ဂျန်ဇက် (NSS) - ဇူလိုင် ၁၅

ထိုင်း ရွေးကောက်ပွဲမှာမဲအများဆုံး အနိုင်ရခဲ့တဲ့ ရှေ့သို့ချီပါတီဟာ ဝန်ကြီးချုပ်အသစ်ရွေးချယ်ရာမှာ အထက်လွှတ်တော်အမတ်များရဲ့ မဲပေးရွေးချယ်ခွင့် အခွင့်အရေးကို ပြန်ရုတ်သိမ်းနိုင်ဖို့ ဖွဲ့စည်းပုံအခြေခံဥပဒေ ပုဒ်မ ၂၂၇ ကိုပြင်ဆင်ဖို့ ဥပဒေမူကြမ်းကို ထိုင်းအောက်လွှတ်တော် ဥက္ကဋ္ဌအသစ်ထံ တင်သွင်းခဲ့ကြောင်းသိရပါတယ်။ 

ပြီးခဲ့တဲ့ ဇူလိုင်လ ၁၃ ရက်က ကျင်းပတဲ့ ထိုင်းဝန်ကြီးချုပ်အသစ်ရွေးချယ်ပွဲမှာ စစ်တပ်ကခန့်ထားတဲ့အထက်လွှတ်တော်အမတ်တွေဟာ ရှေ့သို့ချီပါတီခေါင်းဆောင်ကို ကန့်ကွက်မဲပေးခြင်း၊ ကြားနေမဲပေးခြင်းများလုပ်ဆောင်ခဲ့ပြီးနောက် အခုလိုမျိုး လုပ်ဆောင်လာတာလည်းဖြစ်ပါတယ်။ လွှတ်တော်ဥက္ကဋ္ဌအသစ်ဖြစ်တဲ့ Wan Muhamad Noor Matha ဟာ ရှေ့သို့ချီပါတီ အတွင်းရေးမှူး Chaithawat Tulathon ဦးဆောင်တဲ့ အထက်လွှတ်တော်ကိုယ်စားလှယ်ဦးရေ (၅၀) ရဲ့ ဥပဒေမူကြမ်းတင်သွင်းမှုကိုလက်ခံခဲ့ပြီးဥပဒေမူကြမ်းကို စစ်ဆေးသွားမှာဖြစ်ကြောင်း ပြောပါတယ်။ 

ရှေ့သို့ချီပါတီ အတွင်းရေးမှူးက ၎င်းတို့ဟာ သောင်မတင်ရေမကျဖြစ်နေတဲ့ နိုင်ငံရေးကိုအဆုံးသတ်နိုင်ဖို့ ရည်ရွယ်ပြီး အထက်လွှတ်တော်ကိုယ်စားလှယ်တွေရဲ့ဝန်ကြီးချုပ်ရွေးချယ်ခွင့်ကို ပြန်ရုတ်သိမ်းဖို့ ဥပဒေမူကြမ်းတင်သွင်းခဲ့ခြင်းဖြစ်ကြောင်း ပြောပါတယ်။ ဇူလိုင်လ ၁၃ ရက်က ကျင်းပတဲ့ ထိုင်းဝန်ကြီးချုပ်ရွေး ချယ်ပွဲကို အထက်လွှတ်တော်ရှိ အမတ် ၂၅၀ ဦးအနက် ၄၃ ဦးက အစည်းအဝေးတက်ရောက်ခြင်းမရှိသလို ၁၅၉ ဦးက ကြားနေမဲပေးခဲ့ကြောင်း သိရပါတယ်။

