ပုံစာ - ပြည်တွင်း၌ ရောင်းချနေသည့် ဆိုလာနှင့်ဆက်စပ်ပစ္စည်းများအား တွေ့ရစဉ်

ယွန်း (NSS) - သြဂုတ် ၁၉

ဆိုလာနှင့် ဆက်စပ်ပစ္စည်းများကို import လိုင်စင်လျှောက်ထားခွင့်ဖြေလျော့ပေးရေးအတွက် ပြည်တွင်းရှိ ဆိုလာပစ္စည်းများ တင်သွင်းရောင်းချနေသည့် လုပ်ငန်းရှင်အချို့က ဆန္ဒရှိနေကြသည်။

ဆိုလာစနစ်သည် မြန်မာနိုင်ငံတွင် ဖြစ်ပေါ်နေသည့် လျှပ်စစ်မီးပြဿနာကို တစ်ဖက်တစ်လမ်းမှ ကူညီဖြေရှင်းပေးနေသည့် ပြည့်ဖြိုးမြဲစွမ်းအင်တစ်ခုဖြစ်ပြီး အခြားစီမံကိန်းများထက် ကုန်ကျစရိတ်ပိုမိုသက် သာသည့် စနစ်တစ်ခုဖြစ်ကြောင်း သိရသည်။

“ဆိုလာ energy က ခုလက်ရှိဖြစ်ပေါ်နေတဲ့ ပြဿနာကို ဖြေရှင်းဖို့အတွက် အရမ်းကိုလိုအပ်တဲ့ solution လို့ထင်ပါတယ်။ တခြား solution တွေကြတော့ ရေအားလျှပ်စစ်ထပ်ဆောက်မယ်ဆိုရင်လည်း ကုန်ကျ စရိတ်တွေအရမ်းများတယ်။ ဆိုလာကျတော့ တစ်အိမ်လုံးစာပဲတပ်မလား၊ စက်ရုံတစ်ရုံစာလေးပဲတပ်မလား တစ်ပိုင်တစ်နိုင်ပဲဖြစ်တဲ့အတွက် ဆိုလာကတော့ လိုအပ်တယ်လို့ ထင်ပါတယ်”ဟု ဆိုလာတင်သွင်းရောင်းချနေသည့် လုပ်ငန်းရှင်တစ်ဦးက NSS ကိုပြောသည်။

စီမံကိန်းနှင့် ဘဏ္ဍာရေးဝန်ကြီးဌာနအနေဖြင့် ပြည်တွင်းလျှပ်စစ် ဓာတ်အားလုံလောက်စွာရရှိရေးအတွက် ဆိုလာနှင့် ဆက်စပ်ပစ္စည်းများအား ပြည်ပမှတင်သွင်းမှုအပေါ် ပြီးခဲ့သည့် ဧပြီလ(၁)ရက်မှစ၍ အကောက် ခွန်ကင်းလွတ်ခွင့်ပြုခဲ့ကြောင်း သိရသည်။

သို့သော် လက်ရှိအချိန်အထိ import လိုင်စင်လျှောက်ထားခွင့်အား ဖြေလျော့ပေးခြင်းမရှိကြောင်း ပြည်တွင်းရှိ ဆိုလာပစ္စည်းများ တင်သွင်းရောင်းချနေသူများထံမှ သိရသည်။

“တခြားပစ္စည်းတွေ import လိုင်စင်တွေဆို အရမ်းစောင့်ရတာတွေရှိတယ်။  ဆိုလာပစ္စည်းတွေဆိုရင်တော့ လိုင်စင်ရတာ နည်းနည်းတော့မြန်တယ်။ ဒါပေမယ့် လိုင်စင်ကင်းလွတ်ခွင့်မရှိတာတော့ ရှိနေပါသေးတယ်။ ဒါကြောင့်မို့လို့ အစိုးရအနေနဲ့ ဆိုလာနဲ့ပတ်သက်တဲ့ပစ္စည်းတွေ အကုန်လုံးပေါ့ ဆိုလာပါမယ်၊ အင်ဗာတာပါမယ် တခြားဆက်စပ်ပစ္စည်းတွေအကုန်လုံးကို import လိုင်စင်လုံးဝလျှောက်စရာမလိုတဲ့ အနေအထားတစ်ခုကို သတ်မှတ်လိုက်မယ်ဆိုရင်တော့ ပိုပြီးအဆင်ပြေလာမယ်လို့ ထင်မိပါတယ်။ အခုကတော့ အဲဒီအပိုင်းကတော့ မရှိသေးဘူးပေါ့” ဟု အခြားသော ဆိုလာတင်သွင်းရောင်းချသူ လုပ်ငန်းရှင်တစ်ဦးက ဆက်လက်ပြောသည်။

