Pika (NSS) - ဩဂုတ် ၂၉

ဆီးရီးယားနိုင်ငံတွင် အမေရိကန်တပ်ဖွဲ့များကို  ဆက်လက်ထားရှိသွားမည်ဖြစ်ကြောင်း အမေရိကန်ဗိုလ်ချုပ်ကြီးမာ့ခ်မီလီက ပြောကြားခဲ့သည်။

ဆီးရီယားနိုင်ငံအတွင်း ကျန်ရှိနေသော ISIS စစ်သွေးကြွအဖွဲ့များကို တိုက်ခိုက်ရန်အတွက် အမေရိကန်တပ်ဖွဲ့များကို ဆက်လက်ထားရှိရခြင်းဖြစ်ကြောင်း ၎င်းကထပ်မံပြောဆိုခဲ့သည်။ ဆီးရီးယားနိုင်ငံအတွင်း အမေရိကန်တပ်ဖွဲ့များထားရှိခြင်းသည် တရားမဝင်ခြင်းကြောင့် နိုင်ငံတွင်းရှိ တပ်ဖွဲ့များကို ပြန်လည်ရုတ်သိမ်းရန် အမေရိကန်ကို ဆီးရီးယားအစိုးရက အကြိမ်ကြိမ်တောင်းဆိုခဲ့ကြောင်းသိရသည်။ ဗိုလ်ချုပ်ကြီးမာ့ခ်မီလီက"အမေရိကန်နိုင်ငံဟာ အရှေ့အလယ်ပိုင်းဒေသကနေ ဘယ်တော့မှ ထွက်ခွါသွားမှာ မဟုတ်ပါဘူး။ အမေရိကန်တပ်ဖွဲ့တွေဟာ ဒီနေရာမှာ ဆယ်စုနှစ်ပေါင်းများစွာ ဆက်ရှိနေဦးမယ်လို့ ကျွန်တော်ထင်ပါတယ်။ ဆီးရီးယားနဲ့ အီရတ်တို့မှာ ISIS စစ်သွေးကြွအဖွဲ့တွေ ရှိနေပါသေးတယ်။ ကျွန်တော်တို့ တပ်ဖွဲ့တွေကို ပြန်လည်ရုတ်သိမ်းလိုက်မယ်ဆိုရင် စစ်သွေးကြွအဖွဲ့တွေဟာ ပြန်လည်ထကြွလာပါလိမ့်မယ်။"ဟုပြောဆိုခဲ့သည်။

ထို့ပြင် ဆီးရီးယားနိုင်ငံအတွင်းရှိ အမေရိကန်တပ်ဖွဲ့များကို ပြန်လည်ရုတ်သိမ်းသွားခြင်း ရှိ/မရှိဆိုသည့်အချက်သည် အမေရိကန်သမ္မတဂျိုးဘိုင်ဒန်အပေါ် မူတည်ကြောင်း မာ့ခ်မီလီကပြောကြားခဲ့သည်။ ဆီးရီးယားနိုင်ငံရှိ စစ်သွေးကြွအဖွဲ့များကို အပြီးသတ်ချေမှုန်းနိုင်ခဲ့ပါက အမေရိကန်တပ်ဖွဲ့များ နိုင်ငံတွင်းမှ ထွက်သွားခြင်း ရှိ/မရှိ မေးခံရသည့်အချိန်တွင် မာ့ခ်မီလီက ယခုကဲ့သို့မှတ်ချက်ပြုပြောဆိုခဲ့ခြင်းဖြစ်သည်။

၎င်းက" ရေနံတွေနဲ့ စွမ်းအင် အရင်းအမြစ်တွေကြောင့်တင် မဟုတ်ဘဲ အရှေ့အလယ်ပိုင်းဒေသတစ်ခုလုံးဟာ အခြားအကြောင်းအရာတွေများစွာကြောင့် အမေရိကန်အတွက် အရေးကြီးတာပါ။"ဟုပြောဆိုခဲ့သည်။

အမေရိကန်နိုင်ငံသည်  အကြမ်းဖက်တိုက်ဖျက်မှု စစ်ဆင်ရေးများလုပ်ဆောင်နေသည့်ပုံစံဟန်ဆောင်ကာ နိုင်ငံတွင်းမှ ရေနံများကို ခိုးယူနေကြောင်း ဆီးရီးယားအစိုးရက အကြိမ်ကြိမ်စွပ်စွဲပြောဆိုခဲ့သည်။ ဆီးရီးယားအစိုးရ၏အဆိုအရ အမေရိကန်တပ်ဖွဲ့များနှင့် ၎င်းတို့ထောက်ပံ့ပေးထားသော လက်နက်ကိုင်အဖွဲ့များသည် နိုင်ငံ၏ နေ့စဉ်ရေနံထွက်ရှိမှု၏ (၈၀)ရာခိုင်နှုန်းခန့်ကို ပြည်ပသို့ခိုးယူသယ်ဆောင်နေကြောင်း သိရသည်။