Htay Oung (NSS) - သြဂုတ် ၃ 

ဘင်္ဂလားဒေ့ရှ်မှာ အကြီးဆုံးလို့ ဆိုရမယ့် ဆိုလာဓာတ်အားပေးစက်ရုံကို ဗုဒ္ဓဟူးနေ့ (သြဂုတ်လ ၂ ရက်) က ရန်ဂါပူရ် ပြည်နယ်၊ ဂိုင်ဘန်ဒါခရိုင် ဆန်ဒါဂန့်ခ်ျမြို့နယ်မှာ လူထုစုဝေးပွဲအခမ်းအနားနဲ့အတူ ဝန်ကြီးချုပ် ရှိတ်ဟာစီနာက ဖွင့်လှစ်ပေးလိုက်တယ်လို့ Dhaka Tribune က သြဂုတ်လ ၂ ရက်နေ့မှာ ရေးသားခဲ့ပါတယ်။ 

လျှပ်စစ်ဓါတ်အား ၂ဝဝ မီဂါဝပ် ထုတ်ယူနိုင်မယ့် အဲဒီစက်ရုံဟာ ဘင်္ဂလားဒေ့ရှ် ပြန်လည်ပြည့်ဖြိုးမြဲစွမ်းအင်ကဏ္ဍရဲ့ မှတ်တိုင်တစ်ခုဖြစ်လာပါတယ်။ ဧက ၆ဝဝ အကျယ်အ၀န်းရှိ နယ်မြေ ၃ ခုမှာ ဆိုလာချပ်ပေါင်း ၅၂,ဝဝဝ တပ်ဆင် ထားပါတယ်။ 

ရေကြီးရေလျှံခြင်းနဲ မြစ်ရေတိုက်စားခြင်းတို့လို သဘာဝဘေးအန္တရာယ်များမှ ကာကွယ်ဖို့အတွက် ဓာတ်အားပေး စက်ရုံဝန်းကျင်မှာ ၄ မိုင်ကျော်ရှည်လျားတဲ့ တာတမံတစ်ခု တည်ဆောက်ခဲ့ရပါတယ်။ ဒေသခံများအနေနဲ့ လမ်းရဲ့ အကျိုးကျေးဇူးကို ခံစားကြပြီး အဲဒီနေရာဟာလည်း ခရီးသွားများအတွက် ဆွဲဆောင်မှုတစ်ခုဖြစ်လာပါတယ်။

“ဘက်ဇင်ကို” လို့ ခေါ်တဲ့ ဘင်္ဂလားဒေ့ရှ် သွင်းကုန်-ထုတ်ကုန်ကော်ပိုရေးရှင်းအတွက် “တီစတာလီမိတက်က ၂ဝ၁၈ ခုနှစ်မှာ စတင်တင်တည်ဆောက်ပေးခဲ့ပါတယ်။ ၂၁ မိုင်ရှည် ဓါတ်အားလိုင်းကိုလည်း အသစ်သွယ်တန်းခဲ့ရပြီး ရမ်ဂါ ပူရ်ဓါတ်အားခွဲရုံမှတဆင့် လျှပ်စစ်ဓါတ်အား ၉ဝ-၁၄ဝ မီဂါ၀ပ်ကို ပြီးခဲ့တဲ့နှစ် နိုဝင်ဘာလကုန်မှာ လျှပ်စစ် ဖြန့်ဖြူး နိုင်ခဲ့ပြီးဖြစ်ပါတယ်။

၂ဝ၁၇ ခုနှစ် အောက်တိုဘာလ ချုပ်ဆိုခဲ့တဲ့ ဓာတ်အားဝယ်ယူရေးသဘောတူစာချုပ်အရ လျှပ်စစ်ဓာတ်အား တစ်ယူနစ်လျှင် ဝ.၁၂၇ အမေရိကန်ဒေါ်လာနှုန်းဖြင့် ဘင်္ဂလားဒေ့ရှ်အစိုးရက နှစ် ၂ဝ စာ ဝယ်ယူထားတယ်လို့ သိရှိရပါတယ်။

