ယွန်း (NSS) - သြဂုတ် ၁၂

သြဂုတ်လ(၁) ရက်မှ (၁၁)ရက်အတွင်း PDF အဖွဲ့ဝင် (၄၁)ဦး ဥပဒေဘောင်အတွင်း ပြန်လည်ဝင်ရောက်ခဲ့ကြောင်း နစက၏ အချက်အလက်များအရ သိရသည်။

ယမန်နေ့(သြဂုတ်လ ၁၁ ရက်)က ဥပဒေဘောင်အတွင်း ပြန်လည်ဝင်ရောက်လာသူများအား အလယ်ပိုင်းတိုင်း စစ်ဌာနချုပ်၊ အနော်ရထာခန်းမတွင် လက်ခံခဲ့ကြောင်း နစကမှ ထုတ်ပြန်ထားသည်။

ထိုသို့ ပြန်လည်လက်ခံခဲ့ရာ ပြစ်မှုကျူးလွန်ခဲ့ခြင်းမရှိသော မန္တလေးတိုင်း မဟာအောင်မြေမြို့နယ်၊ ချမ်းမြသာစည်မြို့နယ်၊ အောင်မြေသာစံမြို့နယ်၊ အမရပူရမြို့နယ်နှင့် ကချင်ပြည်နယ် မြစ်ကြီးနားမြို့တို့မှ PDF အဖွဲ့ဝင်အမျိုးသား (၁၀)ဦး ဥပဒေဘောင်အတွင်း ဝင်ရောက်ခဲ့ကြောင်း သိရသည်။

ထို့ပြင် ၎င်းတို့နှင့်အတူပါလာသည့်  လက်လုပ်ပစ္စတိုတစ်လက်၊ ၎င်းကျည်အိမ်တစ်ခု၊ ၉ မမ ကျည်ငါးတောင့်တို့ကိုလည်း အပ်နှံခဲ့ကြောင်း ထုတ်ပြန်ချက်အရ သိရသည်။

ထို့နောက် ၎င်းတို့အား ဝန်ခံကတိလက်မှတ်ရေးထိုးစေကာ မိဘအုပ်ထိန်းသူများထံသို့ လွှဲပြောင်းအပ်နှံခဲ့ကြောင်း သိရသည်။

အလားတူ ပြီးခဲ့သည့် သြဂုတ်လ(၂)ရက်ကလည်း စစ်ကိုင်းတိုင်း နှင့် မကွေးတိုင်းတို့မှ PDF အဖွဲ့ဝင် (၁၇)ဦး ဥပဒေဘောင်အတွင်း ပြန်လည်ဝင်ရောက်ခဲ့ကြောင်း သိရသည်။

ထို့ပြင် သြဂုတ်လ(၄)ရက်တွင်လည်း ရန်ကုန်တိုင်းအတွင်းရှိ ရွှေပြည်သာ၊ လှိုင်သာယာ၊ စမ်းချောင်း၊ မရမ်းကုန်း၊ လှည်းကူးမြို့နယ်အပါအဝင် ဧရာဝတီတိုင်းအတွင်းရှိ ဝါးခယ်မ၊ ညောင်တုန်း၊ ဓနုဖြူမြို့နယ်နှင့် စစ်ကိုင်းတိုင်း မုံရွာမြို့နယ်တို့မှ PDF အဖွဲ့ဝင်(၁၄)ဦး ဥပဒေဘောင်အတွင်း ပြန်လည်ဝင်ရောက်ခဲ့ကြောင်း နစကမှ သိရသည်။

ထို့ကြောင့် သြဂုတ်လ(၁)ရက်မှ (၁၁)ရက်အထိ PDF အဖွဲ့ဝင် (၄၁)ဦး ဥပဒေဘောင်အတွင်း ဝင်ရောက်ခဲ့ပြီး ၎င်းတို့အား နစကမှ ဆုငွေ(၆၇၇)သိန်း ချီးမြှင့်ထားကြောင်း သိရသည်။

နစကအနေဖြင့် PDF အပါအဝင် အဖွဲ့အစည်းအမျိုးမျိုးအမည်ခံ၍ လက်နက်ကိုင် ဆန့်ကျင်လျက်ရှိသည့်အဖွဲ့များတွင် ‌ရောက်ရှိနေသူများကို ဥပဒေဘောင်အတွင်းသို့ ပြန်လည်ဝင်ရောက်ရန် ဖိတ်ခေါ်လျက်ရှိကြောင်း သိရသည်။