Pika (NSS) - ဇူလိုင် ၇

Meta ကုမ္ပဏီသည် အီလွန်မတ်ပိုင်ဆိုင်သော တွစ်တာအပ်ပ်ကို ယှဉ်ပြိုင်ရန်အတွက် Threads ဟုခေါ်သော အပ်ပ်တစ်ခုကို ထုတ်ဖော်ပြသခဲ့ကြောင်း သိရသည်။

Threadsအပ်ပ်ကို Meta ကုမ္ပဏီပိုင် အပ်ပ်တစ်ခုဖြစ်သော အင်စတာဂရမ်၏ အခြေခံဗားရှင်းအဖြစ် သတ်မှတ်ထား ပြီး အချိန်နှင့်တစ်ပြေးညီ အပ်ပ်ဒိတ်များနှင့်အတူ အများသူငှာအသုံးပြုနိုင်သည့် အပ်ပ်တစ်ခုဖြစ်ကြောင်း Meta ကုမ္ပဏီက ပြောဆိုထားသည်။

အဆိုပါအပ်ပ်ကို Apple နှင့် Android အက်ပ်စတိုးများတွင် ဇူလိုင်လ(၅)ရက်က စတင်ပေးခဲ့ပြီး (၇)နာရီအတွင်း လူ(၁ဝ)သန်းခန့် အကောင့်ဖွင့်ခဲ့ကြကြောင်း Facebook ၏ စီအီးအိုဖြစ်သူ မာ့ခ်ဇူကာဘတ် က ပြောကြားခဲ့သည်။

Threads အပ်ပ်ကို အမေရိကန်၊ ဗြိတိန်၊ ဩစတေးလျ၊ ကနေဒါ နှင့် ဂျပန်တို့ အပါအဝင် နိုင်ငံပေါင်း(၁ဝဝ)ကျော် တွင် စတင်ပေးအပ်ခဲ့ပြီး စားဖိုမှူးဂေါ်ဒွန်ရမ်ဆေး၊ ပေါ့ပ်စတား ရှက်ကီရာ နှင့် သရုပ်ဆောင် ဂျက်ခ်ဘလက်တို့ အပြင် Airbnb၊Guinness World Records၊ Netflix၊Vogue magazine တို့နှင့် အခြားသောမီဒီယာများမှ နာမည်ကြီး များကို ဆွဲဆောင်ထားပြီးဖြစ်ကြောင်း သိရသည်။

Threads အပ်ပ်နှင့်ပတ်သက်ပြီး ဇူကာဘတ်က ၎င်းသည် အဆိုပါအပ်ပ်ကို အချင်းချင်းရင်းနှီးဖော်ရွေနိုင်သည့် နေရာ တစ်ခုအဖြစ် ပြုလုပ်ရန် အာရုံစိုက်ထားပြီး နောက်ဆုံးတွင် အောင်မြင်မှုသော့ချက်တစ်ခု ဖြစ်လာမည်ဖြစ်ကြောင်း ပြောကြားခဲ့သည်။

ဇူကာဘတ် က "ဒါက တွစ်တာဟာ အောင်မြင်သင့်သလောက် မအောင်မြင်ရတဲ့ အကြောင်းအရင်းတစ်ခု ဖြစ်ပါတယ်။ ကျွန်တော်တို့ Threads အပ်ပ်နှင့်ပတ်သက်ပြီး ကွဲပြားတာတွေကိုပဲ လုပ်ချင်တာပါ" ဟု ပြောဆိုခဲ့ သည်။

Threads အပ်ပ်တွင် လိုက်ခ်ပေးခြင်း၊ ပို့စ်ပြန်တင်ခြင်း နှင့် စာပြန်ခြင်းတို့ ပြုလုပ်နိုင်ပြီး အသုံးပြုသူများသည် ပို့စ် တစ်ခုတွင် ရရှိသည့်လိုက်ခ်အရေအတွက် နှင့် ပြန်စာများကို တွေ့မြင်နိုင်မည်ဖြစ်ကြောင်း သိရသည်။ Threads အပ်ပ်တွက် ပို့စ်များကို စာလုံးရေ(၅ဝဝ)အထိ သတ်မှတ်ပေးထားပြီး link များ၊ ဓါတ်ပုံများ နှင့် ဗီဒီယိုဖိုင်များကို ငါးမိနစ် ထိကြာအောင် ထည့်သွင်းနိုင်ကြောင်း သိရသည်။

Threads အပ်ပ်သည် ကျန်းမာရေး၊ ငွေကြေး၊ အဆက်အသွယ်များ၊ ရှာဖွေမှု နှင့် မှတ်တမ်းများ၊ တည်နေရာဒေတာ များ၊ ဝယ်ယူမှုများ အပါအဝင် ကိုယ်ရေးကိုယ်တာအချက်အလက်များကို စုဆောင်းနိုင်ကြောင်း သိရသည်။ သို့သော် လည်း တွစ်တာကုမ္ပဏီပိုင်ရှင်ဖြစ်သော အီလွန်မတ်က ဇူကာဘတ်၏ Threads အပ်ပ်နှင့်ပတ်သက်ပြီး ပြန်လည် တုံ့ပြန်ပြောဆိုခဲ့ကြောင်း သိရသည်။

အီလွန်မတ်က Threads အပ်ပ်သည်  Copy and Paste features များအတွက် အသုံးပြုရန်ပြုလုပ်ထားသည်ဟု  တွစ်တာတွင် တင်ခဲ့ကြောင်း သိရသည်။ အီလွန်မတ်က "တွစ်တာမှာ တိုက်ခိုက်ဝေဖန်မှုတွေကို ခံရတာက အင်စတာဂရမ်ရဲ့ မှားယွင်းတဲ့ပျော်ရွှင်မှုတွေကို ခံစားရတာထက် ပိုကောင်းပါတယ်" ဟု ပြောဆိုခဲ့သည်။