Pika (NSS) - သြဂုတ် ၂

ပြီးခဲ့သည့်ရက်ပိုင်းက ဖြစ်ပွားခဲ့သော အာဏာသိမ်းယူမှုနှင့်ပတ်သက်ပြီး နိုင်ဂျာနိုင်ငံသို့ ကူညီပေးနေသည့် အကူအညီများအားလုံးကို  ပြင်သစ်အစိုးရက ဆိုင်းငံ့လိုက်ပြီးနောက် ဇူလိုင်လ(၃ဝ)ရက်တွင် နိုင်ဂျာအစိုးရသည် ပြင်သစ်သို့ ယူရေနီယံနှင့် ရွှေများတင်ပို့မှုကို တားမြစ်ပိတ်ပင်ခဲ့ကြောင်း သိရသည်။

အဆိုပါဆုံးဖြတ်ချက်ကို ဒီမိုကရေစီနည်းကျရွေးကောက်တင်မြှောက်ထားသော နိုင်ဂျာသမ္မတမိုဟာမက်ဘာဇွန်ကို ရာထူးမှ ဖြုတ်ချခဲ့သော စစ်တပ်ခေါင်းဆောင် Abdourahamane Tiani က ဆုံးဖြတ်ခဲ့ခြင်းဖြစ်ကြောင်း သိရသည်။

Niamey မြို့တွင် ပြင်သစ်ဆန့်ကျင်ရေးဆန္ဒပြမှုများအတွင်း ထောင်နှင့်ချီသော စစ်အစိုးရထောက်ခံသူများသည် Abdourahamane Tiani ၏ လုပ်ရပ်ကို ထောက်ခံခဲ့ကြပြီး  ပြင်သစ်အလံများကို မီးရှို့ကာဖျက်ဆီးခဲ့ကြကြောင်း သိရသည်။ ဆန္ဒပြသူတစ်ဦး က "ကျွန်တော်တို့မှာ ယူရေနီယံ၊ စိန်၊ ရွှေ နဲ့ ဆီတွေ အလုံအလောက်ရှိပါတယ်။ ကျွန်တော်တို့ကို လုံခြုံအောင်ထားဖို့ ပြင်သစ်ကို မလိုအပ်ပါဘူး" ဟု ပြောခဲ့သည်။

နိုင်ဂျာနိုင်ငံသည် ကမ္ဘာပေါ်တွင် ယူရေနီယံအများဆုံးထုတ်လုပ်သည့် သတ္တမမြောက်နိုင်ငံဖြစ်ပြီး ကမ္ဘာလုံးဆိုင်ရာ ယူရေနီယံထွက်ရှိမှု စုစုပေါင်း၏ (၅)ရာခိုင်နှုန်းခန့် ထုတ်လုပ်ကြောင်း ကမ္ဘာ့နျူကလီးယားအသင်း၏အဆိုအရ သိရသည်။

ပြင်သစ်နိုင်ငံသည် လျှပ်စစ်ဓါတ်အားထုတ်လုပ်ရန်အတွက် ယူရေနီယံ(၁၅)ရာခိုင်နှုန်း မှ (၁၇)ရာခိုင်နှုန်းအထိ အသုံးပြုကြောင်း ပြင်သစ်မီဒီယာများ က ဖော်ပြခဲ့သည်။ နိုင်ဂျာနိုင်ငံသည် ပြီးခဲ့သည့်နှစ်တွင် ဥရောပသမဂ္ဂသို့ ယူရေနီယံထောက်ပံ့မှု ဒုတိယအများဆုံးနိုင်ငံဖြစ်ခဲ့ကြောင်း ဥရောပအဏုမြူစွမ်းအင်အဖွဲ့အစည်း Euratom က ပြောကြားခဲ့သည်။

ဥရောပသမဂ္ဂတွင် နျူကလီးယားဓါတ်ပေါင်းဖိုများမှာ အသုံးပြုသည့် ယူရေနီယံများ သုံးနှစ်စာ အလုံအလောက်ရှိ သောကြောင့် နိုင်ဂျာအနေဖြင့် ဥရောပသမဂ္ဂသို့ ယူရေနီယံထောက်ပံ့မှုများကို ဆိုင်းငံ့ထားမည်ဆိုလျှင်တောင် နျူကလီးယားဓါတ်အားထုတ်လုပ်ခြင်းအတွက် ခြိမ်းခြောက်မှုများမရှိကြောင်း Euratom က ပြောကြားခဲ့သည်။

ပြင်သစ်နျူကလီးယားစွမ်းအင်ကဏ္ဍအပေါ် Niger ၏ ယူရေနီယံတင်ပို့မှု တားမြစ်ပိတ်ပင်လိုက်ခြင်းသည် ချက်ချင်း အကျိုးသက်ရောက်မှုများရှိမည်မဟုတ်သော်လည်း ကမ္ဘာ့ယူရေနီယံဈေးနှုန်းများ ပိုမိုမြင့်တက်လာနိုင်ဖွယ်ရှိ ကြောင်း ရုရှားနျူကလီးယားသတင်းဝက်ဘ်ဆိုက် Atominfo ၏ အယ်ဒီတာ Alexander Uvarov က ပြောကြားခဲ့ သည်။ အာဏာသိမ်းမှုများဖြစ်ပွားပြီးနောက် နိုင်ဂျာနိုင်ငံတွင်းရှိ ပြင်သစ် နှင့် ဥရောပနိုင်ငံသားများကို ကယ်ဆယ် ရွှေ့ပြောင်းရေးများ လုပ်ဆောင်သွားမည်ဖြစ်ကြောင်း ပြင်သစ်အစိုးရက ထုတ်ပြန်ကြေညာခဲ့သည်။ ထို့နောက်  နိုင်ဂျာနိုင်ငံတွင်းမှ ထွက်ခွာလာသူ(၂၆၂)ဦးကို သယ်ဆောင်လာသည့် ပြင်သစ်၏ ပထမဆုံးလေယာဉ်သည် ဩဂုတ်လ(၂)ရက် နံနက်(၁)နာရီခွဲအချိန်တွင် ပဲရစ်မြို့ရှိ Roissy Charles de Gaulle လေဆိပ်သို့ ဆင်းသက်ခဲ့ ကြောင်း သတင်းရင်းမြစ်တစ်ခု က ပြောကြားခဲ့သည်။ 

ပြင်သစ်နိုင်ငံခြားရေးဝန်ကြီးကတ်သရင်းကိုလွန်နာ က "အဲဒီလေယာဉ်ပေါ်မှာ ကလေးငယ်တစ်ဒါဇင် အပါအဝင် လူပေါင်း (၂၆၂)ဦး လိုက်ပါခဲ့ပါတယ်" ဟု ပြောခဲ့သည်။ နိုင်ဂျာနိုင်ငံသည် (၁၉၂၂)ခုနှစ်မှ စတင်ကာ  ပြင်သစ် လက်အောက်ခံ ကိုလိုနီနယ်မြေတစ်ခုဖြစ်ခဲ့ပြီး (၁၉၆ဝ) ခုနှစ်တွင် လွတ်လပ်ရေးရရှိခဲ့ကြောင်း သိရသည်။