Pika (NSS) - ဇူလိုင် ၁၅

အိန္ဒိယ အာကာသသုတေသနအဖွဲ့ (ISRO) သည် လကမ္ဘာပေါ်သို့ ဆင်းသက်နိုင်ရန်အတွက် နောက်ဆုံးကြိုးပမ်းမှုတစ်ခုအဖြစ် Chandrayaan-3 ဟု အမည်ပေးထားသည့် အာကာသဒုံးပျံယာဉ်ကို ဇူလိုင်လ (၁၄)ရက်၊ နေ့လည်(၂)နာရီ(၃၅)မိနစ်တွင် နိုင်ငံအရှေ့ဘက်ကမ်းရိုးတန်း Sriharikota ကျွန်းရှိ  Satish Dhawan အာကာသစခန်းမှ အောင်မြင်စွာလွှတ်တင်နိုင်ခဲ့ကြောင်းသိရသည်။

အိန္ဒိယသည် လကမ္ဘာကို စူးစမ်းလေ့လာနိုင်ရန် ယခင်က ကြိုးပမ်းခဲ့သော်လည်း အောင်မြင်မှု မရရှိခဲ့ဘဲနောက်သုံးနှစ်အကြာတွင် နောက်ထပ်တစ်ကြိမ် ထပ်မံကြိုးပမ်းခဲ့ခြင်းဖြစ်သည်။ အဆိုပါမစ်ရှင်အောင်မြင်မည်ဆိုပါက အိန္ဒိယသည် အမေရိကန်၊ ဆိုဗီယက်ပြည်ထောင်စုနှင့် တရုတ်နိုင်ငံတို့ပြီးလျှင် လကမ္ဘာပေါ်သို့ ဆင်းသက်နိုင်သည့် စတုတ္တမြောက်နိုင်ငံဖြစ်လာမည်ဖြစ်သည်။ အဆိုပါအာကာသဒုံးပျံယာဉ်သည် ဩဂုတ်လ(၂၃)ရက် သို့မဟုတ် (၂၄)ရက်တို့တွင် လကမ္ဘာပေါ်သို့ ဆင်းသက်နိုင်မည်ဟု မျှော်လင့်ထားကြကြောင်းလည်းသိရသည်။

ISRO ဥက္ကဋ္ဌ Sreedhara Panicker Somanath က"Chandrayaan-3 လို့အမည်ပေးထားတဲ့ အာကာသဒုံးပျံယာဉ်ကို လွှတ်တင်မှုက စတင်လိုက်ပါပြီ"ဟု ထုတ်ပြန်ကြေညာခဲ့သည်။ ၎င်း၏ပြောဆိုမှုများကို လူပေါင်း(၁ ဒသမ ၄)သန်းက အွန်လိုင်းတွင်ကြည့်ရှုခဲ့ကြကြောင်းသိရသည်။ အဆိုပါမစ်ရှင်သည် အိန္ဒိယနိုင်ငံအတွက် မျှော်လင့်ချက်များနှင့် အိမ်မက်များကို အကောင်အထည်ဖော်ပေးနိုင်လိမ့်မည်ဖြစ်ကြောင်း ဝန်ကြီးချုပ်မိုဒီက ပြောကြားခဲ့သည်။

Chandrayaan-3 ကို လွှတ်တင်ပြီးနောက် (၁၆)မိနစ်အကြာတွင် ISRO မစ်ရှင်ထိန်းချုပ်မှုဌာနက အာကာသဒုံးပျံယာဉ်သည် လာမည့်လတွင် လကမ္ဘာပေါ်သို့ဆင်းသက်နိုင်မည့် ကမ္ဘာ့ပတ်လမ်းကြောင်းထဲသို့ ဝင်ရောက်သွားပြီဖြစ်ကြောင်း အတည်ပြုပြောဆိုခဲ့သည်။ အာကာသဒုံးပျံယာဉ်သည် လကမ္ဘာ၏ တောင်ဖက်ဝင်ရိုးစွန်းဒေသသို့ ဆင်းသက်နိုင်မည်ဟု မျှော်လင့်ထားကြကြောင်းသိရသည်။ လကမ္ဘာ၏ တောင်ဖက်ဝင်ရိုးစွန်းနေရာကို စူးစမ်းလေ့လာမှုများမလုပ်ရသေးသည့် ဧရိယာတစ်ခုအဖြစ် ပြောဆိုထားကြပြီး အာကာသအေဂျင်စီများနှင့် ပုဂ္ဂလိကကုမ္ပဏီများက ရေခဲများရှိနိုင်သည်ဟု ခန့်မှန်းထားကြကြောင်းသိရသည်။ 

အိန္ဒိယ၏သိပ္ပံနှင့်နည်းပညာဆိုင်ရာ လက်ထောက်ဝန်ကြီး Jitendra Singh က "အိန္ဒိယနိုင်ငံဟာ လာမယ့်(၂၅)နှစ်အတွင်းမှာ ကမ္ဘာလုံးဆိုင်ရာ အခန်းကဏ္ဍကနေ ဦးဆောင်ပါဝင်နိုင်မယ်လို့ ယုံကြည်ပါတယ်"ဟုပြောဆိုခဲ့သည်။