စော (NSS) - ဇူလိုင် ၃

‌ရှမ်းပြည်နယ်ရှိ ဘိန်းအစားထိုး ကော်ဖီစိုက်တောင်သူ အိမ်ထောင်စုများအနေဖြင့် နှစ်စဉ်ပျမ်းမျှဝင်ငွေအားဖြင့် အမေရိကန်ဒေါ်လာ (၁၁ဝဝ)ခန့်ရရှိနေကြောင်း မြန်မာနိုင်ငံအခြေစိုက်၊ ဖင်လန်သံရုံးမှပြော သည်။

မြန်မာနိုင်ငံရှိ ဖင်လန်သံရုံးမှ ပြီးခဲ့သည့် ဇူလိုင်လ(၁)ရက်က အထက်ပါကဲ့သို့ထုတ်ပြန်ထားခြင်းဖြစ်သည်။

မြန်မာနိုင်ငံ၊ ရှမ်းပြည်နယ် တောင်ပိုင်းတွင် ဆယ်စုနှစ်ပေါင်းများစွာ ဘိန်းစိုက်ပျိုးမှုကြောင့် တောပြုန်းပြီး မြေဆီလွှာပျက်စီးသွားသည့် နေရာဒေသအချို့ရှိခဲ့ကြောင်းသိရသည်။ ထို့အတွက်ကြောင့် ယခင်ဘိန်းစိုက်တောင်သူများကို ၂ဝ၁၆ ခုနှစ်မှစတင်ကာ ဖင်လန်နိုင်ငံသည် UNODC မှတဆင့်  ကူညီပံ့ပိုးပေးလျက်ရှိကြောင်း သိရသည်။

အဆိုပါ ကော်ဖီစိုက်တောင်သူများအနေဖြင့်လည်း Green Gold Coffee (GGC) သမဝါယမအဖြစ်စုစည်းကြပြီး ၂ဝ၂၂ ခုနှစ်အထိ အဖွဲ့ဝင်စုစုပေါင်း (၉ဝဝ)ကျော်ရှိခဲ့ပြီဖြစ်ကြောင်း သိရသည်။

၎င်းတို့အနေဖြင့် ကော်ဖီစိုက်ခင်းဟက်တာ စုစုပေါင်း (၁ဝဝဝ)ကျော်ကို စိုက်ပျိုးနေပြီး အဆိုပါ GGC သည် မြန်မာနိုင်ငံ၌ Fairtrade Certificate ကို ပထမဆုံးရရှိသော ကော်ဖီသမဝါယမအသင်းအဖြစ် ရပ်တည်လျက်ရှိကြောင်း ထုတ်ပြန်ချက်အရသိရသည်။

လက်ရှိ၌ ကော်ဖီစိုက်တောင်သူ အိမ်ထောင်စုများအတွက် နှစ်စဉ်ပျမ်းမျှဝင်ငွေ အမေရိကန်ဒေါ်လာ (၁၁ဝဝ)ခန့်ရရှိနေပြီဖြစ်ကြောင်း သိရသည်။

အဆိုပါ GGC သည် သမဝါယမ၏ စီမံခန့်ခွဲမှုနှင့် လုပ်ငန်းဆောင်ရွက်မှုအဆင့်တိုင်း၌ အမျိုးသမီးများကို အမျိုးသားများနှင့်တန်းတူပါဝင်မှုတွင် အားပေးပံ့ပိုးပေးလျက်ရှိကြောင်း သိရသည်။