Pika (NSS) - သြဂုတ် ၁ 

အမေရိကန်နိုင်ငံသားများသည် ၎င်းတို့၏နိုင်ငံ စစ်တပ်အပေါ် ယုံကြည်မှုများ တစ်ဖြည်းဖြည်းကျဆင်းလာနေပြီး (၁၉၉၇) ခုနှစ်နောက်ပိုင်း အနိမ့်ဆုံးကျဆင်းသွားခဲ့ကြောင်း Gallup ကုမ္ပဏီက ထုတ်ပြန်ခဲ့သည့် စစ်တမ်းတစ်ခုအရ သိရသည်။

ပြီးခဲ့သည့်(၂)နှစ်အတွင်း အမေရိကန်စစ်တပ်အပေါ် ယုံကြည်မှုများ(၁ဝ)မှတ် ကျဆင်းသွားပြီးနောက် အမေရိကန် စစ်တပ်သည် လက်ရှိအချိန်တွင် လူသစ်စုဆောင်းရေးနှင့်ပတ်သက်ပြီး အခက်အခဲများနှင့်ရင်ဆိုင်နေရကြောင်း သိရသည်။ 

ဇွန်လတွင် ပြုလုပ်ခဲ့သောစစ်တမ်းတစ်ခုအရ ဖြေဆိုသူများ၏(၆ဝ)ရာခိုင်နှုန်းသည် စစ်တပ်အပေါ် ယုံကြည်မှုများ ကျဆင်းနေပြီး ပြီးခဲ့သည့်နှစ်က ကောက်ယူထားသောစစ်တမ်း (၆၄)ရာခိုင်နှုန်းထက် ပိုမိုကျဆင်းသွားကြောင်း သိရသည်။ အမေရိကန်စစ်တပ်အပေါ် လူထု၏ ယုံကြည်မှုသည် (၁၉၉၇)ခုနှစ်တွင် (၆ဝ)ရာခိုင်နှုန်းသို့ ကျဆင်းသွား ခဲ့ပြီး (၁၉၈၈)ခုနှစ် နောက်ပိုင်းတွင် (၅၈)ရာခိုင်နှုန်းထိ ကျဆင်းသွားခဲ့ကြောင်း သိရသည်။

အမေရိကန်နိုင်ငံတွင် (၂ဝဝ၁)ခုနှစ်က 9/11 တိုက်ခိုက်မှု ဖြစ်ပွားပြီးနောက် အမေရိကန်စစ်တပ်အပေါ် လူထု ထောက်ခံမှုများ မြင့်တက်ခဲ့ပြီး (၂ဝဝ၃)ခုနှစ်တွင် အမေရိကန်သမ္မတဂျော့ဘုရှ်  အီရတ်ကို ကျူးကျော်တိုက်ခိုက်ပြီး နောက် စစ်တပ်သည် လူထုထောက်ခံမှု(၈၂)ရာခိုင်နှုန်းထိ ရရှိခဲ့ကြောင်း သိရသည်။

ရီပတ်ဘလစ်ကန်ပါတီဝင်များရဲ့စစ်တပ်အပေါ်ယုံကြည်မှုသည် ဒီမိုကရက်တစ်ပါတီဝင်များထက် ပိုမိုများပြားသော် လည်း စစ်တပ်အပေါ် ရီပတ်ဘလစ်ကန်ပါတီဝင်များ၏ ယုံကြည်မှုသည် ၂ဝ၂ဝ ပြည့်နှစ်တွင် (၉၁)ရာခိုင်နှုန်းမှ (၆၈) ရာခိုင်နှုန်းထိ ကျဆင်းသွားခဲ့ကြောင်း သိရသည်။ အမေရိကန်ကြည်းတပ်၊ လေတပ် နှင့် ရေတပ်တို့မှ ခေါင်းဆောင် များသည် (၁၉၇၃)ခုနှစ် မူကြမ်းဖျက်သိမ်းပြီးတည်းက ပြီးခဲ့သည့်နှစ်တွင် လူသစ်စုဆောင်းရေးနှင့်ပတ်သက်ပြီး အဆိုးရွားဆုံးနှစ်ကို ကြုံတွေ့ခဲ့ရကြောင်း သိရသည်။

အဆိုပါအချက်ကြောင့် ၎င်းတို့၏ စစ်သားစုဆောင်းရေးသည် မျှော်မှန်းထားသည်ထက် ပိုမိုနည်းပါးမည်ဟု ခန့်မှန်းထားကြောင်း ယခုနှစ် မတ်လတွင်ပြုလုပ်သော လွှတ်တော်ကြားနာပွဲအတွင်း ပြောကြားခဲ့ကြသည်။ အမေရိကန်စစ်ဌာနချုပ်ပင်တဂွန်၏ လေ့လာမှုတစ်ခုအရ အသက်(၁၇)နှစ်မှ (၂၄)နှစ်ကြားရှိ လူ(၈ဝ) ရာခိုင်နှုန်း သည် အဝလွန်ခြင်း၊ မူးယစ်ဆေးဝါးသုံးစွဲခြင်း (သို့မဟုတ်) စိတ်ကျန်းမာရေးချို့တဲ့ခြင်းတို့ကြောင့် စစ်မှုထမ်းရန် မသင့်လျော်ကြောင်း သိရသည်။ အသက်(၁၇)နှစ်မှ (၂၄)နှစ်ကြားရှိ လူ(၉)ရာခိုင်နှုန်းလောက်ကသာ စစ်တပ်တွင် တာဝန်ထမ်းဆောင်ရန် စိတ်ဝင်စားကြကြောင်း စစ်တပ်အတွင်းဝန် Christine Wormuth က ထုတ်ဖော်ပြောကြား ခဲ့သည်။