ပြည်တွင်းထုတ် စားသောက်ကုန်၊ လူသုံးကုန် နှင့် အလှကုန် အမျိုးပေါင်း (၄ဝဝဝ)ကျော်ကို ဓာတ်ခွဲစစ်ဆေးမည်
NSS - ဇွန် ၂၅
စားသုံးသူများနှင့် သုံးစွဲသူ ပြည်သူများ ဘေးအန္တရာယ်ကင်းစေရန် ယခုဘဏ္ဍာနှစ်အတွင်း ပြည်တွင်းရှိ အသေးစားအဆင့် လုပ်ငန်းရှင်များက တနိုင်တပိုင် ထုတ်လုပ်ရောင်းချနေသည့် စားသောက်ကုန် ၊ လူသုံးကုန်နှင့် အလှကုန်ပစ္စည်း အမျိုးအမည်ပေါင်း (၄,၃၃ဝ)ကို ဓာတ်ခွဲစမ်းသပ် စစ်ဆေးသွားမည်ဖြစ်ကြောင်း အသေးစား စက်မှုလက်မှုလုပ်ငန်း ဦးစီးဌာနမှ သိရသည်။
ဓာတ်ခွဲစမ်းသပ် စစ်ဆေးမည့် ကုန်စည်များတွင် အသေးစား စက်မှုလက်မှုလုပ်ငန်းဦးစီးဌာန၌ မှတ်ပုံတင်ထားသည့် စားသောက်ကုန် အမျိုးအစား ၃,၃၆၅ ခု၊ လူသုံးကုန် ၈၅ဝ ခု နှင့် အလှကုန် အမျိုးအစား ၁၁၅ ခု ပါဝင်မည်ဖြစ်ကြောင်း သိရသည်။
ကိုဗစ်ကာလမှစတင်ပြီး သက်ဆိုင်ရာမှ ဖမ်းဆီးစစ်ဆေး အရေးယူခြင်းများ လျော့ကျသွားသည့်အတွက် အွန်လိုင်းမှတဆင့် သုံးစွဲရန် မသင့်သည့် စားသောက်ကုန်များ၊ လူသုံးကုန်များ၊ ဆေးဝါးများ ရောင်းချမှုအများအပြားရှိလာနိုင်ကြောင်းသိရသည်။
"ဒီအန္တရာယ်ရှိတဲ့ စားသောက်ကုန်၊ ဆေးဝါးနဲ့ အလှကုန်တွေ ၊ လူသုံးကုန်တွေက တော်တော်လေးကို အွန်လိုင်းမှာ ရောင်းချလာတာတွေလဲ တွေ့ရပါတယ်။ အဲဒီအတွက်တော့ ကျန်းမာရေးဝန်ကြီးဌာနတို့ ၊ စီးပွားရေးနဲ့ ကူးသန်းရောင်းဝယ်ရေး ဝန်ကြီးဌာနတို့ ပူးပေါင်းပြီးတော့ ပိုပြီး ကြပ်ကြပ်မတ်မတ်လေး အရေးယူဖို့လိုပါတယ်"ဟု စားသုံးသူကာကွယ်ရေးအသင်းမှ ဦးဗအုပ်ခိုင်က ပြောသည်။
ယခုအချိန်တွင် ပြည်တွင်းမှ ထုတ်လုပ်သည့် လူသုံးကုန်များ၌ သဘာဝဆန်သည့် ပစ္စည်းများ များပြားနေသော်လည်း စားသောက်ကုန် အများစုသည် အန္တရာယ်ရှိသည့် ပစ္စည်းများအဖြစ် ရှိနေဆဲဖြစ်ကြောင်း ၎င်းကဆက်လက်ပြောသည်။
အသေးစား စက်မှုလက်မှုလုပ်ငန်း ဦးစီးဌာနအနေဖြင့် ယခုဘဏ္ဍာနှစ်ဖြစ်သည့် ၂ဝ၂၃ -၂ဝ၂၄ ဘဏ္ဍာနှစ် ဧပြီလမှ မေလကုန်အထိ ပြည်တွင်းလုပ်ငန်းရှင်များ တနိုင်တပိုင် ထုတ်လုပ်ရောင်းချနေသည့် စား သောက်ကုန် ၆၂ဝ ခု၊ လူသုံးကုန် ၁၁၃ ခု၊ အလှကုန် ၁၅ ခု ၊ စုစုပေါင်း ကုန်ပစ္စည်း ၇၄၈ ခုကို ဓာတ်ခွဲစမ်းသပ် စစ်ဆေးပေးခဲ့ကြောင်း သိရသည်။
ပြီးခဲ့သည့် ၂ဝ၂၂ - ၂ဝ၂၃ ဘဏ္ဍာနှစ်တွင်လည်း စားသောက်ကုန် ၄,၇ဝ၄ ခု ၊ လူသုံးကုန် ၁,၁၃၅ ခုနှင့်အလှကုန် ၁၉၃ ခု စုစုပေါင်း ကုန်ပစ္စည်း ၆,ဝ၃၂ ခုကို ဓာတ်ခွဲစမ်းသပ်စစ်ဆေးပေးနိုင်ခဲ့ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
နေအိမ်ခြံဝန်းအတွင်း စိုက်ပျိုးထားသည့် ကျွန်းပင်များကို မှတ်ပုံတင်ထားပါက နိုင်ငံပိုင်အဖြစ်သတ်မှတ်မည်မဟုတ်
RELATED POSTS
20 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,နိုင်ငံတကာ
12 Sep 2024 | စီးပွားရေး,ပြည်တွင်း