မြူနစ် (NSS) - သြဂုတ် ၂၂

တွေ့ဆုံဆွေးနွေးရေးလမ်းကြောင်းကို သွားနိုင်ရန် NUG၊ PDF တို့အနေဖြင့် အကြမ်းဖက်လုပ်ရပ်များကို ရပ်တန့်ကြောင်း ကမ္ဘာသိကြေညာရန် လိုအပ်သည်ဟု နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

ဗိုလ်ချုပ်ဇော်မင်းထွန်းက ယနေ့(သြဂုတ်လ ၂၂ ရက်)တွင် နေပြည်တော်ရှိ ပြန်ကြားရေးဝန်ကြီးဌာန၌ ပြုလုပ်သော သတင်းစာရှင်းလင်းပွဲတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

၂၀၂၀ ပြည့်နှစ်အထွေထွေရွေးကောက်ပွဲ၌ မဲမသမာမှုများကို ဖြေရှင်းပေးရန် တပ်မတော်ဘက်က NLD အစိုးရအား တောင်းဆိုမှုများရှိခဲ့သော်လည်း ဖြေရှင်းပေးခြင်းမရှိသည့်အတွက် တပ်မတော်သည် ၂၀၂၁ ခုနှစ် ဖေဖော်ဝါရီလတွင် နိုင်ငံတော်အာဏာရယူခဲ့သည်။

ထို့သို့ နိုင်ငံရေးအပြောင်းအလဲဖြစ်ပေါ်ခဲ့ပြီးနောက်ပိုင်း NUG၊ PDF အဖွဲ့အစည်းများ ပေါ်ပေါက်လာက တိုင်းရင်းသားလက်နက်ကိုင်အဖွဲ့အစည်းအချို့နှင့် ပူးပေါင်းပြီးနောက် တပ်မတော်အစိုးရအား လက်နက်ကိုင်တော်လှန်ခဲ့ကြသည့်အပြင် အရပ်သားများအား ဒလန်ဟုစွပ်စွဲကာ အကြမ်းဖက်သတ်ဖြတ်မှုများလည်း ဖြစ်ပေါ်လျက်ရှိသည်။

“အခုဖြစ်ပေါ်နေတဲ့ အကြမ်းဖက်လက်နက်ကိုင်လမ်းစဉ်ကို သူတို့ကိုယ်တိုင် ရွေးချယ်ခဲ့တာဖြစ်ပါတယ်။ တွေ့ဆုံဆွေးနွေး လမ်းကြောင်းသွားဖို့ဆိုရင် ပထမဦးဆုံးက နိုင်ငံတော်အစိုးရအနေနဲ့ အကြမ်းဖက်လို့ ကြေညာထားတဲ့သူတွေနဲ့ တွေ့ဆုံဆွေးနွေးရေးသွားစရာလမ်း ကြောင်း မရှိပါဘူး” ဟု ဗိုလ်ချုပ်ဇော်မင်းထွန်းက ပြောသည်။

သို့သော် တွေ့ဆုံဆွေးနွေးရေးလမ်းကြောင်းသွားနိုင်ရန်အတွက် အကြမ်းဖက်လုပ်ရပ်များကို မလုပ်တော့ကြောင်းဝန်ခံချက်ကို ကမ္ဘာသိကြေညာရန် လိုအပ်ကြောင်းလည်း နစကပြောခွင့်ရက ဆက်လက်ပြောသည်။

“တွေ့ဆုံဆွေးနွေးရေးလမ်းကြောင်း သွားနိုင်ဖို့အတွက် အကြမ်းဖက်လို့ ကြေညာခံထားတဲ့သူတွေသည် နံပါတ်တစ် ကမ္ဘာသိအကြမ်းဖက်လုပ်ရပ်များကို မလုပ်တော့ပါဘူးဆိုပြီး ဝန်ခံဖို့လိုပါတယ်။ နံပါတ်နှစ် အကြမ်းဖက်လုပ်ရပ်တွေကို ရှုတ်ချပါတယ်ဆိုတဲ့ ကမ္ဘာသိကြေညာ ချက်လိုပါတယ်” ဟု ဗိုလ်ချုပ်ဇော်မင်းထွန်းက ပြောသည်။

လက်ရှိတွင် ဗိုလ်ချုပ်မှူးကြီးမင်းအောင်လှိုင် ဦးဆောင်သော နစကအစိုးရသည် တိုင်းရင်း သားလက်နက်ကိုင်အဖွဲ့အစည်း (၁၀)ဖွဲ့နှင့် ငြိမ်းချမ်းရေးတွေ့ဆုံဆွေးနွေးနေသည့်အပြင် အခြားသော တိုင်းရင်းသားလက်နက်ကိုင်အဖွဲ့များကိုလည်း ငြိမ်းချမ်းရေးဆွေးနွေးရန် ထပ်မံဖိတ်ခေါ်လျက်ရှိသည်။

ပြည်တွင်းငြိမ်းချမ်းရေး ရရှိရန်အတွက် EAO အဖွဲ့များ၊ နိုင်ငံရေးပါတီများနှင့် တွေ့ဆုံဆွေးနွေးသွားမည့်အပြင် ရှေ့ဆက်သွားမည့် ရွေးကောက်ပွဲလုပ်ငန်းများကိုလည်း အရှိန်အဟုန်ဖြင့် ဆောင်ရွက်သွားမည်ဟု နစကပြောခွင့်ရက ထပ်မံအသိ ပေးထားသည်။