ဖွင့်ပွဲအခမ်းအနားမှာ ဘက်ဇင်ကိုကော်ပိုရေးရှင်းဥက္ကဋ္ဌက အမှာစကား ပြောကြားပါတယ်။ ယခုစီမံကိန်းဟာ ဝန်ကြီးချုပ် ရှိတ်ဟာစီနာရဲ့ “ကမ္ဘာမြေပူနွေးလာမှုနဲ့ သဘာ၀ပတ်၀န်းကျင် ထိန်းသိမ်းကာကွယ်ရေး” လမ်းပြ မြေပုံနဲ့အညီ အမေရိကန်ဒေါ်လာ သန်း ၃၃ဝ ခန့် အကုန်အကျခံ အကောင်အထည်ဖော်ခဲ့ခြင်းဖြစ်ကြောင်း၊ ပြန်လည်ပြည့်ဖြိုးမြဲစွမ်းအင်ကဏ္ဍဟာ အနာဂတ်စွမ်းအင်အတွက် အလွန်အရေးကြီးလိမ့်မယ်လို့ ယုံကြည်ကြောင်း၊ နောင်ဆက်လက်ပြီး အစိုးရအစီအစဉ်နဲ့ ဆိုလာဓာတ်အားပေးစက်ရုံတွေ ထပ်မံထူထောင်ဖို့ သုံးသပ်လျက်ရှိကြောင်း ပြောခဲ့ပါတယ်။

ယခင် အကြီးဆုံးဆိုလာစက်ရုံမှာ မွန်ဂလာမှာ တည်ရှိပြီး ၁ဝဝ မီဂါ၀ပ် ထုတ်လုပ်နိုင်ပါတယ်။ နိုင်ငံမှာ ပထမဆုံး တည်ဆောက်ခဲ့တာကတော့ ၃.၂၈ မီဂါဝပ်ထုတ်လုပ်နိုင်တဲ့ ဂျမယ်ပူရ်စက်ရုံဖြစ်ပြီး ၂ဝ၁၇ ခုနှစ်ကတည်းက စီးပွားဖြစ် စတင်လည်ပတ်နေပြီဖြစ်ပါတယ်။

စွမ်းအင်နဲ့ လျှပ်စစ်စွမ်းအင်ဝန်ကြီးရဲ့အဆိုအရ ဘင်္ဂလားဒေ့ရ်ှသည် ပြန်လည်ပြည့်ဖြိုးမြဲအရင်းအမြစ်များမှ လျှပ်စစ်ဓာတ်အား ၁,၁၉၄ မဂ္ဂါဝပ် ထုတ်ယူနိုင်မှာဖြစ်ပေမယ့် ၈၂၅.၂၃ မီဂါဝပ်သာ အမျိုးသားမဟာဓာတ်အားလိုင်း နဲ့ ချိတ်ဆက်နိုင်ပါသေးတယ်။ ပြန်လည်ပြည့်ဖြိုးမြဲစွမ်းအင်မှ နောက်ထပ် ၁,၂၆၂ မီဂါဝပ် ထုတ်လုပ်ပေးမယ့် ပရောဂျက် ၃ဝ ကို တည်ဆောက်နေပြီး ၈,၆၆၈ မဂ္ဂါဝပ် ထုတ်ယူဖို့ ပရောဂျက်များကိုလည်း ရှိနေပါသေးတယ်။

ဘင်္ဂလားဒေ့ရှ်ဟာ တရုတ်၊ အိန္ဒိယ၊ ယူအေအီးနိုင်ငံတို့နဲ့ “ဂီဂါဝပ်_ကလပ်” အဖြစ် ပူးပေါင်းပါဝင်ဖို့အတွက် ၁,ဝဝဝ မဂ္ဂါဝပ်ရှိ စက်ရုံ ၃ ခု အပါအဝင် ဆိုလာဓာတ်အားပေးစက်ရုံ တစ်ဒါဇင်ကျော်ကို အလုံးအရင်းနဲ့ တည်ဆောက် အကောင်အထည်ဖော်လျက် ရှိပါတယ်။

