NSS - ဇူလိုင် ၁၁

မီတာခကြွေးကျန် (၄)လအထက်ရှိသော မီတာများကို စက်တင်ဘာလ ၁ ရက်မှစတင်ကာ အပြီးဖြုတ်သိမ်းသွားမည်ဖြစ်ကြောင်း ရန်ကုန်လျှပ်စစ်ဓာတ်အားပေးရေး ကော်ပိုရေးရှင်း (YESC)မှ သိရသည်။ 

ဓာတ်အားခ ကြွေးကျန် (၄)လနှင့်အထက်ရှိသည့် မီတာများကို မီတာအပြီး ဖြုတ်သိမ်းရန်နှင့် ဓာတ်အားခကြွေးကျန်များ လာရောက်ပေးဆောင်ပါက အခြေခံအဆောက်အဦကြေး ထပ်မံပေးသွင်းပြီးမှသာ မီတာအသစ်ပြန်လည်တင်ဆင်ပေးရန် ညွှန်ကြားထားကြောင်းသိရသည်။

မီးသုံးစွဲသူများအနေဖြင့်  သုညယူနစ် မီတာခခြောက်လ နှင့် ကြွေးကျန် လေးလအထက် မီတာခများကို ဩဂုတ်လကုန် နောက်ဆုံးထားပေးသွင်းရမည်ဖြစ်ပြီး စက်တင်ဘာလ(၁)ရက်မှစတင်ကာ မီတာပိတ် လျှပ်စစ်ဖြတ်တောက်မှုများဆောင်ရွက်သွားမည်ဖြစ်ကြောင်း သိရသည်။ 

မီတာခမဆောင်၍ မီတာဖြုတ်သိမ်းမည်ဖြစ်သည့်အတွက် အသေးစိတ်အချက်အလက်များကို မြို့နယ်လျှပ်စစ်ရုံးများတွင် စုံစမ်းနိုင်ပြီး မီတာခကြွေးကျန်ရှိမရှိကိုပါ စစ်ဆေးနိုင်ကြောင်းသိရသည်။

လျှပ်စစ်မီးအသုံးပြုသူအများစုသည် ၂ဝ၂ဝ ခုနှစ် ဒီဇင်ဘာလ၏ မီတာခမှစတင်ကာ ပေးဆောင်ခြင်းမရှိသည့်အတွက် နိုင်ငံတော်အနေဖြင့် မီတာခကြွေးကျန်ကို ဘီလျံနှင့်ချီကာရရှိရန်ဖြစ်ပေါ်ခဲ့သည်။ ယင်းနောက်ပိုင်းတွင်  မီတာခများပေးဆောင်ရန်အတွက် အချိန်သုံးလစောင့်ဆိုင်းပြီး သုံးလထက်နောက်ကျသည့်အခါ မီးဖြတ်တောက်ခြင်းများကို လုပ်ဆောင်ခဲ့ကြသည်။