သတင်းအဖွဲ့ (NSS) - ဇွန် ၁၉

ဆရာ/ဆရာမများနှင့် စာသင်ကျောင်းများကို ခြိမ်းခြောက်သတ်ဖြတ်ဖျက်ဆီးနေမှုများသည် အမှောင်ခေတ်ကိုပြန်သွားရန် လုပ်ဆောင်နေခြင်းဖြစ်ကြောင်း နိုင်ငံရေးပါတီများက ဝေဖန်ပြောဆိုလိုက်သည်။

ယခုရက်ပိုင်း ဇွန်လ ၁၇ ရက်တွင် မကွေးတိုင်း၊ ပခုက္ကူမြို့ရှိ အခြေခံပညာအထက်တန်းကျောင်းခွဲ၌ ဆရာမတစ်ဦးဖြစ်သော ဒေါ်ခင်မင်းဦးအား PDF (၇)ဦးက သေနတ်ဖြင့် ပစ်သတ်ကာ ရွှေထည်လက်ဝတ်ရတနာများကို လုယက်ယူဆောင်မှုဖြစ်ပွားခဲ့သည်။

ထို့ပြင် ယခု ၂ဝ၂၃-၂ဝ၂၄ ပညာသင်နှစ်တွင် အခြေခံပညာကျောင်းများ စတင်ဖွင့်လှစ်သည့်ကာလအတွင်း၌ စာသင်ကျောင်းများ ဖောက်ခွဲဖျက်ဆီးခံရမှုများရှိခဲ့သည့်အပြင် ဆရာ/ဆရာမများ ဖမ်းဆီးရခြင်း၊ အကြမ်းဖက်သတ်ဖြတ်ခံရခြင်းများရှိခဲ့သည်။

ဆရာ/ဆရာမများအား အကြမ်းဖက်သတ်ဖြတ်ခြင်းနှင့် စာသင်ကျောင်းများအား ဖောက်ခွဲဖျက်ဆီးသည့်လုပ်ရပ်များကို မလုပ်သင့်ကြောင်းနှင့် မဖြစ်သင့်ကြောင်း နိုင်ငံရေးပါတီများက သုံးသပ်ပြောဆိုထား သည်။

“အမှောင်ခေတ်ကို ပြန်သွားစေချင်တဲ့ တွန်းအားတွေလို့ပဲ မြင်တယ်။ အဲဒါမျိုးက ပြီးခဲ့တဲ့ လွတ်လပ်ရေးခေတ်ဦးကာလ ကွန်မြူနစ်ဝါဒကြီးစိုးတဲ့အချိန်မှာ ရခိုင်ဒေသမှာလည်း အကြီးကြီးဖြစ်ဖူးတယ်။ စာသင် ကျောင်းတွေကို အဲဒီလို ပစ္စည်းမဲ့ဝါဒီတွေက ဖြိုတာ၊ ဖျက်တာ၊ စာသင်ရင် ဖမ်းတာဆီးတာ ကြုံခဲ့ဖူးတယ်။ အဲဒါကို ပညာအမှောင်ခေတ်လို့ သုံးလို့ရတာပေါ့။ အဲဒီလိုမျိုး အခုတစ်ခါပြန်ပေါ်လာတာ နိုင်ငံအတွက် မကောင်းတဲ့ဘက်ကို ဦးတည်တာပေါ့”ဟု ရခိုင့်ဦးဆောင်ပါတီဥက္ကဋ္ဌ ဒေါက်တာအေးမောင်က NP News ကို သုံးသပ်ပြောဆိုထားသည်။

စာသင်ကျောင်းများ ဖွင့်လှစ်ထားရန် လိုအပ်ကြောင်းနှင့် ဆရာ/ဆရမများနှင့် ကျောင်းသား/ကျောင်းသူများသည် စာသင်ခန်းများအတွင်း ရောက်ရှိမှသာ နိုင်ငံဖွံ့ဖြိုးတိုးတက်မည်ဟုလည်း ဒေါက်တာအေးမောင်က ဆိုသည်။

