ယွန်း (NSS) - ဇူလိုင် ၂၀ 

ဂျပန်နိုင်ငံတွင် ပညာသင်ကြားနေသည့် မြန်မာကျောင်းသားများအနေဖြင့် အာဆီယံ-ဂျပန်ချစ်ကြည်ရင်းနှီးမှုနှင့်ပူးပေါင်းဆောင်ရွက်မှု နှစ် ၅၀ ပြည့်အထိမ်းအမှတ်တွင် Presentation Contest ဝင်ရောက်ယှဥ်ပြိုင်နိုင်ကြောင်း မြန်မာသံရုံးမှ အသိပေးထုတ်ပြန်ထားသည်။

ဂျပန်နိုင်ငံ၊ တိုကျိုမြို့ရှိ မြန်မာသံရုံးမှ ယနေ့(ဇူလိုင်လ ၂၀ ရက်) တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

အာဆီယံ-ဂျပန်ချစ်ကြည်ရင်းနှီးမှုနှင့်ပူးပေါင်းဆောင်ရွက်မှု နှစ် ၅၀ ပြည့်အထိမ်းအမှတ် အနေဖြင့် ဂျပန်နိုင်ငံခြားရေးဝန်ကြီးဌာနမှကြီးမှူး၍ “My Proposal-Our Future ASEAN-Japan Relations on the 50th Year of ASEAN-Japan Friendship and Cooperation” ခေါင်းစဉ်ဖြင့် Presentation Contest ကို လာမည့် နိုဝင်ဘာလ (၁၁) ရက်တွင် ဂျပန်နိုင်ငံခြားရေးဝန်ကြီးဌာန၌ ကျင်းပပြုလုပ်မည်ဖြစ်ကြောင်း သိရသည်။

ထို့ကြောင့် အဆိုပါ ပြိုင်ပွဲတွင် ပါဝင်ယှဥ်ပြိုင်ရန် စိတ်ဝင်စားသည့် ဂျပန်နိုင်ငံရှိ တက္ကသိုလ်များတွင် ပညာသင်ကြားနေသော မြန်မာနိုင်ငံမှ ကျောင်းသား၊ကျောင်းသူများကို ဖြန့်ဝေရန် အာဆီယံ-ဂျပန် စင်တာမှ အကြောင်းကြားခဲ့ကြောင်း ထုတ်ပြန်ချက်တွင် ပါရှိသည်။

ဂျပန်နိုင်ငံရှိ တက္ကသိုလ်များတွင် ပညာသင်ကြားနေသော အာဆီယံနိုင်ငံများမှကျောင်းသား၊ ကျောင်းသူများမှ တစ်ဦးချင်းဖြစ်စေ၊ အဖွဲ့လိုက် ၂ ဦးအထိဖြစ်စေ ပါဝင်ယှဉ်ပြိုင်နိုင်မည်ဖြစ်ပြီး ဇူလိုင်လ (၃၁) ရက်၊ နောက်ဆုံးထား၍ စာရင်းပေးသွင်းရမည်ဖြစ်ကြောင်း သိရသည်။

စာရင်းပေးသွင်းထားသည့် ပြိုင်ပွဲဝင်များကို ပြိုင်ပွဲစည်းကမ်းချက်များ အသေးစိတ်ပေးပို့သွားမည်ဖြစ်ပြီး အဆိုပါစည်းကမ်းချက်များနှင့်အညီ အကျဉ်းချုပ်တင်ပြချက် (Abstract Submission)ကို ဩဂုတ် လ(၃၁)ရက်နောက်ဆုံးထား၍ ပေးပို့ရမည်ဖြစ်ကြောင်း သံရုံးမှ အသိပေးထားသည်။

အကျဉ်းချုပ်တင်ပြချက်ပေးပို့၍ ပါဝင်ယှဉ်ပြိုင်ထားသူများမှ အဖွဲ့(၅)ဖွဲ့အား နောက်ဆုံးအဆင့်တွင် ပါဝင်ယှဉ်ပြိုင်နိုင်ရန် ရွေးချယ်သွားမည်ဖြစ်ပြီး ရွေးချယ်ခံရသည့် အဖွဲ့များအနေဖြင့် ဂျပန်ဘာသာ (သို့မဟုတ်) အင်္ဂလိပ်ဘာသာဖြင့် Presentation ၁၅ မိနစ်စာ ယှဉ်ပြိုင်ရမည်ဖြစ်ကြောင်း သိရသည်။

အဆိုပါ ပြိုင်ပွဲသို့ ပါဝင်ယှဉ်ပြိုင်ရန် စိတ်ပါဝင်စားသူများအနေဖြင့် အသေးစိတ်အချက် အလက်များကို သိရှိလိုပါက ဂျပန်နိုင်ငံခြားရေး ဝန်ကြီးဌာန၊ ပြည်တွင်းပြည်သူ့ဆက်ဆံရေးဌာန၊ ဖုန်း- ၀၃-၃၅၈၀-၃၃၁၁ (လိုင်းခွဲ-၅၀၅၀) နှင့် International Issues Presentation Contest Administration (Email-kokusaimondai@ec-mice.com) သို့ ဆက်သွယ်နိုင်ကြောင်း တိုကျိုမြို့ရှိ မြန်မာသံရုံးမှ အသိပေးထားသည်။