NSS - ဇူလိုင် ၉

မွန်ပြည်နယ်အတွင်း၌ ပြုပြင်နေဆဲ ကျုံအိတ်တံတားကို KNLA၊ PDF ပူးပေါင်းအဖွဲ့က ဒရုန်းဖြင့် (၃)ကြိမ်မြောက် ထပ်မံဗုံးပစ်ချတိုက်ခိုက်ခဲ့ရာ သားအမိ(၂)ဦး ထိခိုက်ဒဏ်ရာရရှိခဲ့ကြောင်း သတင်းရရှိသည်။

ယနေ့(ဇူလိုင်လ ၉ ရက်) နံနက် ၁ဝ နာရီ ၂ဝ မိနစ်အချိန်ခန့်တွင် သထုံမြို့နယ်နှင့် ဘီးလင်းမြို့နယ်အစပ်တွင်ရှိသော ကျုံအိတ်တံတားကို ပူးပေါင်းအဖွဲ့က ဒရုန်းဖြင့် Drop ဗုံး (၁ဝ)လုံးနီးပါး ပစ်ချတိုက်ခိုက်ခဲ့ခြင်းဖြစ်ကြောင်း သိရသည်။

“တံတားကို Drop ဗုံး (၅)လုံးချတယ်။ ဒရုန်းတပ်တွေ ချထားတော့ အနီးပတ်ဝန်းကျင် ပေ ၂ဝ၊ ၃ဝ လောက်ကိုပဲ ကျတာပေါ့လေ။ ပထမတစ်ခါ (၅)လုံးပစ်ချတယ်။ လုံခြုံရေးအဖွဲ့တွေကလည်း ပြန်ပစ်တာ ရှိတာပေါ့လေ။ နောက်တစ်ခါ ထပ်ပြီးတော့ ဗုံး(၄)လုံး ပစ်ချတယ်” ဟု မွန်ပြည်နယ်အစိုးရအဖွဲ့မှ တာဝန်ရှိသူက NP News ကို အတည်ပြုပြောဆိုထားသည်။

ထိုသို့ KNLA၊ PDF ပူးပေါင်းအဖွဲ့က Drop ဗုံးပစ်ချတိုက်ခိုက်ခဲ့မှုကြောင့် ကျုံအိတ်တံတားဆောက်လုပ်ရေးလုပ်သားများ ထိခိုက်ဒဏ်ရာရရှိမှု မရှိခဲ့သော်လည်း လမ်းသွားလမ်းလာ သားအမိ(၂)ဦး ထိခိုက်ဒဏ်ရာများ ရရှိသွားခဲ့ကြောင်း ၎င်းက ဆက်လက်ပြောဆိုထားသည်။

ကျုံအိတ်တံတားအနီး၌ Drop ဗုံးများ ကျရောက်ပေါက်ကွဲမှုကြောင့် ဘေးတွဲဆိုင်ကယ်ဖြင့် မောင်းနှင်လာသော သထုံမြို့ နယ်အတွင်း၌နေထိုင်သူ ကိုနေထွန်းအောင်နှင့် ၎င်း၏မိခင်ဖြစ်သူ ဒေါ်ပန်းဝါတို့တွင် ဗုံးစထိမှန်ဒဏ်ရာများရရှိသွားခဲ့ကြောင်း သိရသည်။

“KNU နဲ့ PDF ပေါင်းပြီးတော့ လုပ်ကွက်ဖော်နေတာပေါ့။ နိုင်ငံရေးတိုက်ခိုက်တာပေါ့။ အဓိက ထိတာတော့ ပြည်သူလူထုပဲ ထိတာပဲ။ လူအများစု သွားတဲ့လမ်းကို ဆောင်ရွက်ခြင်းအားဖြင့် ရပ်တန့်သွားမယ်။ ပိတ်ဆို့သွားမယ်။ ကုန်စည်စီးဆင်းမှုတွေ နှောင့်နှေးသွားမယ်။ ဒီလိုဖြစ်ရင် ပြည်သူလူထုပဲ ထိခိုက်တာလေ။ တကယ်ထိခိုက်တာတော့ ပြည်သူလူထုပါပဲ။ ဒါကတော့ မလုပ်သင့်တဲ့ အရာပဲလေ” ဟု အထက်ပါတာဝန်ရှိသူက သုံးသပ်ပြောဆိုထားသည်။

