အနောက်အုပ်စုနိုင်ငံများ၏ ပိတ်ဆို့အရေးယူမှုများက ကမ္ဘာ့စီးပွားရေးကို ထိခိုက်စေခဲ့ကြောင်း ရုရှားဘဏ္ဍာရေးဝန်ကြီးပြော
Pika (NSS) - ဇွန် ၁၇
ပြီးခဲ့သည့်နှစ်က ရုရှားအပေါ်ချမှတ်ခဲ့သည့် အနောက်အုပ်စုနိုင်ငံများ၏ ပိတ်ဆို့အရေးယူမှုများကြောင့် ကမ္ဘာလုံးဆိုင်ရာစီးပွားရေး အခြေခံသဘောတရားများကို ထိခိုက်စေခဲ့ပြီး အနောက်အုပ်စုနိုင်ငံများအပေါ် အခြားနိုင်ငံများ၏ ယုံကြည်မှုများ ကျဆင်းသွားခဲ့ကြောင်း ရုရှားဘဏ္ဍာရေးဝန်ကြီး အန်တွန်ဆေးလ်ဝါနော့ဗ်ကပြောကြားခဲ့သည်။
ကမ္ဘာပေါ်ရှိ နိုင်ငံအများအပြားသည် ပိတ်ဆို့အရေးယူမှုများကို စိတ်ပျက်နေပြီဖြစ်ပြီး အနောက်အုပ်စုနိုင်ငံများ၏ ပိတ်ဆို့အရေးယူမှုများသည် ၎င်းတို့မျှော်လင့်ထားသည့် ရလဒ်အတိုင်းမဖြစ်ခဲ့ကြောင်း ရုရှားဘဏ္ဍာရေးဝန်ကြီးက ပြောကြားခဲ့သည်။
ရုရှားဘဏ္ဍာရေးဝန်ကြီးက "ကမ္ဘာကြီးကပြောင်းလဲနေသလို ကျွန်တော်တို့ကလည်း အဲဒီအတိုင်းပြောင်းလဲနေတာပါ။ အရန်ငွေကြေးတွေ၊ ကုန်သွယ်မှုစည်းမျဉ်းတွေ၊အရင်းအနှီးစီးဆင်းမှုတွေစတဲ့ အဆင့်မြင့်စီးပွားရေးတွေရှိတယ်လို့ ယူဆခံခဲ့ရတဲ့ နိုင်ငံကြီးတွေဟာ အခြားနိုင်ငံတွေရဲ့ ယုံကြည်ကိုးစားမှုတွေကို ပျက်ပြားအောင်လုပ်ဆောင်နေတာကို ကျွန်တော်တို့ တွေ့မြင်နေရပါတယ်။ ကမ္ဘာလုံးဆိုင်ရာစီးပွားရေးဝါဒရဲ့ ဘောင်အတွင်း လုပ်ဆောင်ခဲ့တဲ့စည်းမျဉ်းတွေနဲ့ နိုင်ငံအားလုံးက ရရှိခဲ့တဲ့ အကျိုးအမြတ်တွေအားလုံးက ပျက်စီးနေပါပြီ"ဟု ပြောသည်။
ပိတ်ဆို့အရေးယူမှုတွေချမှတ်ခဲ့သည့် နိုင်ငံများသည် ပြန်လည်အကျိုးသက်ရောက်မှုများကို ရင်ဆိုင်နေရပြီး ရုရှားနိုင်ငံကို ကမ္ဘာ့စီးပွားရေးစနစ်မှ ဖယ်ထုတ်ရန်လုပ်ဆောင်သည့် ခြေလှမ်းများသည် လုပ်ဆောင်သည့် နိုင်ငံများအပေါ်တွင်လည်း သက်ရောက်မှုများရှိကြောင်း ၎င်းက ပြောသည်။
"အဲဒီနိုင်ငံတွေမှာ ငွေကြေးဖောင်းပွမှုတွေ၊စွမ်းအင်ဈေးနှုန်းမြင့်တက်လာတာတွေနဲ့ ယှဉ်ပြိုင်နိုင်စွမ်းကျဆင်းတာတွေ ဖြစ်နေပါတယ်။ဒါဟာ ကမ္ဘာလုံးဆိုင်ရာစီးပွားရေးဝါဒကို ဆန့်ကျင်ခြင်းရဲ့ရလဒ်ဖြစ်ပြီး ရုရှားဖက်ကစတင်ခဲ့တာတော့မဟုတ်ပါဘူး"ဟု ရုရှားဘဏ္ဍာရေးဝန်ကြီးက ပြောဆိုခဲ့သည်။
၎င်းက "ရုရှားနိုင်ငံဟာ မိတ်ဖက်နိုင်ငံတွေကို ရွေးချယ်ရာမှာ သူတို့ဘာပေးနိုင်လဲဆိုတာကို မကြည့်ဘဲ ရင်းရင်းနှီးနှီးရှိပြီး တန်းတူညီမျှ ကုန်သွယ်မှုပြုလုပ်ဖို့ အဆင်သင်ဖြစ်နေတဲ့ နိုင်ငံတွေကိုပဲ ရွေးချယ်တာပါ"ဟု ပြောဆိုခဲ့သည်။
ရုရှားနိုင်ငံသည် လအနည်းငယ်အတွင်း နိုင်ငံတွင်းစီးပွားရေးကို ပြန်လည်ဖွဲ့စည်းခြင်းဖြင့် စီးပွားရေးအခြေအနေများကို လိုက်လျောညီထွေဖြစ်အောင်လုပ်ဆောင်ခဲ့ကြောင်း အန်တွန်ဆေးလ်ဝါနော့ဗ်ကပြောကြားခဲ့သည်။ အန်တွန်ဆေးလ်ဝါနော့ဗ်က "နိုင်ငံခြားကုန်သွယ်မှုမှာ ကျွန်တော်တို့မရှုံးခဲ့ပါဘူး။ဈေးကွက်သစ်တွေကိုလည်း ရှာတွေ့ခဲ့ပါတယ်။ တရုတ်၊ တူရကီ၊ ပင်လယ်ကွေ့နိုင်ငံတွေ နဲ့ အိန္ဒိယနိုင်ငံတို့နဲ့အတူ ကုန်သွယ်မှုတွေကလည်း တိုးလာနေပါတယ်။ ရုရှားစီးပွားရေးကျဆင်းတာမျိုးမရှိဘဲ ပိုမိုကြီးထွားလာနေတာပါ"ဟု ပြောဆိုခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
မစားဖူးသောမှိုများ အပါအဝင် အဆိပ်ရှိသည်ဟု သံသယရှိသော မှိုများကို လုံးဝမစားရန် ကျန်းမာရေးဝန်ကြီးဌာန သတိပေးထုတ်ပြန်
RELATED POSTS
20 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,နိုင်ငံတကာ
12 Sep 2024 | စီးပွားရေး,ပြည်တွင်း