နိုင်ငံ၏ အချုပ်အခြာအာဏာနှင့်ဂုဏ်သိက္ခာကို ထိပါးသည့်အပြင် ပြည်တွင်းရေးကို ဝင်ရောက်စွက်ဖက်နေ၍ တီမောသံရုံးတာဝန်ခံကို နှင်ထုတ်ခြင်းဖြစ်ဟု နစကတုံ့ပြန်
မျိုးကြီး (NSS) - သြဂုတ် ၂၇
မြန်မာနိုင်ငံ၏ အချုပ်အခြာအာဏာနှင့်ဂုဏ်သိက္ခာကို ထိပါးသည့်အပြင် ပြည်တွင်းရေးကို ဝင်ရောက်စွက် ဖက်နေ၍ တီမောလက်စ်တေနိုင်ငံ သံရုံးယာယီတာဝန်ခံကို နှင်ထုတ်ခြင်းဖြစ်ကြောင်း နစကဘက်က တုံ့ပြန်လိုက်သည်။
မြန်မာနိုင်ငံဆိုင်ရာ တီမောလက်စ်တေသံရုံးယာယီတာဝန်ခံ Mr. Avelino Fernandes Ximenes Pereira အနေဖြင့် နိုင်ငံအတွင်းမှ လာမည့် စက်တင်ဘာလ ၁ ရက်မတိုင်မီ အပြီးထွက်ခွာသွားရန် အကြောင်း ကြားထားကြောင်း သိရသည်။
“တီမောနိုင်ငံအနေနဲ့ကတော့ အာဆီယံမှာလည်း မြန်မာနိုင်ငံရဲ့ ဂုဏ်သိက္ခာကို ကျဆင်းအောင် လုပ်လေ့ရှိတယ်။ မဟုတ်မမှန်စွပ်စွဲမှုတွေ အမြဲတမ်းလုပ်နေတဲ့ နိုင်ငံဖြစ်တယ်။ နိုင်ငံတစ်ခုမှာ အချုပ်အခြာအာ ဏာရယ်၊ ဂုဏ်သိက္ခာရယ်ရှိတယ်။ ဒီအချုပ်အခြာအာဏာရယ်၊ ဂုဏ်သိက္ခာရယ်ကို ထိပါးတဲ့အပိုင်းတွေရှိတယ်။ ပြီးရင် ပြည်တွင်းရေးမှာ ပေါ်ပေါ်တင်တင် ဝင်ရောက်စွက်ဖက်တဲ့ဟာတွေ ရှိတယ်။ နိုင်ငံရေးနဲ့ပတ်သက်ပြီးလည်း ဘာမှသိနားလည်းတဲ့ နိုင်ငံမဟုတ်ဘဲနဲ့ ဆောင်ရွက်နေတာဖြစ်တယ်။ ဒါတွေကြောင့်မိုလို့ သံရုံးယာယီတာဝန်ခံကို နိုင်ငံတကာသံတမန်ဆက်ဆံရေးလုပ်ထုံးတွေအရ ကျွန်တော်တို့အနေနဲ့ မြန်မာနိုင်ငံကနေ ထွက်ခွာဖို့ ဆောင်ရွက်စေခဲ့တာဖြစ်ပါတယ်” ဟု နစကပြောခွင့်ရ ဗိုလ်ချုပ်ဇော်မင်းထွန်းက NSS ကို ပြောသည်။
တီမောလက်စ်တေနိုင်ငံသည် မြန်မာနိုင်ငံနှင့်ပတ်သက်၍ အဆက်အသွယ်မရှိကြောင်းနှင့် နိုင်ငံသူ၊ နိုင်ငံသား၊ တိုင်းရင်းသားပြည်သူများကို တစ်ဖက်သတ်စွပ်စွဲချက်များဖြင့် စော်ကားနေသည့် နိုင်ငံသာဖြစ်၍ တူညီသည့်တုံ့ပြန်မှုမျိုး ပြန်ပေးခြင်းဖြစ်ကြောင်း ဗိုလ်ချုပ်ဇော်မင်းထွန်းက ထပ်မံပြောသည်။
“နိုင်ငံတကာသံတမန်ဆက်ဆံရေးတွေမှာ ခင်ဗျားတို့လည်း ကြားဖူးနေတာပဲ။ တစ်ချို့နိုင်ငံတွေဆိုရင် နေ့ချင်းပြီး ထွက်ခွာရမယ်လို့ ပြောနေတာပဲ။ ကျွန်တော်တို့ ပေးထားတဲ့အချိန်က လုံလောက်တဲ့အချိန်မျိုး ဖြစ်တယ်။ လုံလောက်တဲ့အချိန် မဟုတ်သည်ဖြစ်စေ၊ ဟုတ်သည်ဖြစ်စေ ဘာမှစိတ်ပူစရာမလိုဘူး။ မြန်မာနိုင်ငံ ပြည်သူလူထုကိုရော၊ မြန်မာနိုင်ငံ တစ်နိုင်ငံလုံးကိုရော စော်ကားနေတဲ့ နိုင်ငံမျိုးကို၊ စော်ကားနေတဲ့ သံတမန်မျိုးကိုတော့ ကျွန်တော်တို့က ထိုက်သင့်တဲ့အရေးယူမှုမျိုး၊ ထိုက်သင့်တဲ့ တုံ့ပြန်မှုမျိုး ဆောင်ရွက်ရမှာပဲ ဖြစ်တယ်လို့ ပြောချင်ပါတယ်” ဟု နစကပြောခွင့်ရက ပြောသည်။