ထို့ပြင် ၎င်းက ဆရာ/ဆရာမများကို အကြမ်းဖက်သတ်ဖြတ်ခြင်းသည် အလွန်ရမ်းကားသော အပြုအမူမျိုးဖြစ်ပြီး ကိုယ့်မိဘကိုယ် ပြန်သတ်ခြင်းမျိုးဖြစ်ကြောင်းလည်း သုံးသပ်ပြောဆိုထားသည်။

“ကိုယ့်က အုပ်ချုပ်မှ ကိုယ့်တို့ရဲ့မျိုးဆက်တွေကို ပညာသင်ကြားခွင့်ရှိမယ်။ အုပ်ချုပ်ခွင့်မရရင် မျိုးဆက်တစ်ခုလုံးကို ပညာဉာဏ်တုံးသွားအောင်၊ မျိုးဆက်အလိုက် တုံးသွားအောင် အဲဒါမျိုး ရည်မှန်းပြီးတော့၊ ရည်စူးပြီးတော့ မလုပ်အပ်ဘူး” ဟု ဒေါက်တာအေးမောင်က ဆက်လက်ဝေဖန်ထားသည်။

အလားတူ ဆရာ/ဆရာမများနှင့် စာသင်ကျောင်းများကို သတ်ဖြတ်ဖျက်ဆီးနေသော အပြုအမူများနှင့်ပတ်သက်၍ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ပြောရေးဆိုခွင့်ရှိသူ ဗဟိုအလုပ်အမှုဆောင်ဦးလှသိန်းက ၎င်းလုပ်ရပ်များသည် မဖြစ်သင့်ကြောင်းလည်း NP News ကို ပြောဆိုထားသည်။

“နိုင်ငံအနေနဲ့ ကြည့်မယ်ဆိုရင်တော့ ဒီကိစ္စတွေက အလွန်ဆိုးရွားပါတယ်။ ဒီလိုဖြစ်တဲ့အတွက်ကြောင့် လုပ်တဲ့သူတွေ အဖို့ကတော့ သူတို့ ဘာမျှော်ကိုးပြီး လုပ်တယ်ဆိုတာတော့ ကျွန်တော် မပြောလိုဘူး။ သို့သော် ဒါတွေက အကြမ်းဖက်တာ ဖြစ်ပါတယ်။ အဲဒီတော့ တိုင်းပြည်နဲ့လူမျိုးအတွက် ကြည့်မယ်ဆိုရင်တော့ လူသားအရင်းအမြစ်တွေကို စပြီးမွေးထုတ်ပေးတဲ့ ဌာနတွေကို တမင်တကာ ရည်ရွယ်ပြီးတော့ တိုင်းပြည်တစ်ခုခုဖြစ်အောင် လူသားအရင်းအမြစ်တွေ စာတတ်ပေတတ်တွေ မဖြစ်လာအောင် ရည်ရွယ် ချက်ရှိရှိလုပ်နေတယ်လို့ မြင်ပါတယ်”ဟု ဦးလှသိန်းက ပြောသည်။

မြန်မာနိုင်ငံတွင် ၂ဝ၂၁ ခုနှစ် ဖေဖော်ဝါရီလမှစ၍ တပ်မတော်က နိုင်ငံတော်အာဏာရယူခဲ့ပြီးနောက်ပိုင်းတွင် နိုင်ငံအတွင်း၌ ပဋိပက္ခများဖြစ်ပွားကာ အကြမ်းဖက်သတ်ဖြတ်သည့်ဖြစ်စဉ်များ အများအပြားရှိခဲ့သည်။

ထိုသို့ အကြမ်းဖက်သတ်ဖြတ်ခံရသည့် ဖြစ်စဉ်များထဲတွင် စာသင်ကျောင်းများ၌ ပညာသင်ကြားပေးနေသည့် ဆရာ/ဆရာမများပါဝင်ခဲ့ပြီး ဆရာ/ဆရာမဦးရေ (၁ဝဝ)နီးပါးအထိ အကြမ်းဖက်သတ်ဖြတ်ခံထားရသည်။

