ဆားလင်းကြီးမြို့နယ်ရှိ တရုတ်ဝမ်ပေါင်ကုမ္ပဏီ၌ အလုပ်လုပ်ရန် ထွက်ခွာလာသူ(၁၄)ဦးကို PDF အဖွဲ့ ဖမ်းဆီးစစ်ဆေးနေ
NSS - သြဂုတ် ၂၅
စစ်ကိုင်းတိုင်း၊ ဆားလင်းကြီးမြို့နယ်ရှိ တရုတ်ဝမ်ပေါင်ကုမ္ပဏီ၌ အလုပ်လုပ်ရန် ထွက်ခွာလာသူ (၁၄)ဦးကို PDF ပူးပေါင်းအဖွဲ့များက ဖမ်းဆီးကာ စစ်ဆေးမှုများပြုလုပ်နေကြောင်း သတင်းရရှိသည်။
ဝမ်ပေါင်ကုမ္ပဏီ၌ အလုပ်လုပ်ရန် ထွက်ခွာလာသူ(၁၄)ဦးသည် ယမန်နေ့(သြဂုတ် ၂၄ ရက်) နေ့လည် ၁ နာရီ ၃ဝ မိနစ်အချိန်ခန့်တွင် ယင်းမာပင်မြို့နယ်နှင့် ဆားလင်းကြီးမြို့နယ်အစပ်၊ ချင်းတွင်းတံတားအနီးရှိ ကျေးရွာတစ်ခု၏ အနီး၌ ဖမ်းဆီးခံခဲ့ရခြင်းဖြစ်ကြောင်း သိရသည်။
“သူတို့က ပြည်သူ့စစ်တော့ မဟုတ်ဘူးလို့ သတင်းရတယ်။ ဝမ်ပေါင်မှာ အလုပ်လုပ်ဖို့လာတဲ့အဖွဲ့လို့ ပြောတယ်။ ဝမ်ပေါင်ကုမ္ပဏီမှာလည်း ကျွန်တော်ရဲ့လူတွေရှိတယ်။ အဲဒီလိုတော့ သတင်းရပါတယ်။ ပြည်သူ့စစ်အနေအထားတော့ မဟုတ်ဘူး။ အလုပ်လုပ်သွားဖို့ရာ လာကြတာ။ ချင်းတွင်းတံတားအကျော်မှာရှိတဲ့ ရွာနားမှာ အဖမ်းခံရတာ။ ယင်းမာပင်မြို့နယ်အစပ်နဲ့ ဆားလင်းကြီးမြို့နယ်အစပ်ပေါ့ဗျာ။ အဲဒီအစပ်မှာ အဖမ်းခံရတာလို့ သတင်းရတယ်။ နေ့လည် တစ်နာရီလောက်မှာ အဖမ်းခံရတာလို့ သိရတယ်” ဟု ဝမ်ပေါင်ကုမ္ပဏီနှင့်နီးစပ်သူတစ်ဦးက NP News ကို ပြောသည်။
ထိုသို့ ဖမ်းဆီးစစ်ဆေးခံနေရသူ(၁၄)ဦးသည် ဧရာဝတီတိုင်းဘက်မှတစ်ဆင့် ဝမ်ပေါင်ကုမ္ပဏီ၌ အလုပ်လုပ်ရန် ထွက်ခွာလာသူများဖြစ်ကြောင်း ၎င်းက ဆက်လက်ပြောသည်။
“ကုမ္ပဏီတွေက ခြံစည်းရိုးခတ်တာတွေ၊ တင်ဒါလုပ်ငန်းတွေက စနေကြပြီလေ။ အဲဒါကို အလုပ်လုပ်ဖို့ရာအတွက် လာကြတာ။ အလုပ်ကတော့ Labour ကန်ထရိုက်ကနေမှ ခေါ်တဲ့သဘောရယ်။ ကျွန်တော်တို့အဖွဲ့တွေကလည်း အဲဒီ Labour ကန်ထရိုက်က ခေါ်မှသွားရတာလေ” ဟု ဝမ်ပေါင်ကုမ္ပဏီနှင့်နီးစပ်သူက ထပ်မံပြောသည်။
အထက်ပါ(၁၄)ဦးသည် ဧရာဝတီတိုင်း၊ သာပေါင်းမြို့နယ်မှ ပြည်သူ့စစ်များဖြစ်ပြီး ဝမ်ပေါင်ကုမ္ပဏီ၌ တာဝန်ထမ်းဆောင်ရန် ရောက်ရှိလာသူများဖြစ်ကြောင်း ဒေသခံ PDF အဖွဲ့များက ထုတ်ပြန်ထားသည်ကိုလည်း တွေ့ရှိရသည်။
လက်ရှိတွင် ဖမ်းဆီးခံခဲ့ရသော (၁၄)ဦးအား PDF အဖွဲ့များက စစ်ဆေးမေးမြန်းမှုများ ပြုလုပ်လျက်ရှိကြောင်း သိရသည်။
အဆိုပါဖြစ်စဉ်နှင့်ပတ်သက်၍ နိုင်ငံတော်တာဝန်ယူထားသည့် နစကအစိုးရအနေဖြင့် လက်ရှိအချိန်အထိ တစ်စုံတစ်ရာထုတ်ဖော်ပြောဆိုခြင်းမျိုး မရှိသေးပေ။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
၀က်ဂ်နာကြေးစားတပ် ခေါင်းဆောင်အား လုပ်ကြံသတ်ဖြတ်ဟု ပြောဆိုမှုများကို မိုးလုံးပြည့်မုသာဝါဒများအဖြစ် ကရင်မလင် သမုတ်
RELATED POSTS
19 Oct 2024 | နိုင်ငံရေး,နိုင်ငံတကာ
19 Oct 2024 | နိုင်ငံရေး,နိုင်ငံတကာ
19 Oct 2024 | နိုင်ငံရေး,နိုင်ငံတကာ