Pika (NSS) - ဇွန် ၂ဝ 

ဘီလာရုစ်နိုင်ငံတွင် နျူကလီးယားလက်နက်များထားရှိမည်ဟု ထုတ်ပြန်ကြေညာပြီးနောက် ရုရှားနိုင်ငံ၏ နျူကလီးယားလက်နက်များ အသုံးပြုလာနိုင်သည့် ခြိမ်းခြောက်မှုများမြင့်တက်လာကြောင်း အမေရိကန် သမ္မတဂျိုးဘိုင်ဒန်က ပြောကြားခဲ့သည်။

ဘီလာရုစ်တွင် ရုရှား၏လှုပ်ရှားမှုများသည် မဟာဗျူဟာမြောက် သေးငယ်သောနျူလက်နက်များ အသုံးပြုရန် ပြင်ဆင်နေသည့် လက္ခဏာတစ်ရပ်ဖြစ်ကြောင်း ဂျိုးဘိုင်ဒန် က ပြောကြားခဲ့သည်။

ရုရှားဖက်မှ နျူကလီးယားလက်နက်များအသုံးပြုနိုင်သည့်အရိပ်အယောင်များ မတွေ့မိကြောင်း အမေရိကန် အစိုးရက မကြာသေးမီက မှတ်ချက်ပြုပြောဆိုပြီးနောက် ယခုကဲ့သို့ မှတ်ချက်ပေးမှုများ ထပ်မံထွက်ပေါ်လာခြင်း ဖြစ်သည်။ ဂျိုးဘိုင်ဒန် က "လွန်ခဲ့တဲ့ (၂)နှစ်ခန့်က ကျွန်တော်က ကော်လိုရာဒိုမြစ်ရေခမ်းခြောက်သွားမှာကို စိုးရိမ်တယ်လို့ပြောတုန်းက လူတိုင်းက ကျွန်တော့်ကို ရူးသွပ်နေသလို ကြည့်ကြပါတယ်။ ရုရှားဟာ နျူကလီးယား လက်နက်တွေ အသုံးပြုလာနိုင်ချေနဲ့ပတ်သက်ပြီး စိုးရိမ်တယ်လို့ပြောတော့လည်း အဲဒီလိုအကြည့်တွေနဲ့ပဲ ကြည့် ကြပါတယ်" ဟု ပြောဆိုခဲ့သည်။

ဘီလာရုစ်နိုင်ငံတွင် ရုရှား၏ နျူကလီးယားလက်နက်များ ဖြန့်ကျက်ချထားမည့်အစီအစဉ်သည် တာဝန်မဲ့သော လုပ်ရပ်တစ်ခုဖြစ်ကြောင်း ဂျိုးဘိုင်ဒန်က ပြီးခဲ့သည့်သီတင်းပတ်တွင် ပြစ်တင်ပြောဆိုခဲ့ပြီးနောက် ယခုကဲ့သို့ ပြောဆိုမှုများ ထပ်မံထွက်ပေါ်လာခြင်းဖြစ်သည်။

ရုရှားနှင့် ဘီလာရုစ်တို့သည် ဘီလာရုစ်နယ်မြေအတွင်းတွင် နျူကလီးယားလက်နက်များထားရှိရန် ပြီးခဲ့သည့်လက သဘောတူညီခဲ့ကြသည်။ အဆိုပါနျူကလီးယားထိပ်ဖူးများကို Iskander-M ဒုံးကျည်များနှင့်အတူ အထူးပြုပြင်ထား သော တိုက်လေယာဉ်များတွင် တပ်ဆင်သွားမည်ဖြစ်ကြောင်း ရုရှားကာကွယ်ရေးဝန်ကြီး ဆာဂေးရှိုဂူ၏ ပြောကြား ချက်အရ သိရသည်။  

ဘီလာရုစ်နိုင်ငံတွင် နျူကလီးယားလက်နက်များ ဖြန့်ကျက်ထားရှိရန် ဆွေးနွေးနေကြောင်း ရုရှားဖက်က မတ်လ တွင် စတင်ထုတ်ဖော်ပြောဆိုခဲ့ပြီး အဆိုပါလုပ်ရပ်မှာ ယူကရိန်းကို လက်နက်များထောက်ပံ့ရန် ဆုံးဖြတ်ခဲ့သော ဗြိတိန်၏ ဆုံးဖြတ်ချက်ကို လက်တုံ့ပြန်ခြင်းမျိုးသာဖြစ်ကြောင်း ပြောဆိုခဲ့သည်။ ထို့အပြင် ဘီလာရုစ်နိုင်ငံတွင် နျူကလီးယားလက်နက်များ ဖြန့်ကျက်ချထားရန် အစီအစဉ်အတိုင်း ဆက်လက်လုပ်ဆောင်နေပြီး ဒုံးကျည်များ အတွက် ပြင်ဆင်မှုများကို လာမည့်ဇူလိုင်လတွင် အပြီးသတ်သွားမည်ဖြစ်ကြောင်း ဘီလာရုစ်သမ္မတ လူကာရှန်ကို ကို ရုရှားသမ္မတပူတင် က ပြောကြားခဲ့သည်။