Pika (NSS) - ဇွန် ၂ဝ 

ယူကရိန်းကို ပြီးခဲ့သည့်တစ်နှစ်တာကာလအတွင်း စစ်လက်နက်ပစ္စည်းများထောက်ပံ့ပေးခဲ့ခြင်းကြောင့်  ကုန်သွား သော လက်နက်နှင့် ခဲယမ်းမီးကျောက်များကို ပြန်လည်ဖြည့်တင်းရန်အတွက် နေတိုးအဖွဲ့သည် ပိုမိုကောင်းမွန် သော စက်မှုလုပ်ငန်းများကိုလိုအပ်နေကြောင်း နေတိုးအဖွဲ့အထွေထွေအတွင်းရေးမှူးချုပ် ဂျန်စတိုလ်တန်ဘာ့ချ် က ပြောကြားခဲ့သည်။

အမေရိကန်ဦးဆောင်သော နေတိုးအဖွဲ့သည် (၂ဝ၁၄)ခုနှစ်ကတည်းက လုပ်ဆောင်ခဲ့သည့်အတိုင်း ယူကရိန်းကို ဆက်လက်ထောက်ခံရမည်ဖြစ်ကြောင်း ဂျန်စတိုလ်တန်ဘာ့ချ် က ဝန်ခံပြောဆိုခဲ့သည်။

ဂျန်စတိုလ်တန်ဘာ့ချ် က "ကျွန်တော်တို့မှာ ပိုမိုကောင်းမွန်တဲ့ ကာကွယ်ရေးစက်မှုလုပ်ငန်းတွေကို လိုအပ်နေပါ တယ်။ ကျွန်တော်တို့မှာရှိတဲ့ လက်နက်နဲ့ ခဲယမ်းမီးကျောက်တွေ ကုန်သလောက်နီးပါးဖြစ်နေတဲ့အတွက် ပြန်လည် ဖြည့်တင်းဖို့ လိုအပ်ပါတယ်။ ဒါက ဂျာမနီနိုင်ငံမှာတင်မဟုတ်ဘဲ နေတိုးအဖွဲ့မှာပါဝင်တဲ့ နိုင်ငံအတော်များများမှာ ဖြစ်နေတာပါ" ဟု ပြောဆိုခဲ့သည်။

ထို့အပြင် ပြီးခဲ့သည်သီတင်းပတ်တွင် စစ်ဘက်လုပ်ငန်းနယ်ပယ်မှ ကိုယ်စားလှယ်များနှင့်တွေ့ဆုံခဲ့ပြီး လက်နက် ထုတ်လုပ်မှုနှင့် ထောက်ပံ့ရေးကွင်းဆက်များကို ပိုမိုမြှင့်တင်ရန်အတွက် အကောင်းဆုံးနည်းလမ်းများကို ဆွေးနွေးခဲ့ ကြောင်း ဂျန်စတိုလ်တန်ဘာ့ချ် က ပြောကြားခဲ့သည်။ လက်နက်နှင့် ခဲယမ်းမီးကျောက်ထုတ်လုပ်မှုများ ပိုမိုမြှင့်တင် ခြင်းသည် ယူကရိန်းအတွက် နေတိုးအဖွဲ့၏ ကူညီပံ့ပိုးပေးမှုများကို ဆက်လက်ထိန်းထားရန် သော့ချက်တစ်ခုဖြစ် ကြောင်း ၎င်းက ထပ်မံပြောကြားခဲ့သည်။

ထို့အပြင် ရုရှားနှင့် ယူကရိန်းကြား ဖြစ်ပွားနေသော စစ်ပွဲတွင် ယူကရိန်းအနိုင်ရရှိမှသာလျှင် တရားမျှတပြီး ရေရှည် တည်တံ့သော ငြိမ်းချမ်းရေးကို ရရှိနိုင်မည်ဖြစ်ကြောင်း ဂျန်စတိုလ်တန်ဘာ့ချ် က အကြိမ်ကြိမ်ပြောဆိုခဲ့သည်။ ယူကရိန်းတပ်ဖွဲ့များသည် ပြီးခဲ့သည့်သီတင်းပတ်တွင် ကြီးမားသောတန်ပြန်ထိုးစစ်ဆင်မှုများလုပ်ဆောင်ရန် ကြိုးပမ်းခဲ့ပြီး တပ်ဖွဲ့ဝင်အများအပြား ဆုံးရှုံးခဲ့ရသလို အနောက်အုပ်စုနိုင်ငံများမှ ပံ့ပိုးပေးသော လက်နက်များလည်း ဆုံးရှုံးသွားခဲ့ကြောင်း သိရသည်။

ရုရှားနှင့် ယူကရိန်းကြား စစ်ပွဲစတင်ဖြစ်ပွားပြီးနောက် အမေရိကန်နှင့် ၎င်း၏မဟာမိတ်နိုင်ငံများသည် အမေရိကန် ဒေါ်လာ(၁ဝဝ)ဘီလျံကျော်တန်ဖိုးရှိ လက်နက်များ၊ ကိရိယာများ နှင့် ခဲယမ်းမီးကျောက်များကို ယူကရိန်းထံ ပေးပို့ ကူညီခဲ့ကြောင်း သိရသည်။ ယူကရိန်းသို့ စစ်လက်နက်ပစ္စည်းများ ကူညီပံ့ပိုးပေးမှုသည် ရုရှားနှင့်စစ်ပွဲတွင် ပါဝင် ပတ်သက်နေခြင်းမျိုးမဟုတ်ကြောင်း အနောက်အုပ်စုနိုင်ငံများက အကြိမ်ကြိမ်ပြောဆိုခဲ့သည်။ 

အနောက်အုပ်စုနိုင်ငံများသည် ယူကရိန်းကို လက်နက်များပံ့ပိုးပေးရုံသာမက ယူကရိန်းတပ်ဖွဲ့များကို ယူကရိန်း၊ ဂျာမနီ၊ အီတလီ နှင့် အခြားနေရာများတွင် လေ့ကျင့်ပေးခြင်းဖြင့် ပဋိပက္ခတွင် တိုက်ရိုက်ပါဝင်ပတ်သက်နေကြောင်း ရုရှားနိုင်ငံခြားရေးဝန်ကြီးဆာဂေးလာရော့ဗ် က အကြိမ်ကြိမ်စွပ်စွဲပြောဆိုခဲ့သည်။