ရုရှား-ယူကရိန်းပဋိပက္ခအဆုံးသတ်စေရန်အတွက် ထပ်မံကြိုးပမ်းသွားမည်ဖြစ်ကြောင်း တရုတ်အစိုးရပြော
Pika (NSS) - ဩဂုတ် ၅
ဆော်ဒီအာရေးဗျနိုင်ငံက အိမ်ရှင်အဖြစ် လက်ခံကျင်းပမည့် ငြိမ်းချမ်းရေး ထိပ်သီးဆွေးနွေးပွဲအတွင်း ရုရှား-ယူကရိန်းပဋိပက္ခ လျင်မြန်စွာအဆုံးသတ်စေရန်အတွက် အကောင်ဆုံးကြိုးပမ်းသွားမည်ဖြစ် ကြောင်း တရုတ်နိုင်ငံခြားရေးဝန်ကြီးဌာနက ထုတ်ပြန်ကြေညာခဲ့သည်။
တရုတ်နိုင်ငံ၏ ဥရောပနှင့်အာရှရေးရာ အထူးကိုယ်စားလှယ် Li Hui ဦးဆောင်သော ကိုယ်စားလှယ်အဖွဲ့သည် ဆော်ဒီအာရေးဗျနိုင်ငံတွင်ကျင်းပသော ငြိမ်းချမ်းရေးထိပ်သီးအစည်းအဝေးကို တက်ရောက်မည်ဖြစ်ကြောင်း တရုတ်နိုင်ငံခြားရေးဝန်ကြီးဌာနက ပြောကြားခဲ့သည်။
တရုတ်နိုင်ငံခြားရေးဝန်ကြီးဌာနက"ယူကရိန်းပဋိပက္ခကို နိုင်ငံရေးအရဖြေရှင်းနိုင်ဖို့အတွက် အပြုသဘောဆောင်တဲ့ အခန်းကဏ္ဍကနေ ဆက်လက်ပါဝင်နိုင်ဖို့နဲ့အတူ နိုင်ငံတကာအသိုင်းအဝိုင်းနဲ့ ပူးပေါင်းလုပ်ဆောင်ဖို့ အဆင်သင့်ရှိနေပါတယ်"ဟုပြောဆိုခဲ့သည်။
ဩဂုတ်လ(၅)ရက်နှင့်(၆)ရက်တို့တွင် ဆော်ဒီအာရေးဗျနိုင်ငံ၌ ကျင်းပမည့် ငြိမ်းချမ်းရေးထိပ်သီးဆွေးနွေးပွဲကို နိုင်ငံပေါင်း(၃၀)ခန့်တက်ရောက်နိုင်ဖွယ်ရှိနေကြောင်းသိရသည်။ အဆိုပါဆွေးနွေးပွဲတွင် အမေရိကန်၊ ဗြိတိန်၊ တောင်အာဖရိက နှင့် ပိုလန်နိုင်ငံတို့လည်း ပါဝင်တက်ရောက်နိုင်ဖွယ်ရှိနေသည်။ ငြိမ်းချမ်းရေးဆွေးနွေးပွဲများ ပြန်လည်စတင်ရန် ရုရှားဘက်ကအဆင်သင့်ရှိကြောင်း ပြောဆိုထားသော်လည်း ဆော်ဒီအာရေးဗျတွင် ကျင်းပမည့် ငြိမ်းချမ်းရေးဆွေးနွေးပွဲတွင် ရုရှားပါဝင်မည်မဟုတ်ကြောင်းလည်းသိရသည်။
တရုတ်နှင့်ကောင်းမွန်သော ဆက်ဆံရေးရှိသည့် ဆော်ဒီအာရေးဗျသည် ဆွေးနွေးပွဲအတွက် အိမ်ရှင်အဖြစ် လက်ခံကျင်းပရန် ရွေးချယ်ခံခဲ့ရကြောင်း အမည်မသိသံတမန်များကို ကိုးကားပြီး Wall Street Journal ကဖော်ပြခဲ့သည်။ အိန္ဒိယ၊ ဘရာဇီး၊ အင်ဒိုနီးရှား၊ အီဂျစ် နှင့် မက္ကဆီကို စသည့်နိုင်ငံများသည်လည်း ငြိမ်းချမ်းရေးဆွေးနွေးပွဲသို့တက်ရောက်ရန် ဖိတ်ကြားခြင်းကိုခံခဲ့ရကြောင်းသိရသည်။ တရုတ်သမ္မတရှီကျင့်ဖျင်သည် ယူကရိန်းပဋိပက္ခအဆုံးသတ်ရန်အတွက် အချက်(၁၂)ချက်ပါ ငြိမ်းချမ်းရေးအဆိုပြုချက်ကိုပြီးခဲ့သည့်ဖေဖော်ဝါရီလတွင် တင်ပြခဲ့ကြောင်းသိရသည်။
တရုတ်၏ငြိမ်းချမ်းရေးသဘောတူစာချုပ်ကို ရုရှားဘက်ကလက်ခံခဲ့သော်လည်း ယူကရိန်းနှင့်အနောက် အုပ်စုနိုင်ငံများက လက်ခံခြင်းမျိုးမရှိခဲ့ကြောင်းသိရသည်။ အမေရိကန်နှင့်နေတိုးအဖွဲ့ဝင်နိုင်ငံများသည် ယူကရိန်းသို့ စစ်လက်နက်ပစ္စည်းများထောက်ပံ့ပေးခြင်းဖြင့် ပဋိပက္ခကို ပိုမိုရှည်ကြာအောင် လုပ်ဆောင်နေကြောင်း ရုရှားဘက်က အကြိမ်ကြိမ်စွပ်စွဲပြောဆိုခဲ့သည်။ ထို့ပြင်ယူကရိန်းသို့ အနောက်အုပ်စုနိုင်ငံများ၏ စစ်လက်နက်ပစ္စည်းများထောက်ပံ့ပေးခြင်းသည် သွေးထွက်သံယိုမှုများ ပိုမိုဖြစ်ပွားလာအောင်သာလုပ်ဆောင်နေခြင်းဖြစ်ကြောင်း ရုရှားဘက်က သတိပေးပြောဆိုခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဘာစီလိုနာအသင်းအနေဖြင့် ဘာနာဒိုဆေးလ်ဗားကို ခေါ်ယူလိုပါက သင့်လျော်သောကမ်းလှမ်းမှုလုပ်ရမည်ဟု မန်စီးတီးနည်းပြပြော
RELATED POSTS
04 Oct 2024 | နိုင်ငံရေး,ပြည်တွင်း
02 Oct 2024 | နိုင်ငံရေး,နိုင်ငံတကာ