Pika (NSS) - သြဂုတ် ၁ 

ပါကစ္စတန်နိုင်ငံ Khyber Pakhtunkhwa ပြည်နယ်တွင် ဇူလိုင်လ(၃ဝ)ရက်က Jamiat Ulema-e-Islam (JUI) ပါတီ၏ မဲဆွယ်စည်းရုံးပွဲတွင် ဖြစ်ပွားခဲ့သော တိုက်ခိုက်မှုသည် ၎င်းတို့၏ လက်ချက်ဖြစ်ကြောင်း ISIS အကြမ်းဖက်အဖွဲ့က ထုတ်ဖော်ပြောခဲ့သည်။ 

အသေခံဗုံးခွဲမှုတွင် တာလီဘန်ခွဲထွက်အဖွဲ့များလည်း ပါဝင်နိုင်ချေရှိသည်ဆိုသည့် ခန့်မှန်းမှုများနှင့်အတူ ISIS အကြမ်းဖက်အဖွဲ့လည်း ပါဝင်နိုင်သည်ဟု ပါကစ္စတန်ရဲတပ်ဖွဲ့က သံသယရှိပြီးဖြစ်ကြောင်း သိရသည်။ Khar မြို့တွင် ကျင်းပသော မဲဆွယ်စည်းရုံးပွဲတွင် လူပေါင်း(၁ဝဝဝ)ခန့်ရှိနေပြီး Jamiat Ulema-e-Islam (JUI) ပါတီ ခေါင်းဆောင် Fazal-ur-Rehman မိန့်ခွန်းပြောရန်စီစဉ်ထားသည့် စင်မြင့်အနီးတွင် အသေခံဗုံးခွဲမှု ဖြစ်ပွားခဲ့ခြင်းဖြစ် သည်။ 

ဇူလိုင်လ(၃၁)ရက် ညနေပိုင်းအထိ သေဆုံးသူဦးရေမှာ(၅၄)ဦးထိ မြင့်တက်လာခဲ့ပြီး ၎င်းတို့ထဲမှ (၂၃)ဦးမှာ အသက် (၁၈) နှစ်အောက်များဖြစ်ကြောင်း အကြမ်းဖက်မှုတုံ့ပြန်ရေးအရာရှိ Shaukat Abbas က ပြောကြားခဲ့သည်။ အာဖဂန်နစ္စတန်နိုင်ငံမှ အမေရိကန်တပ်ဖွဲ့များဆုတ်ခွာသွားသော ၂ဝ၂၁ ခုနှစ် ဩဂုတ်တွင်ဖြစ်ပွားခဲ့သည့် အမေရိကန်စစ်သား (၁၃)ဦး နှင့် အာဖဂန်နစ္စတန်နိုင်ငံသား အများအပြားသေဆုံးစေခဲ့သည့် အသေခံဗုံးခွဲ တိုက်ခိုက်မှုနောက်ကွယ်တွင်လည်း ISIS အကြမ်းဖက်အဖွဲ့ ပါဝင်ခဲ့ကြောင်းသိရသည်။ Peshawar မြို့တွင် ယခုနှစ်အစောပိုင်းကဖြစ်ပွားခဲ့သော လူအသေအပျောက်များသည့် ဗုံးခွဲမှုနှစ်ခုနှင့်ပတ်သက်ပြီး TPP ဟု လူသိများသော တာလီဘန်ခွဲထွက်အဖွဲ့က လုပ်ဆောင်ခဲ့သည်ဟု  ပါကစ္စတန်အာဏာပိုင်များ က ယုံကြည်နေကြ သည်။ 

ဇန်နဝါရီလတွင် ဗလီတစ်ခုအတွင်း ဗုံးပေါက်ကွဲမှုကြောင့် လူ(၇၄)ဦးသေဆုံးခဲ့ပြီး ဖေဖော်ဝါရီလအတွင်း ဗလီတစ်ခုကို ပစ်မှတ်ထားတိုက်ခိုက်သည့် ဗုံးခွဲတိုက်ခိုက်မှုအတွင်း ရဲအရာရှိ(၁ဝဝ)ကျော် သေဆုံးခဲ့ကြောင်း သိရသည်။ ၂ဝ၁၄ ခုနှစ်က Peshawar မြို့ရှိ ကျောင်းတစ်ခုတွင် လူ(၁၄၇)ဦးသေဆုံးစေခဲ့သည့် ဗုံးခွဲမှုနောက်ကွယ် တွင်လည်း တာလီဘန်ခွဲထွက်အဖွဲ့ TTP ပါဝင်ခဲ့ကြောင်း သိရသည်။

အာဖဂန်နစ္စတန်အခြေစိုက် တာလီဘန်အဖွဲ့သည် အာဖဂန်နစ္စတန်အခြေစိုက်တာလီဘန်အဖွဲ့ပြောရေးဆိုခွင့်ရှိသူ က ဇူလိုင်လ(၃ဝ)ရက်တွင် Kharမြို့ ၌ဖြစ်ပွားခဲ့သော အသေခံဗုံးခွဲတိုက်ခိုက်မှုကို ပြစ်တင်ရှုတ်ချခဲ့ပြီး အဆိုပါ ရာဇဝတ်မှုများကို တရားမျှတသည့်နည်းလမ်းဖြင့် ဖြေရှင်း၍မရကြောင်း ထုတ်ဖော်ပြောကြားခဲ့သည်။