လက်ရှိတွင် ဆိုလာစနစ်ကို စက်ရုံအလုပ်ရုံလုပ်ငန်းရှင်များနှင့် လူလတ်တန်းစားများက အသုံးများလာကြောင်းသိရပြီး အိမ်သုံးတစ်နိုင်တစ်ပိုင်အတွက် ငွေကျပ်(၃)သိန်း၊ (၄)သိန်းမှ စတင်ကာ ဆိုလာတပ်ဆင်နိုင်ကြောင်း ၎င်းက ပြောသည်။

“စက်ရုံတွေနဲ့ လူလတ်တန်းစားတွေကတော့ အများဆုံးသုံးကြတာပေါ့။ အခြေခံလူတန်းစားတွေကြတော့ ဆိုလာတော့သုံးကြတယ် အသေးလေးတွေလောက်ပဲ သုံးကြတာပေါ့။ သုံးတဲ့သူရဲ့ ဘတ်ဂျက်ပေါ်မှာ မူတည်ပြီးတော့ အိမ်သုံး system ကိုမှ (၃)၊(၄)သိန်းလောက်ကနေ သိန်းရာချီတဲ့အထိ ဖြစ်သွားမှာပေါ့။ quality ကိုဦးစားပေးတာလား။ ခုလက်ရှိ မီးမြန်မြန်ရဖို့ကိုပဲ ဦးစားပေးမှာလားဆိုတဲ့ အပေါ်မှာမူတည်ပြီးတော့ အခြေအနေကတော့ ကွာသွားတာပေါ့”ဟု အထက်ပါ လုပ်ငန်းရှင်က ပြောသည်။

မြန်မာနိုင်ငံအနေဖြင့် ဆိုလာနှင့် ဆက်စပ်ပစ္စည်းများကို တရုတ်နိုင်ငံမှ အများဆုံးတင်သွင်းလျက်ရှိကြောင်း သိရသည်။

အစိုးရအနေဖြင့် ပြည်သူများ၊ လုပ်ငန်းရှင်များ၏ ကိုယ်ပိုင်မြေနေရာများပေါ်တွင် တပ်ဆင်ထားသည့် အသေးစားဆိုလာစနစ်မှ ဓာတ်အားများကို ပြန်လည်ဝယ်ယူသွားမည်ဖြစ်ကြောင်း ပြီးခဲ့သည့် ဧပြီလက ထုတ်ပြန်ထားခဲ့သည်။

အဆိုပါ ထုတ်ပြန်ချက်အရ  လျှပ်စစ်ဓာတ်အား (၁ဝဝ) ကီလိုဝပ်မှ (၁)မဂ္ဂါဝပ်အထိကို (၈၅)ကျပ်နှုန်းဖြင့် လည်းကောင်း ၊ (၁)မဂ္ဂါဝပ်အထက်မှ (၁၀)မဂ္ဂါဝပ်အထိကို (၈ဝ) ကျပ်ဖြင့်လည်းကောင်း ဝယ်ယူသွားမည်ဟု ထုတ်ပြန်ချက်တွင်ပါရှိပြီး အဆိုပါ ပမာဏသည် နည်းနေကြောင်း ဆိုလာပစ္စည်းများ တင်သွင်းရောင်ချသည့် လုပ်ငန်းရှင်များက သုံးသပ်ပြောကြားထားသည်။