Pika (NSS) - သြဂုတ် ၁ 

ပြင်သစ်နိုင်ငံတွင် ထောင်ကျနေသူဦးရေမှာ(၇၄၅၁၃)ထိ ရှိလာခဲ့ပြီး စံချိန်တင်အမြင့်ဆုံးသို့ရောက်ရှိခဲ့ကြောင်း ပြင်သစ်တရားရေးရာဝန်ကြီးဌာနက ထုတ်ပြန်သောစာရင်းဇယားများအရ သိရသည်။ 

ပြင်သစ်နိုင်ငံသည် ၂ဝ၂၂ ခုနှစ် နှစ်ကုန်ပိုင်းမှ စတင်ပြီး လတိုင်း ၎င်း၏ အကျဉ်းသားဦးရေမှတ်တမ်းစံချိန်ကို ခြောက်ကြိမ် ချိုးဖျက်ခဲ့ကြောင်း သိရသည်။ ပြင်သစ်နိုင်ငံတွင် ကိုဗစ်ကာလအတွင်း အကျဉ်းသားဦးရေ လျှော့ချရန် အတွက် အကျဉ်းသား(၁ဝဝဝဝ)ခန့်ကို လွှတ်ပေးခဲ့ပြီးနောက် ၂ဝ၂ဝ ပြည့်နှစ်နောက်ပိုင်း အကျဉ်းသားဦးရေ (၁၅၈၁၈) ဦး ရှိခဲ့ပြီး ပြီးခဲ့သည့်နှစ်တွင် နောက်ထပ်(၂၄၄၆)ဦး ထပ်တိုးလာခဲ့ကြောင်း သိရသည်။

၂ဝ၂၃ ခုနှစ် ဧပြီလတွင် ပြင်သစ်နိုင်ငံ၏ အကျဉ်းသားဦးရေသည် ပထမဆုံးအကြိမ်အဖြစ် အကျဉ်းသား (၇၃ဝဝဝ) ကျော်ခဲ့ကြောင်း သိရသည်။ အကျဉ်းထောင်အတွင်း နေထိုင်မှုနှုန်းသည် (၁၂၂ ဒသမ ၈) ရာခိုင်နှုန်းထိ မြင့်တက်လာ ခဲ့ပြီး ယာယီအကျဉ်းကျနေသူများနှင့် ထောင်ဒဏ်လျှော့ထားသော အကျဉ်းသားများထားရှိသည့် အဆောက်အဦး များတွင် နေထိုင်မှုနှုန်းမှာ (၁၄၆ ဒသမ ၃) ရာခိုင်နှုန်းထိ မြင့်တက်လာခဲ့ကြောင်း သိရသည်။ 

ရလဒ်များအရ အကျဉ်းသား(၂၄၇၈)ဦးသည် အိပ်ရန်ကုတင်များ မရှိသည့်အပြင် ကြမ်းပြင်များပေါ်တွင် မွေ့ယာများ ခင်းအိပ်ရကြောင်း သိရသည်။ ပြင်သစ်နိုင်ငံရှိ အကျဉ်းထောင်များတွင် လူဦးရေ အလွန်များပြားနေသည့်အပြင် အကျဉ်းသားဦးရေမြင့်တက်နေခြင်းကို ဥရောပလူ့အခွင့်အရေးတရားရုံးက ပြစ်တင်ရှုတ်ချထားကြောင်း သိရသည်။ ပြင်သစ်အစိုးရသည် ၂ဝ၂၇ ခုနှစ်တွင် နောက်ထပ်အကျဉ်းထောင် ကုတင်(၁၅ဝဝဝ) ထပ်တိုးရန် ကတိပြုခဲ့သော် လည်း ဥရောပလူ့အခွင့်အရေးတရားရုံးက ထပ်မံပြစ်တင်ရှုတ်ချခဲ့ကြောင်း သိရသည်။

ပြင်သစ်နိုင်ငံတွင် ဆယ်ကျော်သက်လူငယ်တစ်ဦးကို ရဲအရာရှိတစ်ဦးက ပစ်သတ်ခဲ့ပြီးနောက် နိုင်ငံအတွင်း ဆန္ဒပြပွဲ များဖြစ်ပွားခဲ့ပြီး အခြေအနေများ ပိုမိုဆိုးရွားလာခဲ့ကြောင်း သိရသည်။ အဆိုပါဆန္ဒပြပွဲများကြောင့် ယူရိုသန်း (၆၅ဝ) တန်ဖိုးရှိ ပျက်စီးဆုံးရှုံးမှုများရှိခဲ့ပြီးနောက် ပြင်သစ်အစိုးရသည် ရဲအရာရှိ(၄၅ဝဝဝ) ခန့်ကို ဖြန့်ကျက်ချထားခဲ့ ကြောင်း France Assureurs အဖွဲ့က ပြောကြားခဲ့သည်။

ဆန္ဒပြပွဲများအတွင်း လူပေါင်း(၄ဝဝဝ)ကျော်ကို ဖမ်းဆီးထိန်းသိမ်းခဲ့ပြီး ၎င်းတို့အနက်မှ(၁၂ဝဝ)မှာ အရွယ်မရောက် သေးသူများဖြစ်ကြောင်း သိရသည်။ ပြင်သစ်အာဏာပိုင်များသည် ပဲရစ်မြို့တွင် ကျင်းပမည့် ၂ဝ၂၄ ခုနှစ် အိုလံပစ် အားကစားပြိုင်ပွဲအတွက် ရာဇဝတ်မှုကင်းစင်သောမူဝါဒကို မြှင့်တင်ထားသောကြောင့် အကျဉ်းသားများ ပိုမို များပြားလာနိုင်ဖွယ်ရှိကြောင်း အကျဉ်းသားထောက်ခံအားပေးရေးအဖွဲ့ Observatoire International des Prisons က သတိပေးပြောခဲ့သည်။