ယွန်း (NSS) - ဇွန် ၂၂

သံနှင့် သံမဏိများကို နိုင်ငံတကာစံချိန်မီ အရည်အသွေးထုတ်လုပ်နိုင်ရန် မြန်မာနိုင်ငံ သံနှင့် သံမဏိအသင်းမှ ရည်မှန်းထားကြောင်း သိရသည်။

မြန်မာနိုင်ငံ သံနှင့် သံမဏိအသင်း၏ ရုံးခန်းကို ဇွန်လ(၂၁)ရက်တွင် ကုန်သည်စက်မှုအသင်းချုပ်၏ (၁၃)လွှာ၌ဖွင့်လှစ်ခဲ့ကြောင်း Myanmar Iron and Steel Association မှ အသိပေးပြောဆိုထားသည်။

မြန်မာနိုင်ငံ သံနှင့် သံမဏိအသင်းသည် မြန်မာနိုင်ငံစက်မှုကုန်ထုတ်လုပ်သူများအသင်း(MIA) ၏လုပ်ငန်းတူ CLUSTER အစုအဖွဲ့အဖြစ် (၂ဝ၁၄) ခုနှစ်မှ စတင်ဆောင်ရွက်ခဲ့ကြောင်း သိရသည်။

ထို့ပြင် မြန်မာနိုင်ငံရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၏ အသိအမှတ်ပြုလက်မှတ်ရထားပြီးကြောင်းလည်း သိရသည်။

အသင်းဖွဲ့စည်းရသည့် ရည်ရွယ်ချက်သည် သံနှင့်သံမဏိလုပ်ငန်းနှင့်ပတ်သက်၍ မြန်မာနိုင်ငံစံချိန်စံညွှန်းကို အကောင်အထည်ဖော်ပြီး သံနှင့် သံမဏိလုပ်ငန်းဖွံ့ဖြိုးအောင်ဆောင်ရွက်ရန်ဖြစ်ကြောင်း သိရသည်။

ထို့ပြင် သံနှင့်သံမဏိပစ္စည်းများကို နိုင်ငံတကာစံချိန်မီသည့် အရည်အသွေးထုတ်လုပ်ရန်နှင့် အသင်းဝင်များအတွက် ဆွေးနွေးပွဲများ၊ စာတမ်းဖတ်ပွဲများ ကျင်းပစေပြီး နိုင်ငံတကာနှင့် အာဆီယံဒေသအတွင်း၊ နိုင်ငံများ၏ သံနှင့် သံမဏိသတင်းအချက်အလက်များ ပညာရပ်ဆိုင်ရာ စာရွက်စာတမ်းများဖြန့်ဝေနိုင်ရန် ရည်ရွယ်ကြောင်း Myanmar Iron and Steel Association မှ အသိပေး ပြောဆိုထားသည်။

အလားတူ ပြည်တွင်းသံ၊ သံမဏိထုတ်လုပ်ခြင်းအတွက် လိုအပ်သော တည်ဆောက်မှုဆိုင်ရာများ၊ ထုတ်လုပ်မှုဆိုင်ရာ၊ ထုတ်လုပ်မှုနည်းပညာများအတွက် ပံ့ပိုးကူညီရန်နှင့် Small and Medium သံ သံမဏိလုပ်ငန်းများ ဖွံ့ဖြိုးတိုးတက်ရန်လိုအပ်သော ကူညီပံ့ပိုးမှုများပေးရန် ရည်ရွယ်ကြောင်း သိရသည်။

အလားတူ မြန်မာနိုင်ငံ သံနှင့်သံမဏိအသင်းအနေဖြင့် The South East Asia Iron and Steel Institute(SEAISI) တွင်လည်း ၂ဝ၁၈ ခုနှစ် ဒီဇင်ဘာလတွင် စတင်ဝင်ရောက်ခဲ့ပြီး အရှေ့တောင်အာရှ သံနှင့်သံမဏိ အသင်းဝင်များနှင့်လည်း ချိတ်ဆက်ဆောင်ရွက်လျက်ရှိကြောင်း သိရသည်။

မြန်မာနိုင်ငံ၏ သံနှင့် သံမဏိ လိုအပ်ချက်သည် နှစ်စဉ်တန်ချိန် (၂ ဒသမ ၅)သန်းမှ သုံးသန်းခန့်ရှိသည့် အတွက် လိုအပ်သောတန်ချိန် (၂)သန်းခန့်ကို နှစ်စဉ်ပြည်ပမှတင်သွင်းနေရပြီး နိုင်ငံခြားငွေ (၁)ဘီလျံကျော်ခန့် သုံးစွဲနေရသည်။