၎င်းကျုံအိတ်တံတားကို KNLA၊ PDF ပူးပေါင်းအဖွဲ့သည် ပြီးခဲ့သော ဇွန်လ ၂၉ ရက် နံနက်အစောပိုင်းတွင် မိုင်းခွဲဖျက်ဆီးခဲ့ပြီးနောက် တံတားအား လာရောက်စစ်ဆေးသည့် တာဝန်ရှိသူများကိုလည်း Drop ဗုံးဖြင့် ပစ်ချတိုက်ခိုက်မှုများ ပြုလုပ်ခဲ့သည်။

ထိုသို့မိုင်းခွဲဖျက်ဆီးခံရမှုကြောင့် ပျက်စီးခဲ့သော ကျုံအိတ်တံတားအား ဘေလီတံတားဖြင့် ယာယီအစားထိုးအသုံးပြုနိုင်ရေး ဆောက်လုပ်ရေးလုပ်ငန်း ဆောင်ရွက်နေသူများကို ဇူလိုင် ၇ ရက်တွင်လည်း Drop ဗုံးများဖြင့် ပူးပေါင်းအဖွဲ့က ပစ်ချတိုက်ခိုက်မှုများ ဒုတိယအကြိမ် ထပ်မံပြုလုပ်ခဲ့ကြောင်း သိရသည်။

လက်ရှိတွင် ကျုံအိတ်တံတားအား KNLA၊ PDF ပူးပေါင်းအဖွဲ့က မိုင်းခွဲဖျက်ဆီးမှုနှင့်အတူ Drop ဗုံးဖြင့် (၃)ကြိမ် ပစ်ချတိုက်ခိုက်ခဲ့မှုကြောင့် လူ(၃)ဦးထက်မနည်းသေဆုံးခဲ့ပြီး (၃ဝ)ဦးထက်မနည်း ထိခိုက်ဒဏ်ရာများ ရရှိထားကြောင်း သိရသည်။

၎င်းကျုံအိတ်တံတားသည် ရန်ကုန်-မော်လမြိုင်ကားလမ်းပေါ်တွင် တည်ရှိပြီး လမ်းသွားလမ်းလာများနှင့် ကုန်တင်ယာဉ်များအတွက် အခက်အခဲများ ဖြစ်ပေါ်နေလျက်ရှိကြောင်း သိရသည်။

“တံတားကိုတော့ နှောင့်ယှက်ဖျက်ဆီးနေတာပေါ့။ ပြင်တာကလည်း သတ်မှတ်တဲ့အချိန်ဆို ပြီးရတော့မှာပေါ့။ ဒါပေမယ့် ချိန်ပြီးလုပ်နေရတော့ ဆောက်လုပ်ရေးအဖွဲ့ကလည်း လူတွေဆိုတော့ လန့်တာပေါ့လေ။  ဒါပေမယ့် လုံခြုံရေးပေးပြီးတော့ လုပ်နေပါတယ်”ဟု မွန်ပြည်နယ်အစိုးရအဖွဲ့မှ တာဝန်ရှိသူက ပြော သည်။

ကျုံအိတ်တံတား မိုင်းခွဲဖျက်ဆီးခံခဲ့ရသည်မှာ (၁ဝ)ရက်ခန့်ရှိပြီဖြစ်သော်လည်း လက်ရှိအချိန်ထိ အပြီးသတ် ပြင်ဆင်နိုင်ခြင်းမရှိသေးကြောင်း သိရသည်။