NSS - ဇူလိုင် ၁၄

ပို့ကုန်လုပ်ငန်းရှင်များအနေဖြင့် ပို့ကုန်ရငွေ၏ (၆၅)ရာခိုင်နှုန်းအစား (၅ဝ)ရာခိုင်နှုန်းကိုသာ ဗဟိုဘဏ်၌ မြန်မာကျပ်ငွေ ဖြင့် လဲလှယ်ရန် ပြင်ဆင်သတ်မှတ်လိုက်ကြောင်း ကြေညာထားသည်။

မြန်မာနိုင်ငံတော်ဗဟိုဘဏ်သည် ယမန်နေ့(ဇူလိုင် ၁၃ ရက်)တွင် အထက်ပါကဲ့သို့ အမိန့်ကြော်ငြာစာ ထုတ်ပြန်ခဲ့ခြင်းဖြစ်သည်။

ဗဟိုဘဏ်သည် ပြီးခဲ့သော ၂ဝ၂၂ ခုနှစ်အတွင်း၌ ပို့ကုန်တင်ပို့သူများအနေဖြင့် ပို့ကုန်တင်ပို့ခြင်းမှ ရရှိသည့် ပို့ကုန်ရ ငွေပမာဏ၏ (၆၅)ရာခိုင်နှုန်းကို မြန်မာကျပ်ငွေဖြင့် လဲလှယ်ဆောင်ရွက်ရန်ရမည်ဟု အမိန့်ကြော်ငြာစာ ထုတ်ပြန် ကာ သတ်မှတ်ခဲ့သည်။

ထို့ကြောင့် ပို့ကုန်တင်ပို့သူများအနေဖြင့် ပို့ကုန်တင်ပို့ခြင်းမှရရှိသည့် ပို့ကုန်ရငွေပမာဏ၏ (၆၅)ရာခိုင်နှုန်းအစား (၅ဝ) ရာခိုင်နှုန်းကိုသာ သတ်မှတ်ညွှန်ကြားချက်များအတိုင်း မြန်မာကျပ်ငွေဖြင့် လဲလှယ်ဆောင်ရွက်ရန် ပြင်ဆင် သတ်မှတ်ကြောင်း ဗဟိုဘဏ်က ကြေညာထားသည်။

၎င်းအမိန့်ကြော်ငြာစာသည် ဇူလိုင် ၁၃ ရက်မှစ၍ အကျိုးသက်ရောက်မည်ဖြစ်ပြီး ယင်းအမိန့်ကြော်ငြာစာကို လိုက်နာခြင်းမရှိပါက နိုင်ငံခြားသုံးငွေစီမံခန့်ခွဲမှုဥပဒေအရ အရေးယူခြင်းခံရမည်ဟုလည်း ဗဟိုဘဏ်က အသိပေး ထားသည်။

ပို့ကုန်လုပ်ငန်းရှင်များအနေဖြင့် ကျန်ပို့ကုန်ရငွေပမာဏ၏ (၅၀)ရာခိုင်နှုန်းကို မိမိကိုယ်တိုင်အတွက် သုံးစွဲခြင်း၊ AD လိုင်စင်ရဘဏ်မဟုတ်သော အခြားသူများထံသို့ လွှဲပြောင်းခြင်း၊ AD လိုင်စင်ရဘဏ်များသို့ ရောင်းချခြင်းတို့ကို လွတ်လပ်စွာ ဆောင်ရွက်နိုင်ကြောင်း သိရသည်။

ယခင်က ပို့ကုန်ရငွေပမာဏ၏ (၆၅)ရာခိုင်နှုန်းကို ဗဟိုဘဏ်၏ သတ်မှတ်ဈေးနှုန်းဖြင့် မြန်မာကျပ်ငွေ လဲလှယ်ရ သည့်အတွက် ပို့ကုန်လုပ်ငန်းရှင်များအား အခက်အခဲနှင့်အကျပ်အတည်းများဖြစ်ပေါ်စေခဲ့ကြောင်း လုပ်ငန်းရှင် အသိုင်းအဝိုင်းက ဆိုထားသည်။

“(၆၅) ရာခိုင်နှုန်းကနေ (၅ဝ) ရာခိုင်နှုန်းလျှော့ပေးလိုက်တော့ အကြမ်းဖျင်းအားဖြင့် (၁၅)ရာခိုင်နှုန်းဟာ ပိုပြီးတော့ market rate နဲ့ ပိုရလာမှာပေါ့။ market rate နဲ့ပိုရလာတော့ တချို့ပြည်တွင်းမှာ ထုတ်ရမယ့်အပိုင်းတွေမှာ ပိုပြီးတော့ သုံးလာနိုင်မယ်။ နောက်တစ်ချက်က ပြည်ပ ကနေတင်သွင်းတဲ့အပေါ်မှာ ပိုပြီးတော့ သွင်းလာနိုင်မယ်။ ဝယ်လိုအား နည်းနည်းပိုပြီးများသွားမှာပေါ့နော်။ ပြီးတော့ ပြည်တွင်းမှာ ကုန်ကျ စရိတ်တွေသက်သာအောင်လို့ တစ်နည်းတစ်လမ်းနဲ့ ဖြေလျှော့ပေးလိုက်တာလို့ ပြောရမှာပေါ့။ ဒေါ်လာဈေးအလွန်အမင်းမတက်အောင်လို့ လည်း ထိန်းတဲ့နည်းတစ်မျိုးလို့လည်း ပြောလို့ရပါတယ်” ဟု လုပ်ငန်းရှင်တစ်ဦးက NP News ကို သုံးသပ်ပြောသည်။

လက်ရှိတွင် မြန်မာနိုင်ငံတော်ဗဟိုဘဏ်အနေဖြင့် နိုင်ငံခြားငွေလဲလှယ်နှုန်း အမေရိကန်တစ်ဒေါ်လာလျှင် ငွေကျပ် (၂၁ဝဝ) သတ်မှတ်ထားပြီး ပြင်ပဒေါ်လာဈေးကွက်၌ အမေရိကန်တစ်ဒေါ်လာလျှင် ငွေကျပ် (၃ဝဝဝ)နှင့်အထက်တွင် ရှိကြောင်း သိရှိရသည်။