ဂျန်ဇက် (NSS) - ဇူလိုင် ၁၅

စင်ကာပူနိုင်ငံခြားရေးဝန်ကြီး ဗီဗီယမ်ဘလာကရစ်နန်က ဒေါ်အောင်ဆန်းစုကြည်ဟာ မြန်မာနိုင်ငံရေးအခက်အခဲကို အဖြေရှာဖို့ အဓိကဗဟိုချက် key pivot အဖြစ်ဆက်လက်ရှိနေဆဲဖြစ်ပြီး ၎င်းမပါဘဲ မြန်မာနိုင်ငံရေးအခက်အခဲကို အဖြေရှာလို့ရနိုင်မှာမဟုတ်ဘူးလို့ ထုတ်ဖော်ပြောဆိုလိုက်ပါတယ်။

အာဆီယံအထူးကိုယ်စားလှယ် မြန်မာနိုင်ငံကိုသွားရောက်ချိန်မှာ ဒေါ်အောင်ဆန်းစုကြည်အပါအဝင် မြန်မာနိုင်ငံရေးအခက်အခဲမှာပါဝင်နေသူအားလုံးနဲ့တွေ့ဆုံခွင့်ပေးဖို့ တိုက်တွန်းတောင်းဆိုသွားမှာဖြစ်ကြောင်း စင်ကာပူနိုင်ငံခြားရေးဝန်ကြီးက ပြောပါတယ်။ ထိုင်းနိုင်ငံခြားရေးဝန်ကြီးဟာ မြန်မာနိုင်ငံရေးကိုဖြေရှင်းနိုင်ဖို့ ကြိုးပမ်းမှုအစိတ်အပိုင်းအဖြစ် ဇူလိုင်လ ၉ ရက်မှာ ဒေါ်အောင်ဆန်းစုကြည်နဲ့ တွေ့ဆုံဆွေးနွေးခွင့်ရခဲ့ကြောင်း အာဆီယံနိုင်ငံခြားရေးဝန်ကြီးများအစည်းအဝေးမှာပြောဆိုခဲ့ပါတယ်။

စင်ကာပူနိုင်ငံခြားရေးဝန်ကြီးက "စင်ကာပူ ဝန်ကြီးချုပ် လီရှန်လွန်းဟာ ဒေါ်အောင်ဆန်းစုကြည်နဲ့ ဦးဝင်းမြင်တို့ကို ပြန်လွှတ်ပေးဖို့တိုက်တွန်းတောင်းဆိုထားတယ်။ ဒေါ်အောင်ဆန်းစုကြည် နဲ့ နစက ကြား စစ်မှန်တဲ့စေ့စပ်ဆွေးနွေးမှုတွေ လုပ်ဆောင်ရမယ်ဆိုရင် ဒေါ်အောင်ဆန်းစုကြည်ကို ဖမ်းဆီးထိန်းသိမ်းထားလို့ ဆွေးနွေးမှုလုပ်နိုင်တာမျိုး မရှိဘူး။ လက်ရှိအချိန်မှာ ကျွန်တော်တို့ဟာ အကြံပြုပေးလို့ရပြီး နစကဟာ အဲဒီအခြေခံအတိုင်း လုပ်ဆောင်မှာလားဆိုတာ အချိန်ကပဲ ပြောပြပါလိမ့်မယ်"လို့ပြောပါတယ်။

စင်ကာပူနိုင်ငံခြားရေးဝန်ကြီးဟာ အာဆီယံနိုင်ငံခြားရေးဝန်ကြီးများအစည်းအဝေး တက်ရောက်ချိန်အတွင်း သတင်းထောက်များနဲ့တွေ့ဆုံ သတင်းစာရှင်းလင်းပွဲပြုလုပ်ချိန်မှာ စင်ကာပူအခြေစိုက်သတင်းဌာနတွေဖြစ်တဲ့ CNA သတင်းထောက် Leong Wai Kit နဲ့ Mothership သတင်းဌာနရဲ့သတင်းထောက် Keyla Mercubuwono တို့ရဲ့မေးခွန်းများကို ဖြေဆိုချိန်အတွင်း အခုလိုမျိုးထည့်သွင်းဖြေဆိုသွားခဲ့တာဖြစ်ကြောင်းသိရပါတယ်။ 

