းရေးရဲတပ်ဖွဲ့က ပြီးခဲ့သည့် ဩဂုတ်လ ၁၃ရက်၊ နံနက် ၁၀ နာရီအချိန်တွင် သာစည်မြို့နယ်၊ တောင်ကြီး-သာစည်သွားကားလမ်း၊ ကျွဲတပ်ဆုံကျေးရွာအနီးတွင် ဖမ်းဆီးရမိခဲ့ခြင်းဖြစ်ကြောင်း သိရသည်။
အဆိုပါကျေးရွာအနီးတွင် ကျော်ဇင်ထွန်း မောင်းနှင်လာပြီး ထွန်းဝေ(ခ)ဖိုးဇကာ လိုက်ပါလာသည့် NISSAN 18 ဘီးတွဲကားပေါ်မှ ကျောက်မီးသွေးမှုန့်များဖြင့် ဖုံးအုပ်သယ်ဆောင်လာသည့် အိုက်စ်(မက်သ်အဖက်တမင်း) ၃တန်၊ စိတ်ကြွရူးသွပ်ဆေးပြား ၂၉ သန်းနှင့် 7.62 ကျည် (၂၀၀၀၀)တောင့်တို့ကို သိမ်းဆည်းရမိခဲ့ကြောင်း သိရသည်။
ကွင်းဆက်ဖော်ထုတ်ချက်အရ ဩဂုတ်လ ၁၄ ရက်၊ ညနေ ၃နာရီအချိန်တွင် ဒက္ခိဏသီရိမြို့နယ်၊ (၂၀၁) မိုင်စစ်ဆေးရေးဂိတ်တွင် သိမ်းဆည်းရမိ မူးယစ်ဆေးဝါးများ သယ်ဆောင်ရောင်းဝယ်ရာ၌ ပူးပေါင်းပါဝင်သူများဖြစ်သည့် ကိုထွန်း(ခ)ထွန်းမင်းလက် နှင့် ကျော်လှိုင်(ခ)ကိုကိုလှိုင်တို့အား ဖမ်းဆီးရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးတပ်ဖွဲ့မှ ထုတ်ပြန်ထားသည်။
ဆက်လက်၍ ၎င်းတို့(၂)ဦး၏ စစ်ဆေးဖော်ထုတ်ချက်အရ ဩဂုတ်လ ၁၅ ရက် မွန်းလွဲ ၁နာရီခွဲအချိန်တွင် သင်္ဃန်းကျွန်းမြို့နယ်၊ အင်ကြင်းမြိုင်လမ်းရှိ နေအိမ်တွင် ဝင်းထွန်းဦးအား စိတ်ကြွရူးသွပ်ဆေးပြား ၁ ဒသမ ၈၆ သန်း၊ အိုက်စ်(မက်သ်အဖက်တမင်း) ၄ ဒသမ ၈ ကီလိုနှင့်အတူ ထပ်မံဖမ်းဆီးရမိခဲ့ကြောင်း သိရသည်။
၎င်းဖမ်းဆီးရမိသည့် ပစ္စည်းများအား စစ်ဆေးရာတွင် စုစုပေါင်းတန်ဖိုးငွေကျပ် ၁၀၅ ဒသမ ၃၇ ဘီလျံကျော်တန်ဖိုးရှိ အိုက်စ်(မက်အဖက်တမင်း) ၃တန်ကျော်၊ စိတ်ကြွရူးသွပ်ဆေးပြား ၃၀ ဒသမ ၈၆ သန်းနှင့် 7.62 ကျည် (၂၀၀၀၀)တောင့်တို့ကို သိမ်းဆည်းရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးတပ်ဖွဲ့မှ ထုတ်ပြန်ထားသည်။
ထို့နောက် ၎င်းတို့(၅)ဦးအား ဥပဒေအရ အရေးယူထားပြီး ကွင်းဆက်ပြစ်မှုကျူးလွန်သူများအား ဆက် လက်ဖမ်းဆီးရမိရေး စုံစမ်းဖော်ထုတ်လျက်ရှိကြောင်းနှင့် အမှုတွင်ပါဝင်သူများ၏ ငွေကြေးအကျိုးအမြတ်များနှင့် ပိုင်ဆိုင်မှုများကို ငွေကြေးခဝါချမှုတိုက်ဖျက်ရေးဥပဒေအရ ဆက်လက်အရေးယူသွားမည်ဖြစ်ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သတင်းထုတ်ပြန်ထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ပြင်ဦးလွင်မြို့ ပွဲကောက်ရေတံခွန်သို့ အလည်လာရောက်သည့်အဖွဲ့ ပဒူတုပ်ခံရ၍ (၂)ဦး စိုးရိမ်ရ
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