“ဘယ်သူပဲဖြစ်ဖြစ်ပေါ့ တရားမဲ့ အလုပ်ခံရတယ်ဆိုတဲ့ဟာက ကောင်းတဲ့ ကိစ္စတော့မဟုတ်ပါဘူး။ အထူးသဖြင့် ဆရာ/ဆရာမတွေ ဆိုတာက အများကို ဒုက္ခပေးတာမဟုတ်ဘဲနဲ့ တိုင်းပြည်ရဲ့ အနာဂတ်အညွန့်အဖူးလေးတွေကို ပြုစုပျိုးထောင်ပေးနေတဲ့ အပိုင်းတွေပေါ့။ အဲဒီအပိုင်းတွေကို လုပ်တာကတော့ တိုင်းပြည်အတွက် ကောင်းတဲ့အလားအလာမဟုတ်ဘူး။ လက်ခံသင့်တဲ့ ကိစ္စမဟုတ်ဘူး” ဟု တိုင်းရင်း သားစည်းလုံးညီညွတ်ရေးပါတီမှ အထွေထွေအတွင်းရေးမှူးဦးထွန်းရီက NP News ကို သုံးသပ်ပြောဆိုထားသည်။

စာသင်ကျောင်းများနှင့် ဆရာ/ဆရာမများကို ဖျက်ဆီးသတ်ဖြတ်ခြင်းလုပ်ရပ်များသည် အနာဂတ်တိုင်းပြည်၏ ကံကြမ္မာကို အဆိုးဘက်သို့ တွန်းပို့ခြင်းဖြစ်ကြောင်းနှင့် ယင်းကဲ့သို့ အပြုအမူများကို လက်မခံသင့်ကြောင်းလည်း ဦးထွန်းရီက ထပ်မံ သုံးသပ်ထားသည်။

“တကယ့်တကယ် ပြောကြမယ်ဆိုရင်တော့ ကျန်တဲ့ဟာကိုမကျေနပ်တာနဲ့ ဒီကလေးတွေရဲ့ တက်လမ်းပေါ့။ ဒီကလေးတွေကို ပြုစုပျိုးထောင်ပေးနေတဲ့ ဥယျာဉ်မှူးတွေကို ဒုက္ခပေးတယ်ဆိုတာကတော့ ဘာမှတော့ ဆိုင်တဲ့ကိစ္စမဟုတ်ဘူး။ လက်ခံသင့်တဲ့ကိစ္စ မဟုတ်ဘူးလို့ပဲ သဘောထားပါတယ်။ သူတို့တိုင်းပြည်တာဝန်ယူတဲ့အချိန်မှာလည်း ဒီကလေးတွေက တိုင်းပြည်အတွက်လိုတဲ့ ကလေးတွေဖြစ်လာမှာပေါ့။ ဒီအစိုးရလက်ထက်မှာ ဒီကလေးတွေကျောင်းတက်ပေမယ့် ဒီကလေးတွေဟာ ဒီအစိုးရအတွက် တစ်သက်လုံး လုပ်သွားမယ်ဆိုတဲ့ အာမဘန္တေနဲ့ လုပ်ကြတာမှမဟုတ်ဘဲ။ အမှန်ကတော့ အတွေးတွေ မှားနေတဲ့ သဘောပေါ့ဗျာ” ဟု ၎င်းက ပြောသည်။

မြန်မာနိုင်ငံ၌ ဖြစ်ပွားနေဆဲ နိုင်ငံရေးပဋိပက္ခများအတွင်း မိုင်းထောင်ဖောက်ခွဲခြင်း၊ မီးရှို့ဖျက်ဆီးခြင်း ခံထားရသည့် စာသင်ကျောင်းအရေအတွက်သည် ရာနှင့်ချီရှိကြောင်း သိရသည်။