ထို့ပြင် နိုင်ငံတကာသံတမန်ရေးနှင့်ပတ်သက်၍ မြန်မာနိုင်ငံ၏ အချုပ်အခြာအာဏာ၊ ဂုဏ်သိက္ခာနှင့် နိုင်ငံသူ၊ နိုင်ငံသားများကို ထိပါးလာပါက အခြားမည်သည့်နိုင်ငံမဆို သံတမန်ရေးအရ လိုအပ်သည့် တုံ့ပြန်မှုများကို ဆောင်ရွက်သွားမည်ဟုလည်း နစကဘက်က အသိပေးထားသည်။
နစက၏ နိုင်ငံခြားရေးဝန်ကြီးဌာနသည် ပြီးခဲ့သည့် ဇူလိုင်လ ၅ ရက်တွင် ရန်ကုန်မြို့ရှိ တီမောလက်စ်တေသံရုံးယာယီတာဝန်ခံ Mr. Avelino Fernandes Ximenes Pereira အား နေပြည်တော်သို့ ဖိတ်ခေါ်ကာ တီမောလက်စ်တေသမ္မတနှင့် NUG ကိုယ်စားလှယ်များ တွေ့ဆုံမှုအပေါ် ကန့်ကွက်ကြောင်း သတိပေးခဲ့ဖူးသည်။
“NUG က အဖွဲ့ဝင်တွေကို တီမောလက်စ်တေမှာ လက်ခံတယ်။ မြန်မာနိုင်ငံနဲ့ တရားဝင်သံတမန်ဆက်ဆံရေးရှိတဲ့ နိုင်ငံတစ်ခုက အဲဒါမျိုး မလုပ်သင့်၊ မလုပ်အပ်တဲ့ဟာကို လုပ်တယ်ပေါ့။ သံတမန်ကျင့်ထုံးတွေအရ၊ သံတမန်စည်းမျဉ်းစည်းကမ်းတွေအရဆိုရင် တရားဝင်သံရုံးတွေ ဖွင့်လှစ်ထားတဲ့ မြန်မာနိုင်ငံအတွင်းမှာ လာရောက်ပြီးတော့ တရားဝင်သံရုံးအဆက်အဆံရှိတဲ့ နိုင်ငံတစ်ခုအနေနဲ့ အဆိုပါလုပ်ရပ်မျိုးကို မလုပ်သင့် မလုပ်အပ်ဘူး။ မလုပ်သင့်၊ မလုပ်အပ်တဲ့ လုပ်ရပ်မျိုးကို လုပ်တဲ့အတွက် နှင်ထုတ်တာပေါ့။ အလား တူ တခြားသော နိုင်ငံတွေလည်း ရှိကောင်းရှိလိမ့်မယ်” ဟု နိုင်ငံခြားရေးဝန်ကြီးဌာနမှ ညွှန်ကြားရေးမှူးဟောင်းတစ်ဦးက NP News ကို သုံးသပ်ပြောကြားသည်။
နစကအနေဖြင့် ယခုကဲ့သို့ တီမောလက်စ်တေ့သံရုံးယာယီတာဝန်ခံကို နှင်ထုတ်ခြင်းသည် သံတမန်ရေးရာ၌ အမြင့်ဆုံးအဆင့် တုံ့ပြန်ခြင်းမျိုး မဟုတ်သေးကြောင်း သိရသည်။
“ဒါက အမြင့်ဆုံးအဆင့်တော့ မဟုတ်ဘူး။ အမြင့်ဆုံးက နှင်ထုတ်ပြီးတော့ သံရုံးပိတ်တဲ့ အဆင့်ရှိသေးတယ်။ သံတမန် ဆက်ဆံမှု ရပ်ဆိုင်းပြီးတော့ သံရုံးပိတ်တဲ့အဆင့် ရှိသေးတယ်” ဟု ဦးကြည်မောင်ဦးက ထပ်မံပြောကြားသည်။
မြန်မာနိုင်ငံနှင့် တီမောလက်စ်တေ့နိုင်ငံတို့သည် ပြီးခဲ့သော ၂၀၀၆ ခုနှစ်တွင် သံတမန်ဆက်ဆံမှု ထူထောင်ထားခြင်းဖြစ်ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဂျပန်နိုင်ငံတွင် သွားရောက်ယှဉ်ပြိုင်နေသည့် မြန်မာအသင်း U-12 အသင်း ဂျပန်ဆာဂန်တိုဆူအသင်းကို ရှုံးနိမ့်
RELATED POSTS
04 Oct 2024 | နိုင်ငံရေး,ပြည်တွင်း
02 Oct 2024 | နိုင်ငံရေး,နိုင်ငံတကာ
02 Oct 2024 | နိုင်ငံရေး,ပြည်တွင်း
01 Oct 2024 | နိုင်ငံရေး,နိုင်ငံတကာ