NSS - ဇူလိုင် ၃၁

ကရင်ပြည်နယ်၊ ဘားအံမြို့၊ သံလွင်တံတားစစ်ဆေးရေးဂိတ်၌ ပြင်းထန်သော ကားဗုံးပေါက်ကွဲမှုဖြစ်ပွားခဲ့ရာ (၂)ဦးထက်မနည်းသေဆုံးခဲ့ပြီး ထိခိုက်ဒဏ်ရာရသူ အများအပြားရှိနေကြောင်း သတင်းရရှိသည်။

ဖြစ်စဉ်မှာ ယနေ့(ဇူလိုင်လ ၃၁ ရက်)၊ နံနက် ၆ နာရီ ၄၀ မိနစ်အချိန်တွင် သံလွင်တံတား(တရုတ်လှ)ဘက်ခြမ်းရှိ စစ်ဆေးရေးဂိတ်၌ အထက်ပါကဲ့သို့ ကားဗုံးပေါက်ကွဲမှုဖြစ်ပွားခဲ့ခြင်းဖြစ်ကြောင်း ဒေသခံများနှင့်လုံခြုံရေးအဖွဲ့ဝင်များက NSS ကိုပြောသည်။

၎င်းစစ်ဆေးရေးဂိတ်၌ Honda Fit အမျိုးအစား အဖြူရောင်ကားတစ်စီးကို လုံခြုံရေးပူးပေါင်းအဖွဲ့ဝင်များက စစ်ဆေးနေစဉ်အချိန်တွင် ယင်းကားအတွင်းမှ ရုတ်တရက်ပြင်းထန်စွာ ပေါက်ကွဲခဲ့ခြင်းဖြစ်သည်။

“အဲဒီကားက လီဗာကို အလေးတင်ပြီးတော့ လူမပါဘဲ လွှတ်လိုက်တာ အဲဒီကားက တစ်ခြားကားတွေကို ဝင်တိုက်လို့ ယာဉ်ထိန်းရဲက ကားကိုစစ်ဖို့ ကားရဲ့ရှေ့တံခါးကို ဖွင့်တဲ့အချိန်မှာ ပေါက်ကွဲခဲ့တာလို့ လော လောဆယ် သိရတယ်။ အဲဒီယာဉ်ထိန်းရဲလည်း ဆုံးသွားတယ်။ နောက်ခရီးသွားတစ်ဦးလည်း ဆုံးသွားတယ်လို့ သိရတယ်”ဟု လုံခြုံရေးအဖွဲ့ဝင်တစ်ဦးက NP News ကို ပြောသည်။

သံလွင်တံတားစစ်ဆေးရေးဂိတ်၌ ပေါက်ကွဲမှုဖြစ်စဉ်သည် ပြင်းထန်စွာဖြစ်ပွားခဲ့ခြင်းဖြစ်ပြီး ထိခိုက်မှုနှင့် ပျက်စီးမှုများပြားကြောင်းလည်း တံတားအနီးတွင် နေထိုင်သည့် ဒေသခံတစ်ဦးက NP News ကိုပြော သည်။

“အခုမနက်မိုးရွာနေတုန်းအသံကြားရတာ၊ သွားကြည့်တဲ့အချိန်ကြတော့ လုံခြုံရေး တာဝန်ယူထားတဲ့သူတွေထိခိုက်တယ်လို့ပြောတယ်။ မော်တော်ပီကယ်နဲ့နှစ်ယောက် သေတယ်ကြားတယ်။ အပျက်အစီးတော်တော်များတယ်။ ကားဗုံးခွဲတာလို့ပြောတယ်။ ဗုံးကတော်တော်ပြင်းတယ်”ဟု အထက်ပါဒေသခံက ပြောသည်။

ထိုကဲ့သို့ ကားဗုံးပေါက်ကွဲမှုဖြစ်စဉ်အတွင်း ကားအားစစ်ဆေးရန် တံခါးဆွဲဖွင့်ခဲ့သော ယာဉ်ထိန်းရဲတပ်ကြပ်ကြီးဖြစ်သူ မျိုးမျိုးနှင့် အရပ်သားခရီးသွားပြည်သူတစ်ဦး ထိခိုက်သေဆုံးခဲ့ကြောင်း ကနဦးသတင်းများအရ သိရှိရသည်။

ထို့ပြင် ကားဗုံးပေါက်ကွဲမှုဖြစ်စဉ်အတွင်း တံတားလုံခြုံရေးပူးပေါင်းအဖွဲ့မှ တပ်ကြပ်ကြီး မင်းထွန်းဇော်အပါအဝင် လုံခြုံရေးအဖွဲ့ဝင်(၆)ဦးထက်မနည်း ထိခိုက်ဒဏ်ရာများရရှိခဲ့ပြီး ၎င်းတို့အနက် အသက်အန္တရာယ်စိုးရိမ်ရသည့် လုံခြုံရေးအဖွဲ့ဝင်များလည်း ရှိနေကြောင်း သိရသည်။

အလားတူ ယင်းပေါက်ကွဲမှုဖြစ်စဉ်အတွင်း အရပ်သားများဖြစ်ကြသည့် အမျိုးသား(၂)ဦးနှင့် အမျိုးသမီး (၁)ဦးတို့သည်လည်း ထိခိုက်ဒဏ်ရာများရရှိခဲ့ကြောင်း သိရသည်။

လက်ရှိတွင် ဖြစ်စဉ်၌ ထိခိုက်ဒဏ်ရာရရှိခဲ့သူများကို လူနာတင်ယာဉ်များဖြင့် ဆေးရုံသို့ ပို့ဆောင်ကုသပေးလျက်ရှိကြောင်း သိရသည်။

ဘားအံမြို့ သံလွင်တံတားစစ်ဆေးရေးဂိတ်၌ ယခုကဲ့သို့ ကားဗုံးပေါက်ကွဲမှုဖြစ်ပွားခဲ့ပြီးနောက် လုံခြုံရေးအဖွဲ့ဝင်များအနေဖြင့် ပိတ်ဆို့စစ်ဆေးမှုများလည်း ပြုလုပ်လျက်ရှိကြောင်း ဒေသခံများက ပြောသည်။