Pika (NSS) - ဩဂုတ် ၂၉

ဂျပန်နိုင်ငံသည် ၎င်း၏ကိုယ်ပိုင်လုံခြုံရေးကို မြှင်တင်လိုပါက ပြည်တွင်းလက်နက်ကဏ္ဍကို ပိုမိုဖွံ့ဖြိုးတိုးတက်အောင်လုပ်ဆောင်ရမည်ဖြစ်ကြောင်း ဂျပန်ထိပ်တန်းဗိုလ်ချုပ်ကြီး ယိုရှီဟီဒဲယိုရှိဒါက ပြောကြားခဲ့သည်။

ထို့ပြင် ဂျပန်နိုင်ငံသည် ဒေသတွင်းပြိုင်ဖက်များ၏ ခြိမ်းခြောက်မှုများကို ဟန့်တားရန်အတွက် အမေရိကန်၏ နျူကလီးယားလက်နက်များကို အားကိုးနေရကြောင်း ၎င်းကထပ်မံပြောကြားခဲ့သည်။ ယိုရှီဟီဒဲယိုရှီဒါသည် ဂျပန်နိုင်ငံ၏ ကာကွယ်ရေးလိုအပ်ချက်များကို ပြောဆိုခဲ့ပြီး ဂျပန်နှင့်အမေရိကန်နိုင်ငံတို့၏ နီးကပ်သော စစ်ရေးပူးပေါင်းဆောင်ရွက်မှုကို ထောက်ပြပြောဆိုခဲ့ကြောင်းသိရသည်။

၎င်းက"ကျွန်တော်တို့ရဲ့ လက်ရှိစွမ်းဆောင်နိုင်မှုတွေနဲ့ ဂျပန်နိုင်ငံရဲ့လုံခြုံရေးကို ထိန်းသိမ်းဖို့က မဖြစ်နိုင်ပါဘူး။ ကျွန်တော်တို့ရဲ့ ကာကွယ်ရေးစွမ်းရည်ကို ပိုမိုအားကောင်းလာအောင် လုပ်ဖို့လိုအပ်ပါတယ်။ ပြီးတော့ အမေရိကန်ရဲ့ နျူကလီးယားလက်နက်တွေ၊ မဟာဗျူဟာမြောက်နည်းဗျူဟာတွေ အပါအဝင် ဟန့်တားနိုင်စွမ်းတွေကို ဆက်ထိန်းထားဖို့လိုအပ်ပါတယ်၊"ဟု ပြောဆိုခဲ့သည်။

ဂျပန်နိုင်ငံတွင် အမေရိကန်၏ နျူကလီးယားလက်နက်များဖြန့်ကျက်ချထားစေရန်အတွက် အမေရိကန်နိုင်ငံနှင့် ဆယ်စုနှစ်ကျော်ကြာ ဆွေးနွေးခဲ့ပြီး ပြီးခဲ့သည့်ဇွန်လတွင် သတင်းအချက်အလက်မျှဝေခြင်း၊ပူးတွဲလေ့ကျင့်မှုများ၊ ဒုံးကျည်များဖြင့် ခြိမ်းခြောက်မှုများကို ပူးတွဲတုံ့ပြန်ခြင်းတို့အတွက် သဘောတူညီချက်တစ်ခုရရှိခဲ့ကြောင်း ယိုရှီဟီဒဲယိုရှီဒါက ပြောကြားခဲ့သည်။

ဂျပန်နိုင်ငံသည် သမိုင်းတစ်လျှောက် အဏုမြူလက်နက်များဖြင့် ပစ်မှတ်ထားတိုက်ခိုက်ခံခဲ့ရသည့် တစ်ခုတည်းသော နိုင်ငံလည်းဖြစ်သည်။ ၁၉၄၅ ခုနှစ် ဩဂုတ်လ(၆)ရက်တွင် အမေရိကန်လေတပ်မှ ဗုံးကြဲ လေယာဉ်တစ်စင်းသည် ဟီရိုရှီးမားမြို့ကို နျူကလီးယားဗုံးတစ်လုံး ပစ်ချတိုက်ခိုက်ခဲ့ခြင်းကြောင့် လူပေါင်း(၁၂၆၀၀၀)သေဆုံးခဲ့ပြီး အများစုမှာ အရပ်သားများဖြစ်ကြောင်းသိရသည်။ ဩဂုတ်လ(၉)ရက်တွင် နာဂါစကီမြို့ကို နောက်ထပ်နျူကလီးယားဗုံးတစ်လုံးပစ်ချတိုက်ခိုက်ခံခဲ့ရပြီး လူပေါင်း(၈)သောင်းကျော်သေဆုံးခဲ့သည်။

ဂျပန်နိုင်ငံသည် ၎င်း၏မိတ်ဖက်နိုင်ငံများနှင့်အတူ မြောက်ကိုရီးယားနှင့်တရုတ်တို့၏ ရန်စမှုများကို သတိပေးကာ တရားဥပဒေစိုးမိုးရေးအပေါ် အခြေခံသည့် နိုင်ငံတကာအမိန့်များကို ဆက်လက်ထိန်းသိမ်းရန် လုပ်ဆောင်သွားမည်ဖြစ်ကြောင်း ယိုရှီဟီဒဲယိုရှီဒါက ပြောကြားခဲ့သည်။ ထို့ပြင် ဂျပန်နိုင်ငံ ကြုံတွေ့နေရသော ခြိမ်းခြောက်မှုများကြောင့် ပြည်သူလူထုသည် စစ်အသုံးစရိတ်တိုးမြှင့်ခြင်းနှင့် ပိုမိုကောင်း မွန်သော တန်ပြန်တိုက်ခိုက်နိုင်စွမ်းများကို မြှင့်တင်ရန် ထောက်ခံနေကြောင်း ၎င်းကမှတ်ချက်ပြုပြောဆိုခဲ့သည်။