Pika (NSS) - ဇူလိုင် ၂၁ 

တောင်ကိုရီးယားတွင် အမေရိကန်၏လေယာဉ်တင်သင်္ဘောများ၊ ဗုံးကြဲလေယာဉ်များ နှင့် ဒုံးကျည် ရေငုပ်သင်္ဘော များ ဖြန့်ကျက်ချထားမည်ဆိုပါက နျူကလီးယားလက်နက်များဖြင့် လက်တုံ့ပြန်မည်ဟု မြောက်ကိုရီးယားဖက်က သတိပေးပြောဆိုခဲ့ကြောင်း နိုင်ငံပိုင်မီဒီယာ KCNA က ဖော်ပြခဲ့သည်။ 

အကြိမ်ကြိမ်သတိပေးမှုများရှိနေသော်လည်း အမေရိကန်နှင့် တောင်ကိုရီးယားတို့သည် ဇူလိုင်လ(၁၈)ရက်တွင် မြောက်ကိုရီးယားအပေါ် နျူကလီးယားလက်နက်များအသုံးပြုရန်အတွက် နျူကလီးယားအတိုင်ပင်ခံအဖွဲ့အစည်း အဝေးကို ကျင်းပခဲ့ကြောင်း မြောက်ကိုရီးယားဖက် က စွပ်စွဲပြောဆိုခဲ့သည်။

မြောက်ကိုရီးယားကာကွယ်ရေးဝန်ကြီး Kang Sun-nam က "နှစ်ပေါင်း(၄ဝ)အတွင်းမှာ အမေရိကန်ဟာ ကိုရီးယား ကျွန်းဆွယ်ကို နျူကလီးယားစွမ်းအင်သုံး ပဲ့ထိန်းဒုံးကျည်တပ်ဆင်ထားတဲ့ ရေငုပ်သင်္ဘောစေလွှတ်ပြီး မြောက်ကိုရီးယားကို တိုက်ရိုက်နျူကလီးယားခြိမ်းခြောက်မှုတွေလုပ်နေတာပါ။ ဒါက ကိုရီးယားကျွန်းဆွယ်မှာ မဟာဗျူဟာမြောက်နျူကလီးယားလက်နက်ကို ဖြန့်ကျက်ချထားတာလို့ဆိုလိုတာပါ" ဟု ပြောခဲ့သည်။

မြောက်ကိုရီးယားအပေါ် နျူကလီးယားတိုက်ခိုက်မှုများ လုပ်ဆောင်လာနိုင်သည့် အမေရိကန်၏ လုပ်ရပ်များသည် အရေးအကြီးဆုံးအဆင်သို့ရောက်ရှိနေပြီဖြစ်ကြောင်း Kang Sun-nam က ပြောကြားခဲ့သည်။

တောင်ကိုရီးယားနိုင်ငံတွင် အမေရိကန်၏ ရေငုပ်သင်္ဘောတစ်စင်း ဆိုက်ကပ်ပြီးနောက် လက်တုံ့ပြန်သည့်အနေဖြင့် မြောက်ကိုရီးယားသည်  ဂျပန်ပင်လယ်ထဲသို့ ပဲ့ထိန်းဒုံးကျည်နှစ်စင်း စမ်းသပ်ပစ်လွှတ်ခဲ့ကြောင်း သိရသည်။ အမေရိကန် နှင့် တောင်ကိုရီးယားတို့၏ ပူးတွဲစစ်ရေးလေ့ကျင့်မှုများ၊ မြောက်ကိုရီးယား၏ ဒုံးကျည် စမ်းသပ်ပစ်လွှတ်မှုများ အပါအဝင် အမေရိကန်နှင့် မြောက်ကိုရီးယားနိုင်ငံကြား တင်းမာမှုများမှာ ပြီးခဲ့သည့်လများ အတွင်း ပိုမိုမြင့်တက်လာခဲ့ကြောင်း သိရသည်။ ခြိမ်းခြောက်မှုများ တိုးမြင့်လာနေသည့်ကြားက မြောက်ကိုရီးယား ၏ နျူကလီးယားလက်နက်အစီအစဉ်များအပြင် စစ်ရေးစွမ်းရည်များကို ဆက်လက်ပြသနေခြင်းသည်   ဒေသ အတွင်းတွင် ငြိမ်းချမ်းရေးနှင့် တည်ငြိမ်ရေးကို ရရှိစေမည်ဖြစ်ကြောင်း မြောက်ကိုရီးယားအရာရှိများ က ပြောခဲ့သည်။

အမေရိကန်ဖက်တာဝန်ရှိသူများက မြောက်ကိုရီးယား၏နျူကလီးယားအစီအစဉ်နှင့်ပတ်သက်ပြီး ဆွေးနွေးမှုများ လုပ်ဆောင်ရန် ဆန္ဒရှိကြောင်း အခိုင်အမာပြောဆိုထားပြီး တောင်ကိုရီးယားနှင့်ပူးတွဲစစ်ရေးလေ့ကျင့်မှုများ လုပ်ဆောင်ခြင်းသည် မြောက်ကိုရီးယား၏ ဖြစ်နိုင်ချေရှိသော တိုက်ခိုက်မှုများကို ဟန့်တားခြင်းမျိုးသာဖြစ်ကြောင်း ပြောထားသည်။