ယွန်း (NSS) - ဇူလိုင် ၁၅

ရခိုင်ပြည်နယ်ရှိ မြို့နယ်(၁၇)ခုအား သဘာဝဘေးအန္တရာယ်ကျရောက်သည့် ဒေသအဖြစ် ဒုတိယအကြိမ်ထပ်မံကြေညာလိုက်ကြောင်း သိရသည်။

နစကဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်က ဇူလိုင်လ(၁၄)ရက် ညပိုင်းတွင် အထက်ပါကဲ့သို့ အသိပေးထုတ်ပြန်ခဲ့ခြင်းဖြစ်သည်။

ပြီးခဲ့သည့် မေလ(၁၄)ရက်တွင် တိုက်ခတ်ခဲ့သော ဆိုင်ကလုန်းမုန်တိုင်း မိုခါကြောင့် ထိခိုက်ပျက်စီးမှုများ ဖြစ်ပေါ်ခဲ့သည့် ရခိုင်ပြည်နယ်ရှိ မြို့နယ်(၁၇)မြို့နယ်အား သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေပုဒ်မ ၁၁ အရ သဘာဝဘေးအန္တရာယ်ကျရောက်သော ဒေသများအဖြစ် မေလ(၁၅)ရက်တွင် နစကမှ ကြေညာခဲ့သည်။

အဆိုပါ မြို့နယ်(၁၇)ခုတွင် ကျောက်ဖြူ၊ မာန်အောင်၊ ရမ်းဗြဲ၊ အမ်း၊ စစ်တွေ၊ ပေါက်တော၊ ပုဏ္ဏားကျွန်း၊ ရသေ့တောင်၊ ဂွ၊ တောင်ကုတ်၊ သံတွဲ၊ မောင်တော၊ ဘူးသီးတောင်၊ ကျောက်တော်၊ မင်းပြား၊ မြောက်ဦးနှင့် မြေပုံမြို့နယ်တို့ပါဝင်ကြောင်း ကြေညာချက်အရ သိရသည်။

လက်ရှိတွင် အထက်ပါမြို့နယ်များအား ပုံမှန်အနေအထားသို့ အပြည့်အဝပြန်လည်ရောက်ရှိလာစေရန် နိုင်ငံတော်အစိုးရ၏ ဦးဆောင်မှုဖြင့် ပြည်လည်ထူထောင်ရေးလုပ်ငန်းများကို ဆောင်ရွက်လျက်ရှိကြောင်း ကြေညာချက်တွင် ပါရှိသည်။

ထို့ကြောင့် ပြန်လည်ထူထောင်ရေးလုပ်ငန်းများ ဆောင်ရွက်နေသည့် အချိန်ကာလဖြစ်ခြင်းကြောင့် သဘာဝဘေးအန္တရာယ်ဆိုင်ရာ စီမံခန့်ခွဲမှု နည်းဥပဒေ ပုဒ်မ ၂၆ အရ ယနေ့(ဇူလိုင်လ ၁၅ ရက်)မှ စက် တင်ဘာလ(၁၄)ရက်အထိ သဘာဝဘေးအန္တရာယ်ကျရောက်သည့် ဒေသအဖြစ် ဒုတိယအကြိမ် ကြေညာလိုက်ကြောင်း နစကမှ ထုတ်ပြန်ထားသည်။

သို့ဖြစ်၍ သဘာဝဘေးအန္တရာယ်ကျရောက်သည့် ဒေသများအဖြစ် ထပ်မံကြေညာလိုက်သည့် (၂)လတာကာလအတွင်း ပြန်လည်ထူထောင်ရေးလုပ်ငန်းများကို ကဏ္ဍအလိုက် အရှိန်အဟုန်မြှင့်တင်ဆောင်ရွက်ရန်လည်း နစကဥက္ကဋ္ဌက ထုတ်ပြန်ချက်တွင် ထည့်သွင်းပြောကြားခဲ့သည်။

လက်ရှိတွင် အဆိုပါ(၁၇)မြို့နယ်ရှိ အချို့ဒေသများ၌ ပြန်လည်ပြုပြင်နေဆဲဖြစ်သည့် စာသင်ကျောင်းများ အပါအဝင် အသစ်ပြန်လည်တည်ဆောက်နေရသည့် စာသင်ကျောင်းများလည်း ရှိနေကြောင်း ရခိုင်ပြည် နယ်အစိုးရအဖွဲ့၏ ပြောရေးဆိုခွင့်ရှိသူ ဥပဒေချုပ် ဦးလှသိန်းက ပြောသည်။