ဘင်္ဂလားဒေ့ရှ်နိုင်ငံ အနောက်မြောက်ပိုင်းမှာ တည်ရှိတဲ့ အဆိုပါစက်ရုံဖွင့်ပွဲကို ရန်ဂါပူဇီလာစာသင်ကျောင်း အပြင်ဖက် လူထုအစည်းအဝေးပွဲနဲ့အတူ ကျင်းပခြင်းဖြစ်ပါတယ်။ အစည်းအဝေးကို ဝန်ကြီးချုပ် ရှိတ်ဟာစီနာ ကိုယ်တိုင်တက်ရောက်လာတယ်လို့ သြဂုတ်လ ၃ ရက်က Dhaka Tribune ရဲ့ အခြားသတင်းတစ်ပုဒ်မှာ တွေ့ရှိရပါ တယ်။ 

သူ့ရဲ့ အဝါမီလ်ိခ်ပါတီအစိုးရလက်ထက် အကောင်အထည်ဖော်ခဲ့တဲ့ တိုင်းပြည်ထူထောင်ရေး စီမံကိန်းကြီးများ အကြောင်းကို အသေးစိတ် အကျယ်တဝံ့ပြောကြားသွားပြီး၊ နိုင်ငံဖွံ့ဖြိုးတိုးတက်ရေးအတွက် နေ့မအား ညမအား ကြိုးစားဆောင်ရွက်လျှက်ရှိကြောင်း၊ သူ့ရဲ့ ဖခင် အမျိုးသားခေါင်းဆောင် “ဘင်္ဂလားမိတ်ဆွေ ကြီး_ရှိတ်_မူဂျီ ဘူရ်_ရာမန်“ လို အသက်စွန့်လွှတ်ဖို့ အသင့်ရှိကြောင်း၊ နိုင်ငံအတွက် စေတနာမှန်ကန်စွာ အားကြိုးမာန်တက် ဆောင်ရွက်နေတဲ့ အဝါမီလိခ်ပါတီရဲ့ “လှေ“ သင်္ကေတကို မဲပေးကြဖို့ တက်ရောက်သူ သိန်းချီလူအုပ်ကြီးကို တောင်းဆိုလိုက်ပါတယ်။

အဝါမီလိခ်အစိုးရဟာ ယခင် အိမ်စောင့်အစိုးရလက်ထက် BNP ပါတီခေါင်းဆောင်များကို တရားစွဲဆိုထားပါတယ်။ အတိုက်အခံတို့ရဲ့မဟာမိတ်ပါတီအချို့ကိုလည်း မတရားအသင်းကြေညာခြင်း၊ ၎င်းပါတီခေါင်းဆောင် အတော်များ များကို ၁၉၇၁ ခုနှစ် ဘင်္ဂလားဒေ့ရှ်ဂျီနိုဆိုက်မှုစွပ်စွဲချက်နဲ့ ကြိုးစင်တင် ကွပ်မျက်ခဲ့ပါတယ်။ လျှပ်တပြက် တုံ့ပြန်ရေး တပ် (ခေါ်) RAB အထူးတပ်ကို ခါးပိုက်ဆောင် မွေးမြူထားပြီး နိုင်ငံရေးအတိုက်အခံတို့ကို ဒလကြမ်းဖမ်းဆီးခြင်း၊ အကြမ်းဖက်နှိပ်စက်ခြင်းများ ပြုလုပ်လျက်ရှိတယ်လို့ စွပ်စွဲခြင်း ခံထားရပါတယ်။ 

#ဘင်္ဂလားဒေ့ရှ် #ပြန်လည်ပြည်ဖြိုးမြဲစွမ်းအင် #လေထုညစ်ညမ်းမှု #ရန်ဂါပူရ် #ကျောက်မီးသွေးစွမ်းအင်စက်ရုံ #မြန်မာ #လူထု_နိုင်ငံရေး_ရေချိန်

(Dhaka Tribune., 2 August 2023,” PM Hasina opens Bangladesh’s largest solar park” ကို #HatyOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)