စင်ကာပူနိုင်ငံခြားရေးဝန်ကြီးက "အာဆီယံအဖွဲ့ဝင်နိုင်ငံတွေဟာ တစ်နိုင်ငံနဲ့တစ်နိုင်ငံအရွယ် အစား၊ နိုင်ငံရေးစနစ်နဲ့ စီးပွားရေးအခြေအနေတွေ မတူညီပါဘူး။ အာဆီယံအဖွဲ့ဝင်နိုင်ငံတွေထဲက အချို့နိုင်ငံတွေဟာ မြန်မာနိုင်ငံရဲ့အိမ်နီးချင်းနိုင်ငံဖြစ်တယ်။ အခြားအဖွဲ့ဝင်နိုင်ငံတွေကတော့ မြန်မာနိုင်ငံ နဲ့ အိမ်နီးချင်းမဟုတ်ဘူး။ ဒါကြောင့် မြန်မာနိုင်ငံရေးအခြေပနေနဲ့ပတ်သက်ပြီး အာဆီယံအဖွဲ့ဝင်နိုင်ငံများကြားစိုးရိမ်မှုချင်းမတူဘူး။ ထိုင်းနိုင်ငံခြားရေးဝန်ကြီးဟာ မြန်မာနိုင်ငံကို သူရဲ့ကိုယ်ပိုင်အစီအစဉ်နဲ့သွားရောက်ခဲ့တယ်။ အာဆီယံအဖွဲ့နဲ့ တိုက်ရိုက်ဆက်နွယ်တဲ့ခရီးစဉ်မျိုးမဟုတ်ဘဲ ကိုယ်ပိုင်ခရီးစဉ်မျိုးသာဖြစ်တယ်။ နစက တာဝန်ရှိသူတွေဟာ ထိုင်းနိုင်ငံခြားရေးဝန်ကြီးကိုဒေါ်အောင်ဆန်းစုကြည်နဲ့တွေ့ဆုံဖို့ ခွင့်ပြုပေးခဲ့တယ်။ ကျွန်တော်တို့ဟာ သူပြောသမျှကိုသာသိခဲ့ရတယ်။ ထိုင်းနိုင်ငံခြားရေးဝန်ကြီးဟာ ဒေါ်အောင်ဆန်းစုကြည်နဲ့တစ်နာရီခွဲကျော်ကြာဆွေးနွေးခဲ့တယ်လို့ သိထားပါတယ်။ ကျွန်တော်တို့ဟာ ထိုင်းနိုင်ငံခြားရေးဝန်ကြီးဆီကနေ အခြားအချက်လက်တွေမျှဝေတာမျိုးမရှိပါဘူး။ ဒေါ်အောင်ဆန်းစုကြည်ဟာ ကျန်းမာရေးကောင်းမွန်နေတယ်လို့ ထိုင်းနိုင်ငံခြားရေးဝန်ကြီးကပြောခဲ့တယ်။ ကြားရတာ အရမ်းစိတ်သက်သာရပါတယ်။ ဒါပေမယ့် ဒေါ်အောင်ဆန်းစုကြည်ဟာ (၂)နှစ်ခွဲကျော်ကြာ သီးခြားနေထိုင်ခဲ့ရတယ်။ မီဒီယာတွေနဲ့ တွေ့ဆုံခွင့်မရခဲ့ဘူး။ ဒေါ်အောင်ဆန်းစုကြည်ဟာ စာမဖတ်ရဘူး ဒါမှမဟုတ် နိုင်ငံတကာ မီဒီယာတွေကိုကြည့်ခွင့်မရခဲ့ဘူး" လို့ပြောပါတယ်။

ဒါ့ပြင် စင်ကာပူနိုင်ငံခြားရေးဝန်ကြီးက "ဒေါ်အောင်ဆန်းစုကြည်နဲ့ တစ်ကြိမ်တွေ့ဆုံရုံနဲ့ မြန်မာနိုင်ငံရေးအခြေအနေကိုအဖြေရှာဖို့ လုံလောက်ပါသလား၊ ကျွန်တော်ကတော့ လုံလောက်တယ်လို့မမြင်ဘူး၊ဒါကြောင့် အာဆီယံအထူးကိုယ်စားလှယ် မြန်မာနိုင်ငံကိုသွားရောက်ချိန်မှာ ဒေါ်အောင်ဆန်းစုကြည် အပါအဝင် မြန်မာနိုင်ငံရေးမှာပါဝင်နေသူတွေနဲ့ တွေ့ဆုံခွင့်ပေးဖို့ တိုက်တွန်းတောင်းဆိုသွားမယ်" လို့ပြောပါတယ်။