Pika (NSS) - သြဂုတ် ၂

အိန္ဒိယနိုင်ငံရှိ စုံတွဲတစ်တွဲသည်  ခရီးသွားစဉ်အချိန်အတွင်း အင်စတာဂရမ်တွင် ဗီဒီယိုများဖန်တီးရန်အတွက် iPhone 14 ဝယ်ယူရန် ၎င်းတို့၏ (၈)လသားအရွယ် ကလေးငယ်ကို ရောင်းချခဲ့ခြင်းကြောင့် ဖမ်းဆီးခံခဲ့ရကြောင်း သိရသည်။

Appleကုမ္ပဏီ နောက်ဆုံးပေါ် iPhone 14 ကို ဝယ်ယူနိုင်ရန်အတွက် ၎င်းတို့၏ကလေးကို ရောင်းချခဲ့သည့် West Bengal ပြည်နယ်ရှိ လူငယ်စုံတွဲတစ်တွဲအကြောင်းကို အိန္ဒိယမီဒီယာများက ပြီးခဲ့သည့်သီတင်းပတ်တွင် ဖော်ပြခဲ့ ကြောင်း သိရသည်။ Jaydev နှင့် Sathi Ghosh ဟု အမည်ရသောစုံတွဲသည် West Bengal ပြည်နယ်အနှံ့ ခရီးထွက်ခဲ့သလို iPhone 14 အသစ်ဝယ်ယူထားနိုင်ခြင်းကို ၎င်းတို့၏ အိမ်နီးချင်းများက သတိထားမိခဲ့ခြင်းဖြစ် ကြောင်း သိရသည်။ ၎င်းတို့စုံတွဲသည် လစဉ်ဝင်ငွေအနည်းငယ်သာရရှိပြီး ငွေရေးကြေးရေးနှင့်ပတ်သက်ပြီး အခက်အခဲများရှိခဲ့ကြောင်း သိရသည်။ 

ထို့အပြင် ၎င်းတို့၏ (၈)လသားအရွယ် ကလေးငယ်ပျောက်ဆုံးနေခဲ့သည်ကို အိမ်နီးချင်းများက သတိထားမိခဲ့ခြင်း ကြောင့် အာဏာပိုင်များကို အကြောင်းကြားခဲ့ခြင်းဖြစ်ကြောင်း သိရသည်။ ထို့နောက် ရဲတပ်ဖွဲ့၏ စုံစမ်းစစ်ဆေးမှု များအရ မိခင်ဖြစ်သူ Sathi Ghoshက ၎င်းနှင့် ခင်ပွန်းဖြစ်သူ Jaydev တို့သည် ခရီးသွားနေစဉ်အချိန်အတွင်း အင်စတာဂရမ်တွင် ဗီဒီယိုများဖန်တီးရန်အတွက်   iPhone14 ကိုဝယ်ယူရန် ၎င်းတို့၏ ကလေးငယ်ကို အမျိုးသမီး တစ်ဦးထံ ရောင်းချခဲ့ခြင်းဖြစ်ကြောင်း ဝန်ခံပြောခဲ့သည်။ 

ရဲအရာရှိတစ်ဦး က "စစ်ဆေးမေးမြန်းမှုတွေလုပ်ဆောင်တဲ့အချိန်မှာ မိခင်ဖြစ်သူက ပြစ်မှုကျူးလွန်ကြောင်း ဝန်ခံခဲ့ ပါတယ်။ သူမနဲ့ ခင်ပွန်းဖြစ်သူတို့ဟာ အင်စတာဂရမ်မှာ ဗီဒီယိုတွေ ဖန်တီးနိုင်ဖို့အတွက် iPhone 14 ဝယ်ယူဖို့နဲ့ ပြည်နယ်အနှံ့ခရီးထွက်ဖို့ ကလေးကိုရောင်းချခဲ့တာပါ" ဟု ပြောခဲ့သည်။

အိန္ဒိယရှိလူများသည်  iPhone ကိုင်ရရန်အတွက် ရူးသွပ်သောအရာများကို မကြာခဏလုပ်ဆောင်လေ့ရှိကြကြောင်း ရဲတပ်ဖွဲ့က ပြောကြားခဲ့သည်။ ယခင်က အိန္ဒိယအမျိုးသားတစ်ဦးသည် iPhone ဝယ်ယူရန်အတွက် ကျောက်ကပ် တစ်လုံးကို ရောင်းချပြီးနောက် တစ်သက်လုံး မသန်မစွမ်းဖြစ်ခဲ့ရကြောင်း သိရသည်။