မျိုးကြီး (NSS) - သြဂုတ် ၃

နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်သည် အစိုးရအဖွဲ့ကို ပြန်လည်ပြင်ဆင်ဖွဲ့စည်းခဲ့ပြီး ကာကွယ်ရေး၊ ပြည်ထဲရေးဝန်ကြီးများမှာ နေရာအပြောင်းအလဲ ဖြစ်ပေါ်ခဲ့သည်။

၎င်းက ယနေ့(သြဂုတ် ၃ ရက်)တွင် ပြည်ထောင်စုအစိုးရအဖွဲ့ကို အထက်ပါကဲ့သို့ ပြန် လည်ပြင်ဆင်ဖွဲ့စည်းခဲ့ခြင်းဖြစ်သည်။

နစက၏ ရှေ့လုပ်ငန်းစဉ် (၅)ရပ်နှင့် ဦးတည်ချက် (၁၂)ရပ်ကို ပိုမိုမြန်ဆန်ထိရောက်စွာ အကောင်အထည် ဖော်ဆောင် ရန်အတွက် အစိုးရအဖွဲ့ကို ပြင်ဆင်ဖွဲ့စည်းလိုက်ခြင်းဖြစ်ကြောင်း နစကမှ ထုတ်ပြန်ထားသည်။

ပြည်ထောင်စုအစိုးရအဖွဲ့တွင် နိုင်ငံတော်ဝန်ကြီးချုပ်အဖြစ် ဗိုလ်ချုပ်မှူးကြီးမင်းအောင်လှိုင်က ဆက်လက်တာဝန်ယူထားပြီး ဒုတိယဗိုလ်ချုပ်မှူးကြီးစိုးဝင်း၊ ဗိုလ်ချုပ်ကြီးတင်အောင်စန်း၊ ဗိုလ်ချုပ်ကြီးမြထွန်းဦး၊ စီမံကိန်းနှင့် ဘဏ္ဍာရေးဝန်ကြီး ဦးဝင်း ရှိန်နှင့် နိုင်ငံခြားရေးဝန်ကြီး ဦးသန်းဆွေတို့သည် ဒုတိယဝန်ကြီးချုပ်များအဖြစ် တာဝန်ယူကြမည်ဖြစ်သည်။

ထို့ပြင် ယခင် ပို့ဆောင်ရေးနှင့်ဆက်သွယ်ရေးဝန်ကြီးဌာန ဝန်ကြီးအဖြစ် တာဝန်ယူသော ဗိုလ်ချုပ်ကြီးတင်အောင်စန်းသည် ကာကွယ်ရေးဝန်ကြီးဌာန၊ ပြည်ထောင်စုဝန်ကြီး ဖြစ်လာခဲ့သည်။

ယခင် ကာကွယ်ရေးဝန်ကြီး ဗိုလ်ချုပ်ကြီးမြထွန်းဦးသည် ပို့ဆောင်ရေးနှင့်ဆက်သွယ်ရေးဝန်ကြီးဌာနသို့ ပြောင်းရွေ့ကာ ပြည်ထောင်စုဝန်ကြီးအဖြစ် တာဝန်ထမ်းဆောင်မည်ဖြစ်သည်။

အလားတူ ပြည်ထောင်စုအစိုးရအဖွဲ့ရုံးဝန်ကြီး ဒုတိယဗိုလ်ချုပ်ကြီးရာပြည့်သည် ပြည်ထဲရေးဝန်ကြီးဌာနသို့ ပြောင်းရွေ့ကာ ပြည်ထောင်စုဝန်ကြီးအဖြစ် တာဝန်ထမ်းဆောင်မည်ဖြစ်သည်။

ယခင် ပြည်ထဲရေးဝန်ကြီးဒုတိယဗိုလ်ချုပ်ကြီး စိုးထွဋ်သည် ပြည်ထောင်စုအစိုးရအဖွဲ့ရုံးဝန်ကြီးဌာန(၁)သို့ ပြောင်းရွေ့ကာ ဝန်ကြီးအဖြစ် ပြန်လည်ထမ်းဆောင်မည်ဖြစ်သည်။

