ယွန်း (NSS) - ဇူလိုင် ၂၂

နိုင်ငံကူးလက်မှတ်ပျောက်ဆုံးသူများအနေဖြင့် နိုင်ငံပိုင်သတင်းစာတွင် ပျောက်ဆုံးကြောင်း ထည့်သွင်းကြော်ငြာပြီး (၆)လအကြာတွင်  အသစ်ပြန်လည် လျှောက်ထားနိုင်ကြောင်း မြန်မာနိုင်ငံကူးလက်မှတ်ထုတ်ပေးရေးရုံးက ထုတ်ပြန်ထားသည်။

မြန်မာနိုင်ငံကူးလက်မှတ်ထုတ်ပေးရေးရုံးက ယမန်နေ့ (ဇူလိုင် ၂၁ ရက်) တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

မြန်မာနိုင်ငံသားများ ပြည်ပနိုင်ငံများသို့ သွားရောက်နိုင်ရေးအတွက် နိုင်ငံကူးလက်မှတ်လျှောက်ထားမှုများကို အဆင်ပြေစေရန် မြန်မာနိုင်ငံကူးလက်မှတ်ထုတ်ပေးရေးအဖွဲ့မှ ဆောင်ရွက်ပေးလျက်ရှိကြောင်း သိရသည်။

လက်ရှိတွင် လစဥ် ပြည်တွင်း၊ ပြည်ပ၌ နိုင်ငံကူးလက်မှတ် ပျောက်ဆုံး၊ ပျက်စီး၍ ပြန်လည်လျှောက်ထားသူများပြားလျက်ရှိကြောင်း ထုတ်ပြန်ချက်အရ သိရသည်။

ထို့ကြောင့် ပြည်တွင်း၌ ပျောက်ဆုံးသူများအနေဖြင့် ပြန်လည်လျှောက်ထားမည်ဆိုပါက သက်ဆိုင်ရာ ရပ်ကွက်/ ကျေးရွာ အုပ်ချုပ်ရေးမှူး ထောက်ခံချက်၊ ‌ပျောက်ဆုံးကြောင်း ရဲစခန်းထောက်ခံချက်တို့ဖြင့် နိုင်ငံပိုင်သတင်းစာ တစ်ခုခုတွင် နိုင်ငံကူးလက်မှတ်ပြန်ရရေးအတွက် အမည်၊ အဘအမည်၊ နိုင်ငံသားစိစစ်ရေးကတ်အမှတ်၊ ပျောက်ဆုံးနိုင်ငံကူးလက်မှတ်အမှတ်တို့အား မှန်ကန်စွာထည့်သွင်းကြော်ငြာရမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

သို့ဖြစ်၍ မနက်ဖြန်(ဇူလိုင် ၂၃ ရက်) မှစ၍ သတင်းစာတွင်ကြော်ငြာပါပြီး (၆)လအကြာတွင် သတင်းစာမူရင်းနှင့် အတူ မြန်မာနိုင်ငံကူးလက် မှတ်ထုတ်ပေးရေးရုံးများသို့ သွားရောက်၍ ပြည်တွင်းတွင် အမှန်တကယ်ပျောက်ဆုံး ကြောင်း ခံဝန်ကတိပြုလက်မှတ်ရေးထိုးရမည်ဖြစ်ကြောင်း မြန်မာနိုင်ငံကူးလက်မှတ်ထုတ်ပေးရေးရုံးမှ ဆိုထား သည်။

ထို့နောက် စာအုပ်ဖိုး(၃၅ဝဝဝ)ကျပ် အပါအဝင် ပျောက်ဆုံး/ပျက်စီး ဒဏ်ကြေးငွေ(၅၆ဝဝဝ)ကျပ် စုစုပေါင်း (၉၁ဝဝဝ)ကျပ်ကို ပေးဆောင်ပြီး နိုင်ငံကူးလက်မှတ်အသစ် ပြန်လည်လျှောက်ထားရန် ထုတ်ပြန်ထားသည်။

ထို့ပြင် နိုင်ငံကူးလက်မှတ် စွန်းထင်းခြင်း၊ ရေစိုခြင်း၊ ရေးခြစ်ထားခြင်းတို့ကြောင့် ပျက်စီးခြင်းများဖြစ်ပွား၍ ပြည်ပ သို့ထွက်ခွာနိုင်ရေး ပြန်လည်လျှောက်ထားမည်ဆိုပါက ပျက်စီးသည့်စာအုပ်နှင့်အတူ အထက်ပါအတိုင်း ငွေကျပ် (၉၁ဝဝဝ)ပေးဆောင်ပြီး နိုင်ငံကူးလက်မှတ် ထုတ်ပေးရေးရုံး/ရုံးခွဲများတွင် လျှောက်ထားနိုင်ကြောင်း ထည့်သွင်း ထုတ်ပြန်ထားသည်။

အလားတူ ပြည်ပတွင် ရောက်ရှိနေသည့် မြန်မာနိုင်ငံသားများအနေဖြင့် နိုင်ငံကူးလက်မှတ် ပျက်စီး/‌ပျောက်ဆုံး ခြင်းများ ဖြစ်ပေါ်ပါက စာရွက်စာတမ်းများနှင့်အတူ သက်ဆိုင်ရာသံရုံးသို့သွား၍ စာအုပ်တန်ဖိုး အမေရိကန်ဒေါ်လာ (၃၅)ဒေါ်လာ၊ ပျောက်ဆုံးဒဏ်ကြေးအဖြစ် အမေရိကန်ဒေါ်လာ(၁ဝ၅)ဒေါ်လာ စုစုပေါင်းဒေါ်လာ(၁၄ဝ)ဒေါ်လာ နှင့်ညီမျှသည့် သက်ဆိုင်ရာနိုင်ငံများ၏ ငွေကြေးတန်ဖိုးအတိုင်းပေး သွင်းပြီး အသစ်ပြန်လည်လျှောက်ထားနိုင် ကြောင်း သိရသည်။

ထို့ပြင် ပြည်ပနိုင်ငံများ၌ နိုင်ငံကူးလက်မှတ်‌ပျောက်ဆုံးခဲ့ပြီး မြန်မာနိုင်ငံသို့ ပြန်လည်ဝင်‌ရောက်ပါက နိုင်ငံကူး လက်မှတ်အသစ်ပြန်လည်လျှောက်ထားလိုပါက မြန်မာနိုင်ငံကူးလက်မှတ်ထုတ်ပေးရေးရုံးများတွင် ပြင်ပပျောက် ဒဏ်ကြေး အမေရိကန်ဒေါ်လာ(၁ဝ၅)ဒေါ်လာနှင့်ညီမျှသော မြန်မာငွေ(ဗဟိုဘဏ်သက်မှတ်သည့်နှုန်းထား) နှင့် စာအုပ်ဖိုးငွေကျပ်(၃၅ဝဝဝ)ပေးသွင်းပြီး ပြန်လည်လျှောက်ထားနိုင်ကြောင်း သိရသည်။

နိုင်ငံကူးလက်မှတ်လာရောက် လျှောက်ထားသူများအနေဖြင့် ပျောက်ဆုံးပြီး အသစ်ပြန်လည်လျှောက်ထားရာ၌ အချက်အလက်များ လိမ်လည်ဖော်ပြသည်ကို စိစစ်တွေ့ရှိပါက ထိရောက်စွာအရေးယူသွားမည်ဖြစ်ကြောင်း မြန်မာနိုင်ငံကူးလက်မှတ်ထုတ်ပေးရေးရုံးမှ ထုတ်ပြန်ထားသည်။