NSS - ဇွန် ၂၆

နေပြည်တော်ကောင်စီနယ်မြေ၊ ဇဗ္ဗူသီရိမြို့နယ်၊ ဧရာဝတီလမ်းပေါ်ရှိ စားသောက်ဆိုင် Music Bar (၃)ခုသည် ရက်အကန့်အသတ်မရှိ လိုင်စင်ပိတ်သိမ်းခံခဲ့ရကြောင်း သတင်းရရှိသည်။

ဧရာဝတီလမ်းပေါ်တွင်ရှိသော Excellent Music Bar၊ Relax Music Bar နှင့် X-one space Music Bar တို့ကို ဇွန်လ ၂၄ ရက်မှစတင်ကာ နေပြည်တော်ကောင်စီက လိုင်စင်ပိတ်သိမ်းခဲ့ခြင်းဖြစ်ကြောင်း သတင်းများထွက်ပေါ်လျက်ရှိနေသည်။

အထက်ပါ စားသောက်ဆိုင် Bar (၃)ခုအား ပိတ်သိမ်းခဲ့ခြင်းသည် PDF အကြမ်းဖက်ကိစ္စများနှင့် ပတ် သက်ဆက်နွယ်မှုမရှိကြောင်းသိရသည်ဟု နေပြည်တော်ရှိ အမည်မဖော်လိုသော သတင်းအရင်းအမြစ်က NP News ကို ပြောဆိုထားသည်။

“အဲဒီဆိုင်တွေက အရင်တုန်းက စားသောက်ဆိုင်လိုင်စင်နဲ့ ဖွင့်ထားတဲ့ ဆိုင်တွေ။ လိုင်စင်က တစ်နှစ်တစ်ခါ ပြန်တင်ရတယ်လေ။ အခုလိုင်စင်ပြန်တင်တော့ club တို့၊ bar တို့ပါ ဖွင့်မယ်ဆိုပြီးတော့ ပြန်တင်တာပေါ့။ အဲဒါတွေကို ကောင်စီက ခွင့်မပြုဘူးလို့ သိရတယ်။ တချို့က အဲဒါတွေပါ တွဲလုပ်နေတာရှိတော့ လိုင်စင်ပိတ်လိုက်တယ်လို့ သိရတယ်” ဟု အထက်ပါ သတင်းအရင်းအမြစ်က ဆိုသည်။

Excellent Music Bar အပါအဝင် အထက်ပါ Bar များသည် ယခုရက်ပိုင်းအတွင်း ဖွင့်လှစ်ရောင်းချခြင်း မရှိကြောင်း တွေ့ရှိရသည်ဟုလည်း နေပြည်တော်ဒေသခံတစ်ဦးက NP News ကို အသိပေးပြောဆိုထားသည်။

အထက်ပါကဲ့သို့ ပိတ်သိမ်းခံရမှုအခြေအနေနှင့်ပတ်သက်၍ NP News မှ နေပြည်တော်စည်ပင်သာယာ ရေးကော်မတီ၏ ပြောရေးဆိုခွင့်ရှိသူ၊ အမြဲတမ်းအတွင်းဝန် ဦးမျိုးအောင်အား မေးမြန်းရာတွင် “Bar တွေ၊ ဘာတွေက ကျွန်တော်တို့ စည်ပင်က ကိုင်တာမဟုတ်ဘူး။ ကျွန်တော်တို့က စားသောက်ဆိုင်လိုင်စင်ပဲ စည်ပင်က ပေးတာ။ Bar တွေ ဘာတွေကတော့ နေပြည်တော်ကောင်စီ၊ ထွေအုပ်နဲ့ပဲ လုပ်တာများတယ်။ ထွေအုပ်ကပဲ ပေးခွင့်ရှိတယ်။ စည်ပင်က ပေးခွင့်မရှိဘူး။ ကျွန်တော်က အဲဒီကိစ္စတော့ သိပ်မသိသေးဘူး။ နေပြည်တော်ကောင်စီကိုပဲ မေးကြည့်လိုက်ပါ။ ကျွန်တော်တို့ဆီမှာ Bar နဲ့ပတ်သက်ပြီးတော့ပေးတဲ့လိုင်စင်လည်း မရှိဘူးလေ” ဟု ပြန်လည်ဖြေကြားထားသည်။

ဆက်လက်ပြီး အထက်ပါကိစ္စနှင့်ပတ်သက်၍ NP News အနေဖြင့် နေပြည်တော်ကောင်စီ၏ ပြောရေး ဆိုခွင့်ရှိသူထံ ဆက်သွယ်မေးမြန်းခဲ့သော်လည်း လက်ရှိအချိန်အထိ ပြန်လည်ဖြေကြားခြင်း မရှိသေးပေ။