ယမန်နေ့တွင် အနားပေးခံခဲ့ရသော သာသနာရေးနှင့်ယဉ်ကျေးမှုဝန်ကြီး ဦးကိုကို၏ နေရာတွင် နေပြည်တော်ကောင်စီဥက္ကဋ္ဌ ဦးတင်ဦးလွင်က ပြောင်းရွေ့တာဝန်ထမ်းဆောင်မည်ဖြစ်သည်။

အနားပေးခံခဲ့ရသော လျှပ်စစ်စွမ်းအားဝန်ကြီး ဦးသောင်းဟန်၏ နေရာတွင် ဝန်ကြီးအဖြစ် ဦးဉာဏ်ထွန်းဆိုသူက တာဝန် ထမ်းဆောင်မည်ဖြစ်ပြီး စွမ်းအင်ဝန်ကြီးဦးမျိုးမြင့်ဦး၏ နေရာတွင် ဦးကိုကိုလွင်က တာဝန်ယူဆောင်ရွက်သွားမည်ဖြစ်သည်။

ထို့ပြင် အနားပေးခံခဲ့ရသူများထဲတွင် ပါဝင်သော အလုပ်သမားဝန်ကြီးဒေါက်တာပွင့်ဆန်း၏ နေရာတွင်လည်း ဦးမြင့်နောင် ဆိုသူက တာဝန်ထမ်းဆောင်သွားမည်ဖြစ်ကြောင်း နစကမှ ကြေညာခဲ့သည်။

ဆက်လက်ပြီး ယနေ့ ပြန်လည်ဖွဲ့စည်းလိုက်သော အစိုးရအဖွဲ့တွင် ယခင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီး ဒေါက်တာသက်သက်ခိုင်သည် ဟိုတယ်နှင့်ခရီးသွားလာရေးဝန်ကြီးဌာနသို့ ပြောင်းရွေ့ကာ ဝန်ကြီးအဖြစ် တာဝန်ယူမည်ဖြစ်သည်။

ထိုသို့ လစ်လပ်ခဲ့သော လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးနေရာတွင် ပြည်ထောင်စုအစိုးရ အဖွဲ့ရုံးဝန်ကြီးဌာန၌ ဒုဝန်ကြီးအဖြစ် တာဝန်ထမ်းဆောင်ခဲ့သော ဒေါက်တာစိုးဝင်းက တာဝန်ယူဆောင်ရွက်သွားမည်ဖြစ်သည်။

ထို့ပြင် ယနေ့ ပြင်ဆင်ဖွဲ့စည်းလိုက်သော အစိုးရအဖွဲ့တွင် အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာနသည် အ စိုးရအဖွဲ့တွင် ပြန်လည်ပါဝင်လာခြင်း မရှိဘဲ ၎င်းဝန်ကြီးဌာန၌ ဝန်ကြီးအဖြစ် တာဝန်ယူထားသော ဦးကိုကိုလှိုင်သည် ပြည်ထောင်စုအစိုးရအဖွဲ့ရုံးဝန်ကြီးဌာန(၂)တွင် ဝန်ကြီးအဖြစ် တာဝန်ထမ်းဆောင်သွားမည်ဖြစ်သည်။

နစကအစိုးရသက်တမ်း (၆)လ ထပ်မံတိုးမြှင့်အပြီး (၃)ရက်အကြာ၌ ပြန်လည်ပြင်ဆင်ဖွဲ့စည်းခဲ့သော အစိုးရအဖွဲ့၏ လုပ် ကိုင်ဆောင်ရွက်မှုများသည် ကောင်းမွန်သည့်အကျိုးသက်ရောက်မှု ရှိ၊ မရှိကို ပြည်သူလူထုအနေဖြင့် စောင့်ကြည့်အကဲ ဖြတ်သွားရန် လိုအပ်သည်။

ဆက်လက်ပြီး ယမန်နေ့တွင် အနားပေးခြင်းခံခဲ့ရသော ပြည်ထောင်စုတရားသူကြီးအချုပ် ဦးထွန်းထွန်းဦး၏ နေရာတွင် တရားသူကြီးချုပ်အသစ်အဖြစ် ဦးသာဌေးက တာဝန်ယူဆောင်ရွက်သွားမည်ဖြစ်ကြောင်း နစကမှ ကြေညာခဲ့သည်။