မြူနစ်(NSS) - သြဂုတ် ၁၅

တီထွင်ထားသည့် မဲပေးစက်နှင့်ပတ်သက်၍ ဝန်ကြီးဌာနများသို့ လှည့်လည်ကာ မဲပေးနည်းသရုပ်ပြမှုများကို ပြည်ထောင်စုရွေးကောက်ပွဲကော်မရှင်က စတင်ပြုလုပ်လာကြောင်း တွေ့ရှိရသည်။

နစက၏ ရွေးကောက်ပွဲကော်မရှင်သည် မြန်မာအီလက်ထရွန်နစ်မဲပေးစက်(Myanmar Electronic Voting Machine - MEVM)ကို တည်ဆောက်ထားပြီး လာမည့်ရွေးကောက်ပွဲတွင် ယင်းစက်ကို အသုံးပြုသွားဖွယ်ရှိနေသည်။

ထိုသို့တီထွင်ထားသော မဲပေးစက်နှင့်ပတ်သက်၍ ရှင်းလင်းပြသခြင်းနှင့် လက်တွေ့သရုပ်ပြစမ်းသပ်မဲပေးခြင်းများကို ယမန်နေ့(သြဂုတ်လ ၁၄ ရက်)တွင် နေပြည်တော်ရှိ အစိုးရအဖွဲ့ရုံးဝန်ကြီးဌာန၌ ပြုလုပ်ခဲ့ကြောင်း နစကမှ သတင်းထုတ်ပြန်ထားသည်။

မြန်မာအီလက်ထရွန်နစ်မဲပေးစက်နှင့်ပတ်သက်၍ ရှင်းလင်းပြသခြင်းအခမ်းအနားသို့ အစိုးရအဖွဲ့ရုံးဝန်ကြီး(၁) ဒုတိယဗိုလ်ချုပ်ကြီးစိုးထွဋ်၊ အစိုးရအဖွဲ့ရုံးဝန်ကြီး(၂) ဦးကိုကိုလှိုင်နှင့် အရာထမ်းအမှုထမ်းများ တက်ရောက်ခဲ့ကြောင်း သိရသည်။

ထို့ပြင် ပြည်ထောင်စုရွေးကောက်ပွဲကော်မရှင်မှ တာဝန်ရှိသူများသည် စက်မှုဝန်ကြီးဌာနသို့ ထပ်မံသွား ရောက်ကာ တာဝန်ရှိသူများအား မဲပေးစက်နှင့်ပတ်သက်၍ ရှင်းလင်းပြသခြင်း၊ လက်တွေ့သရုပ်ပြစမ်းသပ်မဲပေးခြင်းများကို ဆောင်ရွက်ခဲ့ကြောင်း နစကထံမှ သိရသည်။

မဲပေးစက်နှင့်စပ်လျဉ်း၍ ထိန်းချုပ်စက်၊ ဆန္ဒပြုစက်၊ ဆန္ဒပြုချက်မှန်ကန်မှု ရှိ၊ မရှိပြသသောစက်၊ မဲပုံးနှင့်ဘက်ထရီများဖွဲ့စည်းတည်ဆောက်ထားရှိမှု၊ မဲပေးစက်မှ မဲရလဒ်များထုတ်ယူရေတွက်ခြင်း၊ မဲပေးစက်ကို ထုပ်ပိုးသိမ်းဆည်းခြင်းနှင့် မဲပေးစက်၏ လုံခြုံစိတ်ချရမှုများကို ကော်မရှင်ဘက်က ရှင်းလင်းပြသခဲ့ကြောင်း သိရသည်။

၎င်းမဲပေးစက်သည် လျှပ်စစ်မီးအပေါ် မှီခိုမှုမရှိသည့်အတွက် နေရာဒေသမရွေး အသုံးပြုနိုင်ကြောင်းသိရပြီး မဲဆန္ဒရှင်များ၏ ဆန္ဒမဲများလေ့လွင့်မှုမဖြစ်ရေး၊ ရွေးကောက်ပွဲလုပ်ငန်းစဉ်များ တိကျမြန်ဆန်ရေးနှင့် မဲမသမာမှုများကို တားဆီးကာကွယ်နိုင်မည်ဖြစ်ကြောင်း UEC က အသိပေးထားသည်။

ထို့ပြင် မဲပေးစက်ကို အသုံးပြုခြင်းဖြင့် ရွေးကောက်ပွဲများကျင်းပရာ၌ ဆန္ဒမဲလက်မှတ်များကို သန်းပေါင်းများစွာ ရိုက်နှိပ်ရသည့်အတွက် ကုန်ကျစရိတ်များပြားမှု၊ ဆန္ဒမဲလက်မှတ်များဖောင်းပွမှု၊ မဲရုံပေါင်း (၄၀၀၀၀) ကျော်အတွက် မဲပုံးများ၊ ဆန္ဒပြု တံဆိပ်တုံးများ၊ မဲရုံသုံးပစ္စည်းများဝယ်ယူရခြင်းကို သက်သာစေနိုင်မည်ဖြစ်ကြောင်း ကော်မရှင်ဘက်က အသိပေးထားသည်။

ရွေးကောက်ပွဲကော်မရှင်က တီထွင်ထားသည့် မြန်မာအီလက်ထရွန်နစ်မဲပေးစက်နှင့်ပတ်သက်၍ နစကဥက္ကဋ္ဌဗိုလ်ချုပ်မှူး ကြီးမင်းအောင်လှိုင်ကိုယ်တိုင်လည်း သွားရောက်စစ်ဆေးကြည့်ရှုခဲ့ဖူးသည်။