အဆိုပါအထက်လွှတ်တော်အမတ်များရဲ့လုပ်ရပ်က ဝန်ကြီးချုပ်ရွေးချယ်ရာမှာ လုပ်ပိုင်ခွင့်နဲ့ အခွင့်အာ ဏာကို အသုံးပြုဖို့ဆန္ဒမရှိခြင်းကိုပြသနေခြင်းဖြစ်တယ်လို့ ထိုင်း ရှေ့သို့ချီပါတီကပြောပါတယ်။ ရှေ့သို့ချီပါတီရဲ့လွှတ်တော်ကိုယ်စားလှယ်များအဖွဲ့က သောင်မတင်ရေမကျဖြစ်နေတဲ့ နိုင်ငံရေးကိုအဆုံးသတ်ဖို့ နဲ့ ထိုင်းနိုင်ငံရေးရှေ့ရောက်ဖို့ ရည်ရွယ်လုပ်ဆောင်ခြင်းဖြစ်ပြီး အဲဒီလိုမျိုးလုပ်မှသာ ထိုင်းအစိုးရအသစ်အမြန်ဖွဲ့စည်းနိုင်မှာဖြစ်ကြောင်း ရှေ့သို့ချီပါတီအတွင်းရေးမှူးကပြောပါတယ်။ 

ရှေ့သို့ချီပါတီရဲ့အဆိုလုပ်ရပ်ကို ညွန့်ပေါင်းအဖွဲ့ထဲမှာပါဝင်တဲ့ ဖြူထိုင်းပါတီကိုလည်း အသိပေးခဲ့ရာ ကန့် ကွက်ခြင်းမရှိခဲ့ကြောင်း ရှေ့သို့ချီပါတီအတွင်းရေးမှူးက ပြောပါတယ်။ အထက်လွှတ်တော်ကိုယ်စားလှယ်များရဲ့ ဝန်ကြီးချုပ်ရွေးချယ်ရေးမဲပေးခွင့် ပြန်ရုတ်သိမ်းခြင်းဟာ ဖွဲ့စည်းပုံအခြေခံဥပဒေထဲမှာအပိုဒ်တစ်ပုဒ်ကို ပြင်ဆင်ပြောင်းလဲမှာဖြစ်တဲ့အတွက် အချိန်အကြာကြီး ရယူရဖွယ်မရှိကြောင်း ထိုင်းရှေ့သို့ချီပါတီကပြောပါတယ်။ ရှေ့သို့ချီပါတီဟာ ဝန်ကြီးချုပ်အသစ်ရွေးချယ်မှုကို အလျင်မြန်လုပ်ဆောင်လိုပေမယ့် နှောင့်နေးမှုများရှိလာနိုင်ဖွယ်ရှိနေကြောင်းသိရပါတယ်။ထိုင်းအထက်လွှတ်တော်အမတ်တစ်ဦးဖြစ်တဲ့ Prapanth Koonmee က ရှေ့သို့ချီပါတီခေါင်းဆောင် ပီတဟာ လာမယ့် ဝန်ကြီးချုပ်အသစ်ရွေးချယ်ပွဲမှာ ဝန်ကြီးချုပ်လောင်းအသစ်အမည်စာရင်းတင်သွင်းခွင့်ရတော့မှာမဟုတ်ကြောင်း၊ လွှတ်တော် စည်းကမ်းအပုဒ် ၄၁ အရ လွှတ်တော်အစည်းအဝေးကျင်းပချိန်အတွင်း အမည်စာရင်းတင်သွင်းခံရမှုအောင်မြင်မှုမရသူဟာ အဲဒီလွှတ်တော်အစည်းအဝေးကျင်းပချိန်ကာလအတွင်း နောက်ထပ်အမည်စာရင်းတင်သွင်းခွင့်မရှိတော့ကြောင်း သတ်မှတ်ထားတယ်လို့ ဆိုပါတယ်။

အဆိုပါကိစ္စဟာလည်း အငြင်းပွားစရာကိစ္စအဖြစ်ရှိနေပြီး ဖွဲ့စည်းပုံအခြေခံဥပဒေ ခုံရုံးရဲ့အဆုံးအဖြတ်ကို ခံယူရဖွယ်ရှိနေကြောင်းသိရပါတယ်။ ထိုင်းဝန်ကြီးချုပ်အသစ် ရွေးချယ်ပွဲကို ဇူလိုင်လ ၁၃၊ ဇူလိုင်လ ၁၉ ရက် နဲ့ ဇူလိုင်လ ၂၀ ရက်တို့မှာကျင်းပဖို့ စီစဉ်ထားပြီး လာမယ့်သီတင်းပတ်မှာ လွှတ်တော်အတွင်းမဲပေးရွေးချယ်မှု ပြန်လည်စတင်သွားဖွယ်ရှိနေပါတယ်။