မြန်မာအီလက်ထရွန်နစ်မဲပေးစက်နှင့်ပတ်သက်၍ ရန်ကုန်အခြေစိုက် နိုင်ငံရေးပါတီများကို UEC က မကြာခင် လက်တွေ့သရုပ်ပြရှင်းလင်းမည်
မျိုးကြီး (NSS) - သြဂုတ် ၃၀
မြန်မာအီလက်ထရွန်နစ်မဲပေးစက်နှင့်ပတ်သက်၍ ရန်ကုန်အခြေစိုက် နိုင်ငံရေးပါတီများကို ပြည်ထောင်စုရွေးကောက်ပွဲကော်မရှင်(UEC)က လက်တွေ့သရုပ်ပြရှင်းလင်းမည်ဖြစ်ကြောင်း သတင်းရရှိသည်။
မဲပေးစက်နှင့်ပတ်သက်၍ ရန်ကုန်အခြေစိုက် နိုင်ငံရေးပါတီ(၇)ပါတီကို လာမည့် စက်တင်ဘာလ ၅ ရက်တွင် ရန်ကုန်တိုင်းအစိုးရအဖွဲ့၌ ကော်မရှင်ဘက်က သရုပ်ပြရှင်းလင်းသွားမည်ဖြစ်ကြောင်း သိရသည်။
“ရန်ကုန်မှာ ၅ ရက်နေ့ ဖိတ်ထားပါတယ်။ အန်ကယ်တို့ ပါတီကတော့ ကိုယ်စားလှယ် (၄)ယောက် ဖိတ်ထားလို့ သွားတက်မယ်။ မဲပေးစက်ကိစ္စလို့ပြောပါတယ်” ဟု တိုင်းရင်းသားစည်းလုံးညီညွတ်ရေးပါတီမှ အထွေထွေအတွင်းရေးမှူးဦးထွန်းရီက NSS ကို ပြောသည်။
အဆိုပါ မြန်မာအီလက်ထရွန်နစ်မဲပေးစက် သရုပ်ပြစမ်းသပ်ရှင်းလင်းပွဲသို့ တက်ရောက်ရန် တိုင်းရင်းသားစည်းလုံးညီညွတ်ရေးပါတီအပါအဝင် ရန်ကုန်အခြေစိုက်နိုင်ငံရေးပါတီ(၇)ပါတီကို ရွေးကောက်ပွဲကော်မရှင်က ဖိတ်ကြားထားကြောင်း သိရသည်။
“ရန်ကုန်မှာရှိတဲ့ အခြေစိုက်ပါတီ (၇)ပါတီလောက်ကို ဖိတ်တာလို့ သိရတယ်။ တစ်နိုင်ငံလုံးက ပါတီတွေအကုန်လုံးကို ဖိတ်တာမဟုတ်ဘူး။ လောလောဆယ် မှတ်ပုံတင်အတည်ပြုထားတဲ့ အထဲက ပါတီတွေပေါ့လေ။ ပါတီအကုန်လုံးက (၆၃)ပါတီရှိပေမယ့် (၃၆)ပါတီလောက်ပဲ အတည်ပြုရသေးတာလေ။ အဲဒီအတည်ပြုထားတဲ့အထဲက ရန်ကုန်မှာအခြေစိုက်တဲ့ ပါတီတွေထဲက တစ်ပါတီကို (၄)ယောက်တက်ပါဆိုပြီးတော့ ဖိတ်ထားတာပဲရှိတယ်။ စက်နဲ့ပတ်သက်ပြီးတော့ ရှင်းမယ်ပြောတယ်။ ဘာတွေရှင်းမယ်၊ ဘယ်လိုလုပ်မယ်ဆိုတာတော့ စက်တင်ဘာလ(၅)ရက်မှာပဲ သိမှာပေါ့”ဟု ဦးထွန်းရီက ဆက်လက်ပြော သည်။
နစက၏ ရွေးကောက်ပွဲကော်မရှင်က တီထွင်ထားသော မြန်မာအီလက်ထရွန်နစ်မဲပေးစက်နှင့်ပတ် သက်၍ လက်ရှိအချိန်တွင် သရုပ်ပြစမ်းသပ်ရှင်းလင်းမှုများကို ကော်မရှင်က ဝန်ကြီးဌာနများ၌ လိုက်လံပြုလုပ်လျက်ရှိသည်။
၎င်းမဲပေးစက်သည် လျှပ်စစ်မီးအပေါ် မှီခိုမှုမရှိသည့်အတွက် နေရာဒေသမရွေး အသုံးပြုနိုင်ကြောင်းသိရပြီး မဲဆန္ဒရှင်များ၏ ဆန္ဒမဲများလေ့လွင့်မှုမဖြစ်ရေး၊ ရွေးကောက်ပွဲလုပ်ငန်းစဉ်များ တိကျမြန်ဆန်ရေးနှင့် မဲမသမာမှုများကို တားဆီးကာကွယ်နိုင်ကြောင်း UEC က အသိပေးထားသည်။
ထို့ပြင် မဲပေးစက်ကို အသုံးပြုခြင်းဖြင့် ရွေးကောက်ပွဲများကျင်းပရာ၌ ဆန္ဒမဲလက်မှတ်များကို သန်းပေါင်းများစွာ ရိုက်နှိပ်ရသည့်အတွက် ကုန်ကျစရိတ်များပြားမှု၊ ဆန္ဒမဲလက်မှတ်များဖောင်းပွမှု၊ မဲရုံပေါင်း (၄၀၀၀၀) ကျော်အတွက် မဲပုံးများ၊ ဆန္ဒပြုတံဆိပ်တုံးများ၊ မဲရုံသုံးပစ္စည်းများဝယ်ယူရခြင်းကို သက်သာစေနိုင်ကြောင်းလည်း ကော်မရှင်က အသိပေးထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
အာဆီယံအလှည့်ကျဥက္ကဋ္ဌအဖြစ်တာဝန်ယူချိန်အတွင်း မြန်မာ့နိုင်ငံရေးအခက်အခဲကိုဖြေရှင်းရန် ဖောင်ဒေးရှင်းချနိုင်ခဲ့ကြောင်း အင်ဒိုနီးရှားနိုင်ငံခြားရေးဝန်ကြီးပြော
RELATED POSTS
19 Sep 2024 | နိုင်ငံရေး,ပြည်တွင်း