“(၁၇)မြို့နယ်လုံးကိုတော့ သဘာဝဘေးအန္တရာယ်ကျရောက်တဲ့ ဒေသအဖြစ်ကြေညာခဲ့တယ်။ အခုထပ်ပြီးတော့ တိုးဖို့လိုတဲ့အခါမှာလည်း ရခိုင်ပြည်နယ် တစ်ပြည်နယ်လုံးကိုတိုးတာပေါ့။ ဥပဒေမှာတော့ တစ်ကြိမ်တိုးရင် (၂)လစီ တိုးလို့ရတဲ့ သဘောရှိပါတယ်။ အဲဒီလိုသဘောကြောင့် တိုးတာပါ။ ရခိုင်ပြည်နယ်မြောက်ပိုင်းမှာတော့ အထူးသဖြင့် ပညာရေးပိုင်းပေါ့ တချို့ကျောင်းတွေလည်း ပြီးသွားတာရှိတယ်၊ ဆောင်ရွက်ဆဲကျောင်းတွေ လည်းရှိတယ်၊ အသစ်ပြန်ဆောက်ရတဲ့ကျောင်းတွေလည်းရှိတယ်ပေါ့။ ဒါတွေကို ထပ်ပြီးတော့ ပြည့်စုံအောင်လုပ် ပေးမယ့်သဘောလို့ ထင်ပါတယ်။ နောက်(၂)လဆိုရင်တော့ အဲဒီကျောင်းတွေလည်း ပြီးသွားနိုင်မယ်လို့ မြင်ပါတယ်” ဟု ဦးလှသိန်းက NP News ကိုပြောသည်။

ထို့ပြင် ရခိုင်ပြည်နယ်အတွင်း၌ လက်ရှိအချိန်အထိ စားရေရိက္ခာမပြတ်ထောက်ပံ့ပေးနေရသည့် အိမ်ထောင်စုများလည်းရှိနေပြီး နိုင်ငံတော်မှ သဘာဝဘေးအန္တရာယ်ကျရောက်သည့် ဒေသအဖြစ် (၂)လထပ်မံသတ်မှတ်လိုက်ခြင်းသည် အဆိုပါအိမ်ထောင်စုများအတွက် အထောက်အပံ့များ ဆက်လက်ရရှိနိုင်ကြောင်း ၎င်းမှ ဆက်လက်ပြောဆိုထားသည်။

“ကျွန်တော်တို့ရခိုင်ပြည်မှာ သဘာဝဘေးခံရတဲ့ဒေသတွေပေါ်မှာ မူတည်ပြီးတော့ Group (၃)ခု ခွဲထားတယ်။ (A)မှာဆိုရင် အထူးပံ့ပိုး ဖို့မလိုတဲ့သူတွေပေါ့ စားရေရိက္ခာလောက်ပဲ ထောက်ပံ့ရတယ် ကိုယ့်ဘာသာကိုယ်ပြန်ပြီး ထူထောင်နိုင်ကြတဲ့သူတွေ၊ (B)မှာကျတော့ ပြန်လည်ထူထောင်ဖို့ကို အထိုက်အလျောက်တော့နိုင်တယ် အကူအညီကို လိုတော့လိုတယ်ဆိုတဲ့သူမျိုးပေါ့၊ (C)ကကျတော့ အောက်ခြေ လူတန်းစားတွေပါ ထူထောင်ဖို့ခက်တဲ့သူ တွေပေါ့။ အဲဒီ့သုံးမျိုးမှာဆိုရင် (B)နဲ့(C) ကများတယ် မပြတ်ပံ့ပိုးပေးနေရတယ် အခုထိလည်း ပံ့ပိုးနေရတယ် အခုကနောက်ထပ် (၂)လတိုး လိုက်တဲ့အတွက် ခုနပြောတဲ့ အိမ်‌ထောင်စုတွေ စားရေရိက္ခာဆက်ပြီးတော့ အထောက်အပံ့ တွေရဦးမယ် နောက်ပြီး ပြန်လည်ထူထောင်ရေးနဲ့ ပတ်သက်ပြီး ဖြန့်ဝေမှုတွေလုပ်သွားမယ့်သဘောလို့ မြင်ပါတယ်”ဟု ရခိုင်ပြည်နယ် ပြောရေးဆိုခွင့်ရှိသူ ဦးလှသိန်းက သုံးသပ်ပြောကြားခဲ့သည်။